સુરતઃ ભાજપના ઉમેદવાર મુકેશ દલાલે ઉમેદવારી ફોર્મ ભર્યું.
લોકસભા ચૂંટણી માટે રાજકીય પક્ષોએ તેમના ઉમેદવારોના નામની જાહેરાત કરી દીધી છે. મંગળવારે રાજ્યભરમાં પક્ષના ઉમેદવારો દ્વારા સત્તાવાર રીતે ઉમેદવારી પત્રો ભરવામાં આવ્યા હતા. ભારતીય જનતા પાર્ટીના ઉમેદવાર મુકેશ દલાલે સુરત લોકસભા બેઠક પરથી ઉમેદવારી પત્ર ભર્યું હતું. તેમણે તેમના સમર્થકો સાથે રિટર્નિંગ ઓફિસર સમક્ષ ઉમેદવારી પત્ર ભર્યું હતું.
આચારસંહિતાના અમલના કારણે ભારતીય જનતા પાર્ટીના ઉમેદવારો દ્વારા રેલી સ્વરૂપે બહાર આવવાને બદલે સ્થાનિક ધારાસભ્યો અને સંગઠનના અધિકારીઓની હાજરીમાં ઉમેદવારી પત્ર ભરવાનો નિર્ણય લેવાયો હતો. આચારસંહિતાના અમલને કારણે ઉમેદવારોએ કરેલા ખર્ચની પણ નોંધ કરવામાં આવે છે. જેને ધ્યાનમાં રાખીને મુકેશ દલાલ બહુ ઓછા સમર્થકો સાથે ઉમેદવારી પત્ર ભરવા આવ્યા હતા. બરાબર 12:39 વિજય મુહૂર્તમાં ફોર્મ ભરાયું હતું.
સુરત લોકસભાના ઉમેદવાર મુકેશ દલાલે ઉમેદવારી પત્ર ભર્યા બાદ પત્રકારો સાથે વાત કરી હતી. જેમાં તેણે પોતાની જીતનો વિશ્વાસ વ્યક્ત કર્યો છે. આચારસંહિતા લાગુ થવાને કારણે બહુ ઓછા પક્ષના નેતાઓ અને કાર્યકરોએ એકસાથે આવીને ઉમેદવારી પત્રો ભરવાનું નક્કી કર્યું હતું. તેમણે કહ્યું કે 2019માં મળેલી લીડ કરતા પણ વધુ લીડ સાથે આ વખતે જીત નિશ્ચિત છે. વડાપ્રધાન નરેન્દ્ર મોદી દ્વારા દેશભરમાં કરાયેલા વિકાસ કાર્યોને કારણે ભાજપને જબરદસ્ત જીત મળશે. એક તરફ મોદી અને બીજી તરફ રામ મંદિરનું નિર્માણ, જીત નિશ્ચિત છે.
