Cancer Drug Price Cut: પરિવારમાં કોઈને કેન્સર થાય ત્યારે પરિવારજનોની સૌથી મોટી ચિંતા તેમની દવાઓના ખર્ચની હોય છે. કેન્સરની ઘણી દવાઓ અત્યાર સુધી મોંઘી મળતી હતી, પરંતુ હવે સરકારના એક નિર્ણયથી દર્દીઓ માટે રાહતના સમાચાર છે. હકીકતમાં, આગામી બે અઠવાડિયાની અંદર ભારતમાં કેન્સરની કેટલીક દવાઓ અત્યારની સરખામણીમાં ઘણી સસ્તી થઈ જશે. પેલ્બોસિક્લિબ કેપ્સ્યુલની એક બ્રાન્ડ, જેની હાલની કિંમત ₹40,421 છે, તે હવે ₹2,720માં મળશે. થિયોટેપા ઇન્જેક્શન, જેની કિંમત ₹80,072 છે, તે હવે ₹7,150માં મળશે.
કેન્સરની દવાઓના ભાવમાં 93.3 ટકા સુધીનો મોટો ઘટાડો
જણાવી દઈએ કે ભારત સરકારના રાષ્ટ્રીય ઔષધિ કિંમત નિર્ધારણ પ્રાધિકરણ (NPPA)એ કેન્સરની 543 દવાઓના મહત્તમ છૂટક ભાવ (MRP)માં 93.3 ટકા સુધીનો મોટો ઘટાડો કર્યો છે. સરકાર દ્વારા 137 નોન-શેડ્યૂલ કેન્સર-વિરોધી દવાઓ પર વેપારી માર્જિન 30% સુધી મર્યાદિત કરવાના નિર્ણય બાદ આ પગલું લેવામાં આવ્યું છે.
