Real Estate Slowdown: રાજ્યમાં હોમ લોન લેતા લોકોની સંખ્યા વધતી હોવા છતાં, ઘર ખરીદવાની તૈયારીમાં ઝડપ જોવા મળતી નથી. સ્ટેટ લેવલ બેંકર્સ કમિટીના સપ્ટેમ્બર 2025 ક્વાર્ટરના આંકડા દર્શાવે છે કે હોમ લોન વિતરણમાં વર્ષ દર વર્ષની સરખામણીમાં 14 ટકાનો વધારો નોંધાયો છે. વિતરણ રૂ. 14,266 કરોડથી વધીને રૂ. 16,264 કરોડ થયું છે, પરંતુ લોન લેનારાની સંખ્યા માત્ર 7 ટકા જેટલી વધીને 95,532થી 1.02 લાખ સુધી પહોંચી છે. આ અંતર સ્પષ્ટ કરે છે કે લોકો નવી પ્રોપર્ટી ખરીદવામાં સાવધ દેખાઈ રહ્યા છે.
મોટા શહેરોમાં ધિરાણ વધારે છતાં નવા ઘરોની માંગ ઓછી
સૂત્રોના જણાવ્યા મુજબ, અમદાવાદ, વડોદરા, સુરત અને રાજકોટ જેવા મુખ્ય શહેરોમાં સર્વાધિક લોન આપવામાં આવે છે. છતાં, તમામ બજારોમાં નવા રહેઠાણોની માંગમાં ઘટાડો નોંધાઈ રહ્યો છે. ખાસ કરીને એફોર્ડેબલ હાઉસિંગ સેગમેન્ટ, જે એક સમયે રાજ્યનું સૌથી લોકપ્રિય ક્ષેત્ર હતું, તેમાં મોટો ઘટાડો જોવા મળી છે. છેલ્લા કેટલાક મહિનાથી આ નકારાત્મક ટ્રેન્ડ યથાવત રહ્યો છે, જે રિયલ એસ્ટેટ બજારમાં ધીમીગતિને દર્શાવે છે.
વધતા ભાવને કારણે ખરીદીમાં વિલંબ
મધ્યમ આવક ધરાવતા અને પ્રથમ વખત ઘર ખરીદવા ઈચ્છતા લોકો પ્રોપર્ટીના સતત વધતા ભાવને કારણે નિર્ણય મુલતવી રાખી રહ્યા છે. ડેવલપર્સ જણાવે છે કે નવા પ્રોજેક્ટ રજૂ થવા છતાં શહેરના અનેક વિસ્તારોમાં માંગ નબળી છે. ખાસ કરીને એફોર્ડેબલ હાઉસિંગમાં ખરીદીની ક્ષમતા ઘટી રહી છે. એક સમયે મોટા પાયે પ્રોજેક્ટ લોન્ચ કરનાર ડેવલપર્સ આજે ખરીદદારોની ઘટતી સંખ્યાને કારણે સાવચેત બની રહ્યા છે.
મોટાં યુનિટ્સની માંગ ઘટી, કોમનવેલ્થ 2030થી આશા
સૂત્રોના જણાવ્યા મુજબ 3BHK અને 4BHK જેવા મોટા યુનિટ્સની માંગમાં ઘટાડો થયો છે. પોષાય તેવા તથા પ્રીમિયમ બંને સેગમેન્ટ ધીમી ગતિથી આગળ વધી રહ્યા છે. પરંતુ કોમનવેલ્થ ગેમ્સ 2030ના આયોજનને કારણે અમદાવાદમાં આવનારા સમયમાં હાઉસિંગની માંગમાં વધારો થઈ શકે છે. ખેલાડીઓ, ટ્રેનરો, વિદ્યાર્થીઓ અને સપોર્ટ સ્ટાફને ધ્યાનમાં લેતા ઈન્ફ્રાસ્ટ્રક્ચરનું નિર્માણ પણ પ્રોપર્ટીની માંગને પ્રોત્સાહન આપી શકે છે.
બાંધકામ ખર્ચ વધતાં માંગ ઘટી, રિડેવલપમેન્ટમાં પણ મંદી
બાંધકામ સામગ્રી અને જમીનના ખર્ચમાં વધારાની સીધી અસર બજેટ ખરીદદારો પર પડી રહી છે, જેના કારણે માંગ ઘટી રહી છે. અંડર કન્સ્ટ્રક્શન પ્રોજેક્ટ્સમાં મકાનો ન વેચાતા રિડેવલપમેન્ટ પ્રોજેક્ટ્સ પણ ધીમા પડી ગયા છે. ઘણા બિલ્ડરો હવે નવી રિડેવલપમેન્ટ ડીલ કરવા અચકાઈ રહ્યા છે, કારણ કે પહેલા થી વિકસાવવામાં આવેલી સોસાયટીઓમાં પણ ફ્લેટ્સ ન વેચાતા આર્થિક જોખમ વધી રહ્યું છે. નિષ્ણાતોના મતે આ જ ટ્રેન્ડ આગામી મહિનાઓમાં પણ યથાવત રહી શકે છે.
