ભારતીય હોકી ટીમ ગ્રુપ સ્ટેજમાં અજેય, સેમિફાઇનલમાં ફરી દક્ષિણ કોરિયા સામે ટક્કર
Asian Champions Trophy 2026: એશિયન ચેમ્પિયન્સ ટ્રોફી 2026માં સોમવારે ભારતીય પુરુષ હોકી ટીમે દક્ષિણ કોરિયા સામે 8-0થી જીત મેળવી હતી. આ ટીમની છેલ્લી ગ્રુપ મેચ હતી. સતત પાંચમી જીત નોંધાવતાં યજમાન ટીમ ગ્રુપ સ્ટેજમાં અજેય રહી હતી. ભારત માટે દિલપ્રીત સિંહ (8′, 40′)એ બે ગોલ કર્યા હતા, જ્યારે જુગરાજ સિંહ (11′), હરમનપ્રીત સિંહ (15′), શિલાનંદ લાકડા (33′), સુખજીત સિંહ (34′), સંજય (36′) અને અંગદ બીર સિંહ (60′)એ એક-એક ગોલ કર્યો હતો.
સેમિફાઇનલમાં ભારતનો સામનો દક્ષિણ કોરિયા સામે જ
ભારત પાંચેય મેચમાં જીત સાથે પોઇન્ટ ટેબલમાં ટોચના સ્થાને રહ્યું હતું. બીજી તરફ, હાર છતાં કોરિયા છ પોઇન્ટ સાથે ચોથા સ્થાને રહ્યું અને સેમિફાઇનલમાં તેનો સામનો ફરી ભારત સામે થશે. બીજી સેમિફાઇનલમાં બીજા સ્થાને રહેલી જાપાનની ટીમ ત્રીજા સ્થાને રહેલા મલેશિયા સામે ટકરાશે. સેમિફાઇનલની મેચો 4 નવેમ્બરે અને મેડલ મેચો 5 નવેમ્બરે રમાશે.
INDIA FINISH THE LEAGUE STAGE UNBEATEN! 🇮🇳🔥
The hosts sign off from the League-Stage in emphatic fashion, registering a commanding 8-0 victory over Korea to make it five wins in five and finish unbeaten at the top of the table at the Hero Asian Champions Trophy Punjab 2026! 🏑💪
UP NEXT: The Semi-Final against Korea on Wednesday, November 4! 🇮🇳
#HockeyIsBack #HACT2026 #SatSriAkalAsia #IndiaKaGame
— Hockey India (@TheHockeyIndia) November 2, 2026
જાલંધરના ઓલિમ્પિયન સુરજીત સિંહ હોકી સ્ટેડિયમમાં ભારતે આક્રમક શરૂઆત કરી હતી. ચોથા મિનિટે સુખજીતે એક તક ઊભી કરી હતી, પરંતુ તેમનો બેકહેન્ડ શૉટ ગોલકીપર કિમ જેહ્યોને બચાવી લીધો હતો. આઠમી મિનિટે દિલપ્રીતે બેકહેન્ડ શૉટથી ગોલ કરીને ભારતનું ખાતું ખોલ્યું હતું. આ મૂવની શરૂઆત જુગરાજના એક એરિયલ પાસથી થઈ હતી. 11મી મિનિટે ભારતે પેનલ્ટી કોર્નર દ્વારા પોતાની સરસાઈ બમણી કરી હતી. 15મી મિનિટે હરમનપ્રીતે પેનલ્ટી કોર્નરને ગોલમાં ફેરવીને ભારતને પ્રથમ વિરામ સુધી 3-0ની સરસાઈ અપાવી હતી. હવે તે નવ ગોલ સાથે સૌથી વધુ ગોલ કરનારા ખેલાડીઓની યાદીમાં ટોચ પર છે.
ત્રીજા ક્વાર્ટરમાં ભારતે ચાર ગોલ કર્યા
બીજા ક્વાર્ટરમાં દક્ષિણ કોરિયાએ વધુ સારી રમત બતાવીને અનેક પેનલ્ટી કોર્નર મેળવ્યા હતા, પરંતુ ભારતીય ડિફેન્સે તેમને ગોલ કરતા અટકાવ્યા હતા. હાફ-ટાઇમ પછી ભારતે રમતની ગતિ વધારી હતી અને ત્રીજા ક્વાર્ટરમાં ચાર ગોલ કર્યા હતા. 33મી મિનિટે પેનલ્ટી કોર્નરના એક વેરિએશન પર શિલાનંદ લાકડાએ ગોલ કર્યો હતો. એક મિનિટ પછી સુખજીતે આદિત્યના પાસને બેઝલાઇન પરથી નેટમાં ડિફ્લેક્ટ કરીને સ્કોર 5-0 કર્યો હતો. 36મી મિનિટે સંજયની સ્ટિકથી ગોલ થયો હતો. ભારતનો સાતમો ગોલ 40મી મિનિટે થયો હતો, જ્યારે દિલપ્રીતે બોલને હળવો સ્પર્શ કરીને ગોલકીપરની પાર પહોંચાડ્યો હતો.
છેલ્લા ક્વાર્ટરમાં ભારતે રમતની ગતિ થોડી ધીમી કરી દીધી હતી. આ દરમિયાન કોરિયા પાસે થોડા સમય સુધી બોલ રહ્યો હતો, પરંતુ તેઓ કોઈ સ્પષ્ટ તક ઊભી કરી શક્યા નહોતા. ભારતે સમગ્ર રાઉન્ડ-રોબિન તબક્કામાં પોતાની આક્રમક ક્ષમતાનું શાનદાર પ્રદર્શન કર્યું હતું. ટીમે પાંચ મેચમાં કુલ 34 ગોલ કર્યા હતા અને માત્ર પાંચ ગોલ ખાધા હતા. ભારત 15 પોઇન્ટ અને +29ના ગોલ અંતર સાથે સ્ટેન્ડિંગમાં સૌથી ઉપર રહ્યું હતું. બીજી તરફ, જાપાન 10 પોઇન્ટ સાથે બીજા સ્થાને રહ્યું હતું, જ્યારે મલેશિયા નવ પોઇન્ટ અને કોરિયા છ પોઇન્ટ સાથે તેના પછીનાં સ્થાને રહ્યા હતા.
