Asia Cup Controversy: એશિયા કપ 2025 દરમિયાન થયેલા વિવાદની સુનાવણી બાદ, આંતરરાષ્ટ્રીય ક્રિકેટ પરિષદ (ICC) એ પાકિસ્તાનના ફાસ્ટ બોલર હરિસ રૌફને બે મેચ માટે સસ્પેન્ડ કર્યો છે. તે હવે દક્ષિણ આફ્રિકા સામે ચાલી રહેલી ત્રણ મેચની ODI શ્રેણીની અંતિમ બે મેચ રમી શકશે નહીં. વધુમાં, રમતની વૈશ્વિક સંચાલક સંસ્થાએ ભારતીય T20 કેપ્ટન સૂર્યકુમાર યાદવ અને હરિસ રૌફને ICC આચાર સંહિતાનું ઉલ્લંઘન કરવા બદલ દોષિત ઠેરવ્યા અને તેમના પર નાણાકીય દંડ અને પ્રતિબંધો લાદ્યા. ભારત અને પાકિસ્તાન એશિયા કપ દરમિયાન ત્રણ વખત ટકરાયા. ભારતીય ટીમે એશિયા કપનો ખિતાબ જીતવા માટે ફાઇનલ મેચમાં પાકિસ્તાનને હરાવ્યું હતું, પરંતુ તેમને હજુ સુધી ટ્રોફી મળી નથી.
રૌફ પર બે મેચનો પ્રતિબંધ
ભારત સામેની બે અલગ-અલગ મેચમાં ICC આચાર સંહિતાનું બે વાર ઉલ્લંઘન કરવા બદલ પાકિસ્તાની બોલર હરિસ રૌફને તેની મેચ ફીના 30 ટકા દંડ ફટકારવામાં આવ્યો છે. તેના પર બે મેચ માટે પ્રતિબંધ મૂકવામાં આવ્યો છે, અને તે 4 અને 6 નવેમ્બરે દક્ષિણ આફ્રિકા સામેની ODI મેચ રમશે નહીં. રૌફને અગાઉ 14 સપ્ટેમ્બરે ભારત સામેની મેચમાં ICC આચારસંહિતાના કલમ 2.21 હેઠળ “રમતને બદનામ કરવા” બદલ દોષી ઠેરવવામાં આવ્યો હતો. તેને તેની મેચ ફીના 30 ટકા દંડ અને બે ડિમેરિટ પોઈન્ટ આપવામાં આવ્યા હતા. ત્યારબાદ તેને ભારત સામેની બીજી મેચમાં આ જ કલમના બીજા ઉલ્લંઘન બદલ 30 ટકા દંડ અને બે વધારાના ડિમેરિટ પોઈન્ટ મળ્યા હતા.
સૂર્યકુમારને દંડ
ભારતીય કેપ્ટન સૂર્યકુમાર યાદવને પણ ICC દ્વારા તેની મેચ ફીના 30 ટકા દંડ ફટકારવામાં આવ્યો છે. સૂર્યકુમારે મેચ પછી ભારતીય સેનાને સમર્થન અને પહેલગામ આતંકવાદી હુમલાના પીડિતો સાથે એકતા વ્યક્ત કરતા નિવેદન આપ્યું હતું, જેને “રમતને બદનામ કરનાર” માનવામાં આવતું હતું. વધુમાં, ભારતીય ફાસ્ટ બોલર જસપ્રીત બુમરાહને એક ડિમેરિટ પોઈન્ટ મળ્યો હતો, જ્યારે અર્શદીપ સિંહ અને પાકિસ્તાનના સાહિબજાદા ફરહાનને ચેતવણી આપવામાં આવી હતી. ICC એ જણાવ્યું હતું કે આ બધા ઉલ્લંઘનો લેવલ 1 હેઠળ આવે છે, જેમાં ખેલાડીની મેચ ફીના 50 ટકા સુધીનો મહત્તમ દંડ અને એક થી બે ડિમેરિટ પોઈન્ટનો સમાવેશ થાય છે.
