JNU Student Protest Clash: દિલ્હીમાં ગુરુવારે વિદ્યાર્થી સંઘ દ્વારા કાઢવામાં આવેલા માર્ચ દરમિયાન પોલીસ અને જવાહરલાલ નેહરુ યુનિવર્સિટી (JNU) ના વિદ્યાર્થીઓ વચ્ચે થયેલી અથડામણમાં 25 પોલીસકર્મીઓ ઘાયલ થયા છે. પોલીસે દાવો કર્યો હતો કે પ્રદર્શનકારીઓએ તેમના પર હુમલો કર્યો હતો. બીજી તરફ પ્રદર્શનકારી વિદ્યાર્થીઓએ તેમની સામે અતિશય બળપ્રયોગનો આરોપ લગાવ્યો હતો. પોલીસે 51 પ્રદર્શનકારી વિદ્યાર્થીઓની અટકાયત કરી છે. પોલીસે જણાવ્યું કે પ્રદર્શનકારીઓએ લાકડીઓ અને જૂતા ફેંક્યા અને હુમલા કર્યા, જેમાં અનેક પોલીસકર્મીઓ ઘાયલ થયા. પોલીસે જણાવ્યું કે આ દરમિયાન કેટલાક કર્મીઓને દાંત વડે ‘બચકા’ પણ ભરવામાં આવ્યા હતા. વસંત કુંજ પોલીસ સ્ટેશનમાં આ મામલે કેસ નોંધવામાં આવ્યો છે.
કઈ કલમો લાગી
પોલીસે જે કલમો લગાવી છે, તેમાં સરકારી કર્મચારીને ફરજ બજાવતા અટકાવવા, પોલીસકર્મીઓ પર હુમલો અને તેમને ઈજા પહોંચાડવી, જાહેર મિલકતને નુકસાન પહોંચાડવું, ગેરકાયદેસર રીતે એકઠા થવાનો સમાવેશ થાય છે. પોલીસે ગુનો નોંધીને ઘટનાની વિગતવાર તપાસ શરૂ કરી છે. અગાઉ પોલીસે એક નિવેદનમાં જણાવ્યું હતું કે વિદ્યાર્થીઓએ જવાહરલાલ નેહરુ યુનિવર્સિટી કેમ્પસથી શિક્ષણ મંત્રાલય સુધી ‘લોંગ માર્ચ’ કાઢવાનું આહવાન કર્યું હતું. આ માર્ચ યુનિવર્સિટીના વાઈસ ચાન્સેલર દ્વારા તાજેતરમાં એક પોડકાસ્ટમાં યુજીસીના ધોરણોના અમલીકરણ, JNUSU પદાધિકારીઓના સસ્પેન્શન અને સૂચિત રોહિત એક્ટ પર કરવામાં આવેલી ટિપ્પણીઓના વિરોધમાં ચાલી રહેલા પ્રદર્શનનો ભાગ હતો.
કેવી રીતે શરૂ થઈ અથડામણ
પોલીસના જણાવ્યા અનુસાર, JNU વહીવટીતંત્રે પ્રદર્શનકારી વિદ્યાર્થીઓને જાણ કરી હતી કે કેમ્પસની બહાર કોઈ પણ પ્રકારના વિરોધ પ્રદર્શનની પરવાનગી આપવામાં આવી નથી અને તેમને યુનિવર્સિટી કેમ્પસની અંદર જ પોતાનું પ્રદર્શન મર્યાદિત રાખવાની સલાહ આપી હતી. પોલીસે જણાવ્યું કે તેમ છતાં, અંદાજે 400-500 વિદ્યાર્થીઓ કેમ્પસમાં જમા થયા અને વિરોધ પ્રદર્શન શરૂ કરી દીધું. બપોર પછી અંદાજે 3.20 વાગ્યે, પ્રદર્શનકારીઓ મુખ્ય દ્વારથી બહાર નીકળ્યા અને મંત્રાલય તરફ આગળ વધવાનો પ્રયાસ કર્યો. એક વરિષ્ઠ પોલીસ અધિકારીએ જણાવ્યું કે, “સ્થિતિ બગડતા કેમ્પસની બહાર લગાવવામાં આવેલા બેરિકેડ્સને નુકસાન થયું હતું. પ્રદર્શનકારીઓએ બેનરો અને લાકડીઓ ફેંકી, જૂતા ફેંક્યા અને હુમલો પણ કર્યો. અથડામણ દરમિયાન કેટલાક પોલીસકર્મીઓને દાંત વડે બચકા ભરવામાં આવ્યા હતા. આનાથી ઘટનાસ્થળે તૈનાત અનેક અધિકારીઓ ઘાયલ થયા હતા.” પોલીસકર્મીઓએ પ્રદર્શનકારીઓને JNU કેમ્પસના નોર્થ ગેટ પર રોક્યા અને ધીમે ધીમે તેમને યુનિવર્સિટી કેમ્પસની અંદર ધકેલી દીધા.
શિક્ષક સંઘે નિંદા કરી
જવાહરલાલ નેહરુ યુનિવર્સિટી શિક્ષક સંઘ (JNUTA) એ આજે જાહેર કરેલા એક નિવેદનમાં, પોલીસ દ્વારા કરવામાં આવેલા “બળપ્રયોગ” ની નિંદા કરી હતી. સંઘે આરોપ લગાવ્યો હતો કે અનેક વિદ્યાર્થિનીઓ અને વિદ્યાર્થીઓ ઘાયલ થયા છે અને અટકાયત કરાયેલા લોકોની સુરક્ષા અંગે ચિંતા વ્યક્ત કરી હતી, સાથે જ દાવો કર્યો હતો કે કેટલાકને “અજ્ઞાત સ્થળોએ” લઈ જવામાં આવ્યા છે. JNUTA એ એવો પણ આરોપ લગાવ્યો હતો કે પોલીસની કાર્યવાહી વિદ્યાર્થીઓને માર્ચ કરવાના તેમના લોકશાહી અધિકારનો ઉપયોગ કરતા રોકવાના હેતુથી કરવામાં આવી હતી અને તેણે અટકાયત કરાયેલા તમામ વિદ્યાર્થીઓને તાત્કાલિક મુક્ત કરવાની માંગ કરી હતી.
