SMPP Defence Contract Probe: રક્ષા ઉપકરણો બનાવતી કંપની SMPP વિવાદોમાં ઘેરાઈ ગઈ છે, જેના કારણે તેના તમામ વ્યાપારી સોદાઓની તપાસ કરવામાં આવી રહી છે. આ કંપનીનું નામ ₹500 કરોડના એક સોદા સાથે જોડાયેલા ભ્રષ્ટાચારના કેસમાં સામે આવ્યું છે. તેમાં સેના સાથે ચાલી રહેલા એવા કોન્ટ્રાક્ટ પણ સામેલ છે, જે હેઠળ હજુ સામાનની ડિલિવરી થવાની બાકી છે. સૂત્રો અનુસાર, સેના સાથે કંપનીના આશરે 10 કરાર ચાલી રહ્યા છે, જેમાં દારૂગોળો, લોઇટરિંગ મ્યુનિશન (હવામાં લાંબા સમય સુધી રહીને હુમલો કરતા હથિયારો), ગુપ્ત માહિતી એકત્રિત કરતા ડ્રોન અને સુરક્ષા ઉપકરણો સામેલ છે.
SMPPની મુશ્કેલીઓ વધી
આ ડિફેન્સ કોન્ટ્રાક્ટની કુલ કિંમત ₹2,000 કરોડથી વધુ છે, જેમાંથી કેટલાક પર આ જ વર્ષે હસ્તાક્ષર કરવામાં આવ્યા હતા. સેન્ટ્રલ બ્યૂરો ઑફ ઇન્વેસ્ટિગેશન (CBI) અનુસાર, કંપનીનું ટોચનું મેનેજમેન્ટ કથિત રીતે જાહેર ક્ષેત્રની કંપની ‘મ્યુનિશન્સ ઇન્ડિયા લિમિટેડ’ના એક અધિકારીને લાંચ આપવામાં સામેલ હતું, જેથી ₹500 કરોડનો ઑર્ડર મેળવી શકાય.
SMPP વિશે જાણો
SMPPએ શરૂઆતમાં પલ્પ પેકેજિંગ કંપની તરીકે કામ શરૂ કર્યું હતું. હવે CBIની FIRમાં તેનું નામ નોંધાયેલું હોવાથી, રક્ષા મંત્રાલય સાથેના તેના તમામ વ્યાપારી સોદાઓ પર સ્થગિતતાનો સામનો કરવો પડી રહ્યો છે.
કંપની પર શું આરોપો છે
રક્ષા કોન્ટ્રાક્ટ સાથે જોડાયેલા ₹500 કરોડના એક સોદામાં ભ્રષ્ટાચારના આરોપોને લઈને SMPPની તપાસ ચાલી રહી છે. કંપની પર આરોપ છે કે તેણે પોતાનાં ઉપકરણોમાં પશ્ચિમી દેશોના ભાગોને બદલે સસ્તા ચીની ભાગો લગાવી દીધા છે. આ આરોપોને કારણે ભારતીય સેના સાથેના કંપનીના ₹2,000 કરોડથી વધુ મૂલ્યના વર્તમાન કોન્ટ્રાક્ટની સમીક્ષા કરવામાં આવી રહી છે. રક્ષા મંત્રાલયની એક સમિતિ વર્તમાન માર્ગદર્શિકાઓના આધારે આ કોન્ટ્રાક્ટના ભવિષ્ય અંગે નિર્ણય લેશે.
શું સશસ્ત્ર દળો સાથેના કંપનીના કોન્ટ્રાક્ટ રદ થશે?
સૂત્રોએ જણાવ્યું કે નિયમો અનુસાર, સશસ્ત્ર દળો સાથેના કંપનીના તમામ વર્તમાન ખરીદી કોન્ટ્રાક્ટમાંથી તેને દૂર કરવામાં આવશે. તેમાં એવા કરારો પણ સામેલ છે, જેના માટે સ્પર્ધાત્મક પ્રક્રિયા બાદ કંપનીને પહેલેથી જ શૉર્ટલિસ્ટ કરવામાં આવી હતી. સશસ્ત્ર દળો હવે આ કંપનીને કોઈ નવું ટેન્ડર અથવા માહિતી માટેની વિનંતી (RFI) મોકલશે નહીં, જેના કારણે તે સમગ્ર ખરીદી પ્રક્રિયામાંથી બહાર થઈ જશે. તેમણે વધુમાં જણાવ્યું કે વર્તમાન નિયમો હેઠળ એવા કેસોની પણ તપાસ થઈ રહી છે, જેમાં કોન્ટ્રાક્ટ પર હસ્તાક્ષર થઈ ચૂક્યા છે, પરંતુ ડિલિવરી થવાની બાકી છે.
ડિફેન્સ મંત્રાલય લેશે આગામી નિર્ણય
આવા કેસોમાં દરેક મામલાનો અલગથી વિચાર કરીને નિર્ણય લેવામાં આવશે. જે કોન્ટ્રાક્ટ પર હસ્તાક્ષર થઈ ચૂક્યા છે, પરંતુ ડિલિવરી પૂર્ણ થઈ નથી, તેમના ભવિષ્ય અંગે નિર્ણય લેવા માટે રક્ષા મંત્રાલય એક સમિતિની રચના કરી શકે છે. જે સિસ્ટમ્સની ડિલિવરી પહેલેથી થઈ ચૂકી છે, તેમાં જેટ-સંચાલિત ‘કામિકાઝે’ (આત્મઘાતી) ડ્રોન પણ સામેલ છે. તે ઉપકરણો કાર્યરત સ્થિતિમાં રહે તે માટે રક્ષા મંત્રાલય સ્પેર પાર્ટ્સ અને સેવાઓની ખરીદી ચાલુ રાખી શકે છે.
કોન્ટ્રાક્ટ બાદની માર્ગદર્શિકામાં શું નિયમો છે?
માર્ગદર્શિકામાં જણાવાયું છે કે ખરીદીના એવા કેસોમાં, જેમાં કોન્ટ્રાક્ટ પર હસ્તાક્ષર થઈ ગયા છે, પરંતુ કામ હજુ શરૂ થયું નથી, ત્યાં સંબંધિત વિભાગના સચિવ નક્કી કરી શકે છે કે કરાર આગળ વધારવો કે તેને રદ કરવો. આ સમગ્ર મામલે અમારા સહયોગી અખબાર ET દ્વારા ટિપ્પણી માગવામાં આવતાં SMPP તરફથી કોઈ જવાબ આપવામાં આવ્યો નહોતો.
