Muslim entry in garba row: મુંબઈમાં નવરાત્રિ દરમિયાન ગરબામાં મુસ્લિમોના સામેલ થવાને લઈને BJP ધારાસભ્યએ શરત મૂકી છે. નવરાત્રિ દરમિયાન ગરબા અને ડાંડિયામાં સામેલ થવા માટે મુસ્લિમ સમાજના યુવાનોને કપાળ પર તિલક લગાવવું પડશે અને દેવીની પૂજા કરવી પડશે. આ શરત બોરીવલીના BJP ધારાસભ્ય સંજય ઉપાધ્યાયે મૂકી છે. રવિવારે બોરીવલીના કોરા કેન્દ્રમાં યોજાનારા ગરબાની તૈયારીઓને લઈને યોજાયેલી બેઠક બાદ ઉપાધ્યાયે આ વાત કહી હતી. તેમણે કહ્યું કે જે મુસ્લિમોને ગરબામાં ભાગ લેવો છે તેમણે માથા પર તિલક લગાવવું પડશે, સનાતન ધર્મ પ્રત્યે શ્રદ્ધા દર્શાવતા દેવીની આરતી ઉતારવી પડશે અને પૂજા કરવી પડશે.
પત્ની, બહેન અને પુત્રી સાથે ગરબામાં આવો
ઉપાધ્યાયે કહ્યું કે આ વખતે ગરબામાં મુસ્લિમ સમાજના યુવાનોને સીધી એન્ટ્રી આપવામાં આવશે નહીં. જેઓ આવવા માગે છે તેઓ પોતાની પત્ની, બહેન અને પુત્રી સાથે આવે. માથા પર તિલક લગાવે અને દેવીની પૂજા કરે. આ અમારો ધાર્મિક અને સામાજિક કાર્યક્રમ છે, આ સ્થળ લવ જેહાદ માટે નથી. બીજી તરફ BJPના પૂર્વ સાંસદ ગોપાલ શેટ્ટીએ કહ્યું કે જો કોઈ મુસ્લિમ વ્યક્તિ તિલક લગાવીને આવે તો તેને ગરબામાં સામેલ થવા દેવામાં આવશે. શેટ્ટીએ કહ્યું કે મુસ્લિમ અને ક્રિશ્ચિયનના પૂર્વજો હિંદુ હતા, તેથી તેમને માથા પર તિલક લગાવવામાં કોઈ વાંધો ન હોવો જોઈએ. જ્યારે હિંદુ નેતાઓ ઈદના કાર્યક્રમમાં સામેલ થાય છે ત્યારે સન્માનરૂપે ટોપી પહેરે છે, તેવી જ રીતે જો મુસ્લિમને ગરબામાં સામેલ થવું હોય તો તેમને તિલક લગાવવામાં કોઈ મુશ્કેલી ન હોવી જોઈએ.
આધાર કાર્ડથી થશે ગરબામાં એન્ટ્રી
કાર્યક્રમના આયોજક સંતોષ સિંહે કહ્યું કે આ વખતે ગરબા દરમિયાન સુરક્ષાની વિશેષ વ્યવસ્થા કરવામાં આવશે. કાર્યક્રમમાં એન્ટ્રી પહેલાં લોકોના આધાર કાર્ડ ચકાસવામાં આવશે. આ માટે ટીમ તહેનાત કરવામાં આવશે. સંપૂર્ણ તપાસ વિના કોઈને પ્રવેશ આપવામાં આવશે નહીં.
