Supreme Court Highway Cattle Menace: દેશભરના નેશનલ હાઈવે અને સ્ટેટ હાઈવે પર રખડતા પશુઓની વધતી હાજરીથી થતા અકસ્માતો પર સુપ્રીમ કોર્ટે ગંભીર વલણ અપનાવ્યું છે. સર્વોચ્ચ અદાલતે સોમવારે કેન્દ્ર સરકાર, તમામ રાજ્યો, કેન્દ્રશાસિત પ્રદેશો અને ભારતીય પશુ કલ્યાણ બોર્ડ પાસેથી ચાર અઠવાડિયામાં જવાબ માંગ્યો છે.
કોર્ટે એવી પણ ટિપ્પણી કરી કે અનેક રાજ્યો 10 ટકા ‘ગૌ ઉપકર’ (Cow Cess) વસૂલી રહ્યા છે, પરંતુ જમીન પર કોઈ નક્કર કામ દેખાઈ રહ્યું નથી.
જસ્ટિસ વિક્રમ નાથ અને જસ્ટિસ સંદીપ મહેતાની બેન્ચ ‘લોયર્સ ફોર હ્યુમન રાઇટ્સ ઇન્ટરનેશનલ’ની અરજી પર સુનાવણી કરી રહી હતી. અરજીમાં માંગ કરવામાં આવી છે કે દેશભરમાં હાઈવે પર પશુઓની ઘૂસણખોરી રોકવા માટે સમાન રાષ્ટ્રીય ગાઈડલાઈન બનાવવામાં આવે અને તેનો ચુસ્તપણે અમલ કરવામાં આવે.
ફેન્સિંગ અને સજાની પણ માંગ
દાખલ કરવામાં આવેલી અરજીમાં રાષ્ટ્રીય ધોરીમાર્ગો અને એક્સપ્રેસ-વે પર, ખાસ કરીને અકસ્માત સંભવિત વિસ્તારોમાં, ફરજિયાત ફેન્સિંગ (વાડ) કરવાની માંગ કરવામાં આવી છે જેથી પશુઓની એન્ટ્રી રોકી શકાય. આ ઉપરાંત વૈજ્ઞાનિક પદ્ધતિથી સંચાલિત ગૌશાળાઓની સ્થાપના, તેમના માટે અલગ ફંડિંગ, અને પશુઓને ગેરકાયદેસર રીતે રખડતા મૂકનારાઓ પર સખત દંડાત્મક જવાબદારી નક્કી કરવાની પણ માંગ કરવામાં આવી છે.
રાષ્ટ્રીય નીતિની દિશામાં નક્કર પગલાં?
આ મામલો એવા સમયે આવ્યો છે, જ્યારે દેશમાં હાઈવે પર રખડતા પશુઓને કારણે થતા અકસ્માતો સતત ચિંતાનું કારણ બની રહ્યા છે. સુપ્રીમ કોર્ટની તાજેતરની કાર્યવાહીથી આશા જન્મી છે કે માર્ગ સલામતી અને પશુ વ્યવસ્થાપનને લઈને એક રાષ્ટ્રીય નીતિની દિશામાં નક્કર પગલાં ભરાઈ શકે છે.
