India Fuel Supply Strait of Hormuz: અમેરિકા અને ઈરાન વચ્ચે થયેલા સીઝફાયર (યુદ્ધવિરામ) બાદ સ્ટ્રેટ ઓફ હોર્મુઝ પર પરિસ્થિતિ ધીરે-ધીરે સામાન્ય થવાની આશા છે. એક તરફ અમેરિકી રાષ્ટ્રપતિ ડોનાલ્ડ ટ્રમ્પે બે અઠવાડિયાના યુદ્ધ વિરામની જાહેરાત કરી છે, તો બીજી તરફ ઈરાને પણ આ દરમિયાન હોર્મુઝ જળમાર્ગ ખોલવા પર સહમતિ દર્શાવી છે. આનાથી ભારત માટે રાહતના સમાચાર સામે આવ્યા છે, કારણ કે પશ્ચિમ એશિયામાં તણાવને કારણે દેશમાં ઈંધણનો પુરવઠો પ્રભાવિત થઈ રહ્યો હતો.
ટ્રમ્પે જણાવ્યું કે પાકિસ્તાનના વડાપ્રધાન શહેબાઝ શરીફ અને ફિલ્ડ માર્શલ અસીમ મુનીર સાથેની વાતચીત બાદ આ નિર્ણય લેવામાં આવ્યો છે. તેમણે કહ્યું કે તેમની પાસે ઈરાન પર મોટા હુમલાને રોકવા માટે અપીલ કરવામાં આવી હતી. સાથે જ ઈરાન તરફથી હોર્મુઝને સુરક્ષિત રીતે ખોલવાની વાતને ધ્યાનમાં રાખીને તેમણે બે અઠવાડિયા સુધી બોમ્બમારો અને હુમલા રોકવાનો નિર્ણય લીધો.
ઈરાનના વિદેશ મંત્રી અબ્બાસ અરાઘચી
ઈરાન પણ આ સીઝફાયર માટે તૈયાર થઈ ગયું છે. ઈરાનના વિદેશ મંત્રી અબ્બાસ અરાઘચીએ કહ્યું કે તેમની શરતો સ્વીકારી લેવામાં આવી છે અને આગામી બે અઠવાડિયા સુધી જહાજોને હોર્મુઝમાંથી સુરક્ષિત રીતે પસાર થવા દેવામાં આવશે. આ કામ ઈરાની સેના સાથેના તાલમેલથી કરવામાં આવશે. જ્યારે યુદ્ધ શરૂ થયું હતું ત્યારે ઈરાને હોર્મુઝ જળમાર્ગ બંધ કરી દીધો હતો. આની સીધી અસર ભારત પર પડી, કારણ કે ભારતનું આશરે 40 ટકા કાચું તેલ, 50 ટકાથી વધુ એલએનજી અને લગભગ 90 ટકા એલપીજી આ જ રસ્તેથી આવે છે. જોકે બાદમાં ઈરાને ભારત સહિત કેટલાક દેશોને મિત્ર ગણાવતા આ રસ્તેથી પસાર થવાની પરવાનગી આપી દીધી હતી. આમાં ભારત ઉપરાંત ચીન, રશિયા, ઈરાક અને પાકિસ્તાન પણ સામેલ હતા.
ભારત તરફ આવી રહ્યા છે 2 એલપીજી ટેન્કર
હાલ સમાચાર છે કે ભારતીય ધ્વજ ધરાવતા બે એલપીજી ટેન્કર સુરક્ષિત રીતે હોર્મુઝ પસાર કરીને ભારત તરફ આવી રહ્યા છે, જ્યારે 16 અન્ય જહાજો હજુ પણ પર્શિયન ગલ્ફમાં ફસાયેલા છે. આમાં એલએનજી જહાજ, એલપીજી ટેન્કર, કાચું તેલ લઈ જનારા જહાજ, કન્ટેનર જહાજ અને અન્ય માલવાહક જહાજો સામેલ છે. સરકારી અધિકારીના જણાવ્યા અનુસાર, 46,650 ટન એલપીજી લઈને ‘ગ્રીન સાનવી’ ટેન્કર 7 એપ્રિલે ભારત પહોંચશે, જ્યારે 15,500 ટન ગેસ સાથે ‘ગ્રીન આશા’ ટેન્કર 9 એપ્રિલે ભારતીય કિનારે પહોંચશે.
ભારત કેટલું તેલ આયાત કરે છે?
ભારત પોતાની જરૂરિયાતનું આશરે 60 ટકા એલપીજી આયાત કરે છે અને આમાંથી લગભગ 90 ટકા સપ્લાય પશ્ચિમ એશિયાથી થાય છે. એવામાં આ ટેન્કરોના આવવાથી અને હોર્મુઝ ખુલવાથી દેશમાં ગેસનો પુરવઠો બહેતર થવાની આશા છે. હવે જ્યારે બે અઠવાડિયા માટે આ જળમાર્ગ ખુલવા જઈ રહ્યો છે ત્યારે ભારત આવનારા જહાજોની સંખ્યા વધી શકે છે અને ઈંધણની અછતનું દબાણ ઓછું થઈ શકે છે.
