Nikol Jewelers Theft Case: અમદાવાદના નિકોલ વિસ્તારમાં a થયેલી કરોડો રૂપિયાની જ્વેલરી ચોરીની ઘટના અત્યારે આખા ગુજરાતમાં ભારે ચર્ચાનો વિષય બની છે. નિકોલના આભૂષણ જ્વેલ્સ શોરૂમમાંથી ૧.૬૬ કરોડના સોનાના દાગીનાની ચોરી કરનાર સેલ્સ ગર્લ હર્ષિદા શેટ્ટી અને તેના પ્રેમી મયુર માળીની પોલીસે ધરપકડ કરી લીધી છે. બંનેની કહાની કોઈ ક્રાઈમ વેબ સિરીઝ જેવી જ રોમાંચક અને ચોંકાવનારી છે, જેમાં પ્રેમ, કરોડોની લૂંટ, લક્ઝુરિયસ લાઈફના સપના અને અંતે એકબીજાને આપેલો દગો સામેલ છે. પોલીસની અલગ-અલગ પૂછપરછમાં આ આખા પ્લાન પાછળની અંદરની વાતો બહાર આવી છે.
શોરૂમના માલિક જમવા ગયા અને સેલ્સ ગર્લે દાગીના સેરવી લીધા
આ હાઈપ્રોફાઈલ ચોરીની વિગત એવી છે કે અમદાવાદના નિકોલ રિંગ રોડ પર આવેલા ગ્રેવિટી શોપિંગ મોલમાં આભૂષણ જ્વેલર્સનો એક મોટો શોરૂમ આવેલો છે, જ્યાં ૧૯ જેટલા કર્મચારીઓ કામ કરે છે. આ જ શોરૂમમાં છેલ્લા ૧૧ મહિનાથી હર્ષિદા શેટ્ટી નામની પરિણીત અને છૂટાછેડા લીધેલી મહિલા સેલ્સ ગર્લ તરીકે નોકરી કરતી હતી. ગત ૧૧ મે ૨૦૨૬ના રોજ બપોરના સમયે શોરૂમના માલિક દર્શનભાઈ જમવા માટે ઘરે ગયા હતા. આ ખાલી સમયનો અને મોકાનો ફાયદો ઉઠાવીને હર્ષિદાએ શોરૂમમાંથી કરોડો રૂપિયાના સોનાના દાગીના ગુપચુપ પોતાના યુનિફોર્મમાં છુપાવી દીધા હતા અને સ્ટાફને ઈમરજન્સી કામનું બહાનું કાઢીને ત્યાંથી સરકી ગઈ હતી.
સીસીટીવી ફૂટેજે ખોલી નાખી પોલ અને ક્રાઈમ બ્રાન્ચે બિછાવી જાળ
શોરૂમના માલિક દર્શનભાઈ જ્યારે ઘરેથી જમીને પરત આવ્યા અને સ્ટોકની ગણતરી કરી ત્યારે સોનાના દાગીના ગાયબ હોવાનું માલૂમ પડ્યું હતું. તેમણે તુરંત જ શોરૂમના સીસીટીવી ફૂટેજ ચેક કર્યા, જેમાં હર્ષિદા દાગીના ચોરી કરતી સાફ નજરે પડી હતી. માલિકે નિકોલ પોલીસ સ્ટેશનમાં ફરિયાદ નોંધાવ્યા બાદ ટેક્નિકલ સર્વેલન્સ શરૂ કરાયું હતું. દરમિયાન અમદાવાદ ક્રાઈમ બ્રાન્ચને બાતમી મળી હતી કે એક શંકાસ્પદ યુવતી માણેક ચોક બજારમાં સોનું વેચવા માટે ફરી રહી છે. પોલીસે તાત્કાલિક દરોડો પાડીને તે યુવતીને ઝડપી લીધી, જે બીજી કોઈ નહીં પણ ફરાર હર્ષિદા શેટ્ટી જ હતી.
