Meerut Blue Drum Murder Case: ઉત્તર પ્રદેશના મેરઠની એક અદાલતે બુધવારે ચર્ચિત બ્લૂ ડ્રમ હત્યાકાંડમાં મુસકાન રસ્તોગી અને તેના સાથી સાહિલ શુક્લાને તેના પતિ સૌરભ રાજપૂતની હત્યાના કેસમાં મોતની સજા સંભળાવી. સૌરભ મર્ચન્ટ નેવીમાં અધિકારી હતા.
અદાલતના અધિકારીઓએ જણાવ્યું કે જિલ્લા ન્યાયાધીશ અરવિંદ કુમાર મિશ્રાએ સજા સંભળાવી. મુસકાન અને સાહિલ, બંનેને વિડિયો કોન્ફરન્સિંગ દ્વારા અદાલતમાં રજૂ કરવામાં આવ્યા.
અદાલતે 30 સપ્ટેમ્બરે બંનેને સૌરભની હત્યા કરવા અને તેના મૃતદેહને છુપાવવાનો પ્રયાસ કરવાના કેસમાં દોષિત ઠેરવ્યા હતા. 13 મહિના સુધી ચાલેલા કેસમાં 126 વખત સુનાવણી થયા બાદ આ ચુકાદો આવ્યો.
હત્યા બાદ મૃતદેહના ટુકડા કરીને નીલા ડ્રમમાં નાખ્યા હોવાનો આરોપ
અભિયોજન પક્ષ અનુસાર, સૌરભની હત્યા 3 માર્ચ 2025ના રોજ કરવામાં આવી હતી. આરોપ છે કે મુસકાન અને સાહિલે તેના શરીરના ટુકડા કર્યા અને અવશેષોને એક નીલા ડ્રમમાં નાખી દીધા. ગુનાને છુપાવવા માટે બાદમાં ડ્રમને સિમેન્ટથી ભરી દેવામાં આવ્યો. આ કેસનો ખુલાસો ત્યારે થયો, જ્યારે મેરઠમાં દંપતીના ઘરમાંથી સૌરભના શરીરના અવશેષો મળી આવ્યા.
કેસની સુનાવણી દરમિયાન 22 સાક્ષીઓનાં નિવેદનો નોંધવામાં આવ્યાં
મુકદ્દમા દરમિયાન અભિયોજન પક્ષે 22 સાક્ષીઓનાં નિવેદનો નોંધાવ્યાં. તેમાં એવા લોકો પણ સામેલ હતા, જેઓ ડ્રમ, છરી અને ગુનામાં કથિત રીતે ઉપયોગમાં લેવાયેલી અન્ય વસ્તુઓની ખરીદી સાથે સંકળાયેલા હતા.
આરોપીઓની ગતિવિધિઓની જાણકારી મેળવવા માટે હોટલના સંચાલકો અને ટેક્સીચાલકોનાં નિવેદનો પણ નોંધવામાં આવ્યાં. આ ઉપરાંત, અલગ-અલગ સ્થળોએ આરોપીઓના રોકાણ સાથે જોડાયેલા રેકોર્ડ પણ અદાલતમાં રજૂ કરવામાં આવ્યા.
