Computer Work Health Risks: આજના સમયમાં મોટાભાગના લોકો લેપટોપ કે કોમ્પ્યુટર પર કલાકો સુધી કામ કરે છે, જેના કારણે ગરદનનો દુખાવો, સર્વાઈકલની સમસ્યા અને પીઠનો દુખાવો સામાન્ય બની ગયો છે. નિષ્ણાતોના મતે, સાચું પોશ્ચર અપનાવીને અને કેટલીક સરળ કસરતો દ્વારા આ સમસ્યાઓને ઘણી હદ સુધી રોકી શકાય છે.
લેપટોપ કે કોમ્પ્યુટર પર કલાકો સુધી કામ કરો છો તો અપનાવો આ રીતો:
નિષ્ણાતો જણાવે છે કે લેપટોપ યુઝર્સ માટે સૌથી શ્રેષ્ઠ રીત એ છે કે સ્ક્રીનને આંખોના લેવલ પર રાખવી, જેથી ગરદનને આગળની તરફ નમવાથી બચાવી શકાય. આદર્શ પોશ્ચરમાં પીઠ સીધી રાખવી જોઈએ, ખભા રિલેક્સ હોવા જોઈએ અને ગરદનને સપોર્ટ મળવો જોઈએ. કોમ્પ્યુટર સ્ક્રીનને આંખોની સમાંતર અથવા થોડી નીચે રાખો, જેથી માથાને વારંવાર ઉપર-નીચે ન કરવું પડે. કીબોર્ડને એવી જગ્યાએ રાખો કે હાથની કોણી લગભગ 90-100 ડિગ્રીના ખૂણે રહે. ડેસ્ક પર કીબોર્ડને થોડું નીચે અથવા એલ્બો લેવલની આસપાસ રાખવાથી ખભા અને ગરદન પર દબાણ ઓછું થાય છે.
લેપટોપ યુઝર્સ માટે સ્ટેન્ડનો ઉપયોગ કરવો સૌથી વધુ હિતાવહ છે, કારણ કે લેપટોપની સ્ક્રીન સામાન્ય રીતે નીચે હોય છે, જેનાથી ‘ટેક નેક’ (Tech Neck) ની સમસ્યા થાય છે. નિષ્ણાતો ખાસ કરીને ગરદનની કસરતને ખૂબ જ મહત્વપૂર્ણ ગણાવે છે. દરરોજ ‘નેક રેન્જ ઓફ મોશન’ કસરત કરવાથી સ્નાયુઓ મજબૂત થાય છે અને લાંબા સમય સુધી કામ કરવાની ક્ષમતા વધે છે. આ કસરતોમાં ગરદનને ધીમે-ધીમે આગળ-પાછળ, ડાબે-જમણે ફેરવવી જેવી મૂવમેન્ટનો સમાવેશ થાય છે.
નિષ્ણાતો સલાહ આપે છે કે દર 30-45 મિનિટે બ્રેક લો. ઊભા થઈને થોડું ચાલો અને ગરદનનું હળવું સ્ટ્રેચિંગ કરો. ખુરશીમાં સપોર્ટ હોવો જોઈએ અને પગ જમીન પર સપાટ રાખો. જો લેપટોપ પર કામ વધારે હોય તો એક્સટર્નલ કીબોર્ડ અને માઉસનો ઉપયોગ કરો. આ નાના-નાના ફેરફારો લાંબા ગાળે દુખાવામાં રાહત અપાવે છે.
નોંધ- નિયમિત કસરતથી ઓફિસ વર્કર્સની તબિયત સારી રહી શકે છે. જો દુખાવો વધારે હોય તો ડોક્ટરની સલાહ લો.
