હવે કોઈપણ ઉંમરે મળશે હેલ્થ ઈન્સ્યુરન્સ, સ્વાસ્થ્ય વિમાને લઈને મોટો નિર્ણય ?
IRDAI નવા નિયમો: વીમા ક્ષેત્રના નિયમનકાર IRDAI એ સ્વાસ્થ્ય વીમાને લઈને મોટો નિર્ણય લીધો છે. હવે 65 વર્ષથી વધુ ઉંમરના લોકો પણ હેલ્થ ઈન્સ્યોરન્સ પોલિસી લઈ શકશે. IRDA એ સ્વાસ્થ્ય વીમો લેવા માટેની વય મર્યાદા દૂર કરી છે. તેનાથી વૃદ્ધાવસ્થા દરમિયાન લોકોને તેમની સારવારમાં મોટી મદદ મળશે. હાલમાં, તમે મોટી ઉંમરે સ્વાસ્થ્ય વીમાનો લાભ મેળવી શકતા નથી.
ઇરડાએ મહત્તમ 65 વર્ષનો નિયમ હટાવી દીધો
IRDA એ મહત્તમ વય મર્યાદાને હટાવીને દરેક વ્યક્તિ માટે હેલ્થકેર સિસ્ટમનો ઉપયોગ કરવાનો માર્ગ સરળ બનાવ્યો છે. હવે કોઈપણ વ્યક્તિ સરળતાથી હેલ્થ ઈન્સ્યોરન્સ પ્લાન ખરીદી શકશે અને અચાનક સ્વાસ્થ્ય ખર્ચને સરળતાથી પાર પાડી શકાશે. જૂની માર્ગદર્શિકા હેઠળ, નવી સ્વાસ્થ્ય વીમા પોલિસી ફક્ત 65 વર્ષની ઉંમર સુધી જ ખરીદી શકાશે. IRDAના નવા નિયમો 1 એપ્રિલથી લાગુ થઈ ગયા છે. તેમના મતે હવે કોઈપણ ઉંમરે હેલ્થ ઈન્સ્યોરન્સ લઈ શકાય છે.
બીમારીથી પીડિત લોકોને સ્વાસ્થ્ય વીમો પણ મળશે
IRDAIએ તેના ગેઝેટ નોટિફિકેશનમાં કહ્યું છે કે વીમા કંપનીઓએ હવે એવી હેલ્થ ઈન્સ્યોરન્સ પ્રોડક્ટ્સ બનાવવાની રહેશે, જે તમામ ઉંમરના લોકોને લાગુ પડે. આ ઉપરાંત કંપનીઓએ વરિષ્ઠ નાગરિકો, વિદ્યાર્થીઓ, બાળકો અને માતૃત્વને ધ્યાનમાં રાખીને ઉત્પાદનો પણ લાવવા પડશે. IRDAએ કહ્યું છે કે કંપનીઓએ પહેલાથી જ કોઈપણ રોગથી પીડિત લોકોના હિસાબે વીમા પોલિસી લાવવી પડશે. IRDA એ સ્પષ્ટ કર્યું છે કે કંપનીઓ કેન્સર, હૃદય, કિડનીની સમસ્યા અને એઇડ્સ જેવી બીમારીઓથી પીડિત લોકોને સ્વાસ્થ્ય વીમો આપવાનો ઇનકાર કરી શકશે નહીં. આ ઉપરાંત, પોલિસી લેનારને પ્રીમિયમ ચૂકવવા માટે હપ્તાનો વિકલ્પ પણ આપવામાં આવશે.
આયુષ સારવારના કવરેજ પર કોઈ મર્યાદા રહેશે નહીં
IRDAના નવા નિયમો અનુસાર, જનરલ અને હેલ્થ ઈન્સ્યોરન્સ આપતી કંપનીઓ હવે ટ્રાવેલ પોલિસી પણ ઓફર કરી શકશે. ઉપરાંત, આયુષ સારવારના કવરેજ પર કોઈ મર્યાદા રહેશે નહીં. આયુર્વેદ, યોગ, નેચરોપેથી, યુનાની, સિદ્ધ અને હોમિયોપેથીમાં કોઈપણ કેપ વિના વીમાની રકમ સુધી કવરેજ ઉપલબ્ધ થશે. આ ઉપરાંત, બહુવિધ દાવાઓને પણ મંજૂરી આપવામાં આવી છે.