વસ્ત્રાલના પરિણીત મયુર સાથે પ્રેમ અને ઉદયપુર તરફ ફરાર
પોલીસની આકરી પૂછપરછમાં હર્ષિદાએ પોતાના ગુનાની કબૂલાત કરતા જણાવ્યું કે, તે છેલ્લા કેટલાક સમયથી એકલતા અનુભવતી હતી. આ દરમિયાન તેની મુલાકાત મૂળ ઉત્તર પ્રદેશના અને હાલ વસ્ત્રાલમાં રહેતા મયુર માળી સાથે થઈ હતી. મયુર પોતે પરિણીત અને બાળકોનો પિતા હોવા છતાં બંને વચ્ચે પ્રેમ સંબંધ બંધાયો હતો. મયુર સાથે નવું વૈભવી જીવન શરૂ કરવા માટે તેણે ૧૧ મેના રોજ ચોરી કરી હતી. ચોરી કર્યા બાદ બંને તરત જ અમદાવાદથી રાજસ્થાનના ઉદયપુર ભાગી ગયા હતા. ઉદયપુર બાદ તેઓ જયપુર, દિલ્હી અને ત્યાંથી છેક ઋષિકેશ સુધી વૈભવી હોટલોમાં રોકાયા હતા.
હોટલના રૂમમાં ઝઘડો થયો અને પ્રેમી કરોડોનું સોનું લઈને ભાગી ગયો
આ વાર્તામાં ટ્વિસ્ટ ત્યારે આવ્યો જ્યારે ઋષિકેશની એક હોટલમાં કોઈ વાતને લઈને હર્ષિદા અને મયુર વચ્ચે ભારે ઝઘડો થયો હતો. હર્ષિદા જ્યારે બાથરૂમમાં ન્હાવા માટે ગઈ, ત્યારે મોકો જોઈને તેનો દગાબાજ પ્રેમી મયુર કરોડો રૂપિયાના દાગીના ભરેલી બેગ લઈને રફુચક્કર થઈ ગયો હતો. હર્ષિદા જ્યારે બહાર આવી ત્યારે મયુર ગાયબ હતો અને તેનો ફોન પણ બંધ આવતો હતો. હર્ષિદાના નસીબ સારા હતા કે તેના પર્સમાં આશરે ૧૮ લાખના દાગીના રહી ગયા હતા, બાકીનું બધું જ સોનું મયુર લૂંટીને ભાગી ગયો હતો. પ્રેમીના દગાથી ગભરાયેલી હર્ષિદા આખરે અમદાવાદ પરત આવી અને સોનું વેચવા જતાં પકડાઈ ગઈ હતી.
ચોરીના કાવતરાનો અસલી માસ્ટરમાઈન્ડ અને અડધા દાગીના ક્યાં?
નિકોલ પોલીસે હર્ષિદાની ધરપકડ કર્યા બાદ તેના લોકેશનના આધારે એસપી રિંગ રોડ પરથી મયુર માળીને પણ ઝડપી પાડ્યો છે. પોલીસ તપાસમાં બહાર આવ્યું છે કે આ આખી ચોરીનો અસલી માસ્ટરમાઈન્ડ મયુર જ હતો. તેણે જ હર્ષિદાને પ્રેમની જાળમાં ફસાવી નવું ઘર વસાવવાના ખોટા સપના બતાવી ચોરી કરવા ઉશ્કેરી હતી. હાલ પોલીસે હર્ષિદા પાસેથી ૨૨ લાખના અને મયુર પાસેથી ૧૬ લાખના દાગીના રિકવર કર્યા છે. જોકે, કુલ ચોરી ૧.૬૬ કરોડની હોવાથી બાકીના દાગીના ક્યાં છુપાવ્યા છે તે અંગે પોલીસ બંનેની કસ્ટડી મેળવીને પૂછપરછ કરી રહી છે.
