સુરતના લોકો માટે મોટી સગવડ, અમૂલ અને સુમુલ ઉત્પાદનો સરળતાથી ઉપલબ્ધ થશે.
આજે, શનિવાર, 27 જુલાઈ, 2024, સુમુલ ડેરીના પ્રાંગણમાં એક મહત્વપૂર્ણ કાર્યક્રમનું આયોજન કરવામાં આવ્યું હતું. આ કાર્યક્રમમાં સુમુલ ડેરીએ અમૂલ અને સુમુલ બ્રાન્ડના દૂધ અને દૂધની બનાવટોના વેન્ડિંગ મશીનનું ઉદ્ઘાટન કર્યું હતું. આ મશીન સુમુલ ડેરીના માસ્ટર શેફ પાસેના પાર્લરમાં લગાવવામાં આવ્યું છે.
ઉદઘાટન સમારોહમાં સુમુલ ડેરીના ચેરમેન માનસિંહભાઈ પટેલ, વાઈસ ચેરમેન રાજુભાઈ પાઠક, બોર્ડ ઓફ ડિરેક્ટર્સના સભ્યો, એમડી અરુણ પુરોહિત અને અન્ય અધિકારીઓ ઉપસ્થિત રહ્યા હતા.
આ ઓટોમેટિક વેન્ડિંગ મશીન દ્વારા સુરતના લોકો હવે 24 કલાક અમૂલ અને સુમુલ બ્રાન્ડનું દૂધ, છાશ, દહીં, લસ્સી અને મીઠાઈ જેવી વિવિધ પ્રકારની દૂધની બનાવટો સરળતાથી મેળવી શકશે. મશીન સંપૂર્ણપણે ડિજિટલ છે અને તેમાં UPI પેમેન્ટની સુવિધા પણ છે.
આ નવી સુવિધાથી ગ્રાહકોને દૂધ લેવા માટે દુકાનોમાં જવાની જરૂર નહીં પડે. તેઓ હવે તેમની સુવિધા અનુસાર વેન્ડિંગ મશીનમાંથી કોઈપણ સમયે દૂધ મેળવી શકશે.
સુમુલ ડેરી ગ્રાહકોને વધુ સારી સેવાઓ આપવા માટે હંમેશા પ્રતિબદ્ધ છે. આ વેન્ડિંગ મશીન આ દિશામાં એક પગલું છે. આનાથી ગ્રાહકોને સુવિધા તો મળશે જ પરંતુ દૂધની ઉપલબ્ધતા પણ સુનિશ્ચિત થશે.
