Rajkot RMC Food Checking: રાજકોટ મહાનગરપાલિકાની ફૂડ શાખાએ શહેરવાસીઓના સ્વાસ્થ્યને પ્રાથમિકતા આપતા એક અત્યંત મહત્વની અને સઘન ‘મેગા ફૂડ ચેકિંગ ડ્રાઈવ’ હાથ ધરી છે. શહેરના પશ્ચિમ, પૂર્વ અને મધ્ય એમ ત્રણેય ઝોનમાં એકસાથે શરૂ થયેલી આ કામગીરી હેઠળ અધિકારીઓની ટીમે રેસ્ટોરન્ટથી લઈને પનીર અને ચીઝ બનાવતા નાના-મોટા એકમો સુધી આકસ્મિક તપાસ કરી છે. ખાસ કરીને દૂધ અને તેની બનાવટો, જે તહેવારોના સમયમાં વધુ વપરાય છે, તેના પર અધિકારીઓએ વિશેષ ધ્યાન કેન્દ્રિત કર્યું છે. આ તપાસ દરમિયાન ફ્રીજની સ્વચ્છતા, રસોડામાં કામ કરતા કર્મચારીઓનું હાઈજીન, કાચા માલની ગુણવત્તા અને ખાદ્યપદાર્થોની એક્સપાયરી ડેટ જેવી બાબતોનું ઝીણવટપૂર્વક ચેકિંગ કરવામાં આવ્યું હતું.
1100થી વધુ એકમોમાં તપાસ અને 28 એકમો સીલ
આ વ્યાપક તપાસ ઝુંબેશ અંતર્ગત અત્યાર સુધીમાં કુલ 1100થી વધુ ખાદ્ય એકમોની મુલાકાત લેવામાં આવી છે. આ તપાસ દરમિયાન 310 જેટલા એકમો એવા મળી આવ્યા હતા જ્યાં સ્વચ્છતાના ધારાધોરણો જળવાતા નહોતા, જેથી તેમને તાત્કાલિક નોટિસ ફટકારવામાં આવી છે. ગંભીર બેદરકારી બદલ નિયમોનું ઉલ્લંઘન કરનારા 28 એકમોને તંત્ર દ્વારા સીલ કરી દેવામાં આવ્યા છે. દરોડા દરમિયાન મળી આવેલા આશરે 5700 કિલો જેટલા અખાદ્ય ખોરાકના જથ્થાને સ્થળ પર જ નાશ કરીને ગ્રાહકોના સ્વાસ્થ્ય સાથે થતા ચેડાં અટકાવવામાં આવ્યા છે. આ ઉપરાંત, નિયમભંગ બદલ અત્યાર સુધીમાં 7 લાખ 10 હજાર રૂપિયાથી વધુનો દંડ પણ વસૂલવામાં આવ્યો છે.
એનાલોગ પ્રોડક્ટ્સ સામે લાલબત્તી
આજકાલ બજારમાં અસલી જેવા દેખાતા પરંતુ વનસ્પતિ તેલ અને હાનિકારક કેમિકલમાંથી બનતા ‘એનાલોગ પનીર’ અને ‘ચીઝ’નું વેચાણ ચિંતાનો વિષય બન્યું છે. RMCની ટીમે આવા અનેક યુનિટોને રંગે હાથે પકડીને તેના સેમ્પલ લેબમાં તપાસ માટે મોકલ્યા છે. ફૂડ અધિકારી જયેશ વાકાણીએ સ્પષ્ટ કર્યું છે કે શહેરના નાગરિકોને શુદ્ધ અને સુરક્ષિત આહાર મળે તે તંત્રની મુખ્ય જવાબદારી છે. તેમણે નાગરિકોને પણ અપીલ કરી છે કે કોઈપણ ખાદ્ય વસ્તુ ખરીદતી વખતે FSSAIનું લાઈસન્સ અને પેકેટ પરની વિગતો ખાસ તપાસવી. આ ડ્રાઈવ આગામી દિવસોમાં પણ આટલી જ કડકાઈ સાથે ચાલુ રહેશે, જેથી કરીને નકલી કે વાસી ખોરાક વેચનારા તત્વોને કાયદાનો પાઠ ભણાવી શકાય.
