Online Gambling Violence Navsari: ગુજરાતમાં એક હચમચાવી દેનારી ઘટના સામે આવી છે. ગુજરાતના નવસારીમાં પુરુષોના એક સમૂહ વચ્ચે ચાલી રહેલું ઓનલાઇન જુગારનું સેશન હિંસામાં ફેરવાઈ ગયું. જેના કારણે 43 વર્ષના એક વ્યક્તિનું મોત નીપજ્યું છે. આરોપ છે કે ગેમ જીતવા માટે છેતરપિંડી કરવાનો આરોપ લાગ્યા બાદ તેને એક ઝાડ સાથે ઊંધો લટકાવીને લાકડીઓથી ફટકારવામાં આવ્યો હતો. પોલીસે મૃતકની ઓળખ ઉત્તર પ્રદેશના અલીગઢના રહેવાસી દિશાર ખાન તરીકે કરી છે. પોલીસના જણાવ્યા અનુસાર દિશાર ખાનની મિત્રતા છેલ્લા કેટલાક વર્ષોમાં ઓનલાઇન જુગારના સેશન દ્વારા મુંબઈમાં રહેતા મોહમ્મદ નાઝિમ મુલ્લા અને ગુજરાતના વલસાડમાં રહેતા પરવેઝ મુલ્તાની સાથે થઈ હતી.
ઓનલાઇન જુગાર રમવાનું આપ્યું હતું આમંત્રણ
4 એપ્રિલના રોજ મુલ્તાનીને નવસારીના સિસોદરા ગામમાં રહેતા એક મિત્રનો ફોન આવ્યો. તેણે મુલ્તાનીને પોતાના મિત્રો સાથે નવસારી આવીને એકસાથે ઓનલાઇન જુગાર રમવા માટે બોલાવ્યો. મુલ્તાનીએ મુલ્લા અને ખાન (જે તે સમયે મુંબઈમાં હતો) ને પોતાની સાથે જોડાવા માટે બોલાવ્યા. 5 એપ્રિલના રોજ, ત્રણેય મિત્રોએ નવસારીના સિસોદરા ગામના કેટલાક સ્થાનિક લોકો મંથન બોરાડ, ભૌતિક પ્રજાપતિ, અશોક પંચાલ, જિગો પટેલ, પ્રતીક હળપતિ અને કેવિન પટેલ સાથે મળીને ઓનલાઇન જુગારની ગેમ રમવાનું શરૂ કર્યું.
કેવી રીતે શું થયું?
દિશાર ખાન જીતવા પર ભૌતિક પ્રજાપતિ અને અશોક પંચાલે તેના પર છેતરપિંડી કરવાનો આરોપ લગાવ્યો.
મુલ્લા અને મુલ્તાનીએ વચ્ચે-બચાવ કરવાની કોશિશ કરી, પરંતુ મામલો શાંત થયો નહીં.
દિશાર ખાનને દોરડાથી બાંધી દીધો અને પછી બેલ્ટ તથા લાકડીઓથી તેના પર હુમલો કર્યો.
મુલ્લાએ દિશાર ખાનના ફોનમાંથી જીતેલી 30,000 રૂપિયાની રકમ આરોપીઓમાંથી એકને પરત કરી દીધી.
છ આરોપીઓની પોલીસે કરી ધરપકડ
નવસારી જિલ્લા પોલીસ અધિક્ષક રાહુલ પટેલે જણાવ્યું કે આરોપીઓએ મૃતકને ફટકારી ફટકારીને મારી નાખ્યો. આરોપીઓનો આરોપ હતો કે મૃતકે ઓનલાઇન જુગારની રમતમાં છેતરપિંડી કરીને જીત મેળવી હતી. અમે સોમવારે તમામ છ આરોપીઓની ધરપકડ કરી લીધી છે. પોલીસ તરફથી આ અંગે કાયદેસરની કાર્યવાહી કરવામાં આવી રહી છે. આ ઘટના બાદ નવસારીના ગ્રામ્ય પંથકમાં ફફડાટ વ્યાપી ગયો છે. પોલીસ ખાસ કરીને ઓનલાઇન જુગાર અને જુગાર રમવાના કિસ્સાઓ રોકવા માટે સક્રિય થઈ ગઈ છે.
