પહેલા એન્ડમાં કાંટાની ટક્કર, કુમકુમે કર્યું કમાલ
ફાઇનલ મેચની શરૂઆતથી જ બંને ટીમો વચ્ચે જબરદસ્ત સ્પર્ધા જોવા મળી. પહેલા એન્ડના શરૂઆતના ત્રણ તીરોમાં ભારતે 28-26ની લીડ મેળવી લીધી હતી. જોકે, કીર્તિના 7 અંક પર નિશાન ચૂકી જવાથી ભારતનું પલ્લું થોડું હળવું થયું અને સ્કોર 54-54થી બરાબર થઈ ગયો. પરંતુ દબાણની આ ક્ષણે યુવા કુમકુમે બિલકુલ સચોટ 10નો સ્કોર બનાવીને સ્કોર બરાબર રાખ્યો, જેના કારણે પહેલો એન્ડ 1-1ની બરાબરી પર સમાપ્ત થયો.
બીજા એન્ડમાં પણ દબાણ રહ્યું યથાવત
બીજા એન્ડમાં કોરિયન ખેલાડીઓએ 10-9-9 સાથે 28 અંક બનાવ્યા. જવાબમાં ભારત તરફથી અંકિતાએ શાનદાર શરૂઆત કરતાં 10 અંક પર નિશાન સાધ્યું. કીર્તિના 8 પર ચૂક્યા બાદ ફરી એકવાર કુમકુમ સંકટમોચક બનીને સામે આવી અને 10 અંક સાધીને સ્કોર 28-28 કરી દીધો. બીજા રોટેશનમાં પણ કોરિયાએ ફરી 28 અંક મેળવ્યા. ભારત માટે અંકિતાએ ફરી એકવાર 10 લગાવ્યો અને કીર્તિના 8 બાદ કુમકુમે દબાણમાં ખૂબ જ સુંદર 10નો સ્કોર કરીને એન્ડને 56-56થી ટાઇ કરાવ્યો, જેના કારણે બે એન્ડ બાદ સ્કોર 2-2ની બરાબરી પર પહોંચી ગયો.
ત્રીજા એન્ડમાં કીર્તિની શાનદાર વાપસી
ત્રીજા એન્ડમાં ભારતીય ટીમે પોતાની રણનીતિ બદલતાં ઓર્ડરમાં ફેરફાર કર્યો. આ વખતે કીર્તિએ ભારત માટે શરૂઆત કરી અને અગાઉની ભૂલો સુધારતાં સીધું 10 પર નિશાન સાધ્યું. ત્યારબાદ અંકિતા અને કુમકુમે 9-9નો સ્કોર કર્યો, જેના કારણે ભારતને કોરિયાના 27 અંકની સરખામણીમાં 28-27ની નજીવી લીડ મળી.
ભારતે ઐતિહાસિક ગોલ્ડ પાક્કો કર્યો
આ પછી કોરિયન તીરંદાજો દબાણમાં આવી ગઈ અને પોતાની છેલ્લી ત્રણ કોશિશોમાં માત્ર 8-8-8ના સ્કોર જ કરી શકી. ભારત પાસે મુકાબલા પર સંપૂર્ણ પકડ બનાવવાની સુવર્ણ તક હતી. ભારતીય ત્રિપુટીએ કોઈ ભૂલ કરી નહીં અને 8, 9 અને 10નો સ્કોર બનાવીને ત્રીજો એન્ડ 55-51થી પોતાના નામે કરી લીધો. આ શાનદાર પ્રદર્શનના કારણે ભારતે ફાઇનલ મુકાબલામાં 4-2ની લીડ મેળવી અને એશિયન ગેમ્સનો ઐતિહાસિક ગોલ્ડ મેડલ પોતાના નામે કરી લીધો.
