G Kamalini Century: ભારતીય મહિલા ક્રિકેટ ટીમની બેટર જી કમલિનીએ ઘરેલુ ક્રિકેટમાં તોફાની સદી ફટકારી છે. હાલમાં સિનિયર મહિલા T20 ટ્રોફી રમાઈ રહી છે. જી કમલિની તમિલનાડુની ટીમનો ભાગ છે. લખનઉના ભારત રત્ન શ્રી અટલ બિહારી વાજપેયી એકાના ક્રિકેટ સ્ટેડિયમમાં કમલિનીએ 101 રનની ઇનિંગ રમી હતી. ગુજરાત સામેની આ મેચમાં તેમણે માત્ર 59 બોલનો સામનો કર્યો હતો અને 10 ચોગ્ગા ઉપરાંત 6 છગ્ગા ફટકાર્યા હતા.
જી કમલિની ભારતીય ટીમનો પણ ભાગ
18 વર્ષની ડાબોડી વિકેટકીપર બેટર જી કમલિનીનું પૂરું નામ ગુનાલન કામલિની છે. તેમનો જન્મ તમિલનાડુના મદુરાઈમાં થયો છે. 18 વર્ષની કમલિનીએ ભારત માટે 5 T20 ઇન્ટરનેશનલ મેચ રમી છે. તેઓ સપ્ટેમ્બરમાં એશિયા કપ જીતનારી ભારતીય ટીમનો ભાગ હતાં. એશિયન ગેમ્સ 2026ની મહિલા ક્રિકેટ સ્પર્ધામાં ભારતે ગોલ્ડ જીત્યો હતો. કમલિની તે ટીમનો પણ ભાગ રહી હતી. 5 T20 ઇન્ટરનેશનલ મેચમાં તેમના નામે 30 રન છે. મહિલા એશિયા કપ 2026ની ફાઇનલમાં જી કમલિનીએ છેલ્લાં બે બોલ પર ચોગ્ગો અને છગ્ગો ફટકાર્યો હતો. તેઓ મુખ્યત્વે ઓપનર છે, પરંતુ ટીમ ઇન્ડિયા માટે નીચલા ક્રમે બેટિંગ કરે છે.
જી કમલિની 2025 મહિલા અંડર-19 વિશ્વ કપની ટીમનો પણ ભાગ હતી. જ્યારે તેમણે આ સ્પર્ધામાં ભાગ લીધો હતો ત્યારે તેમની ઉંમર માત્ર 16 વર્ષની હતી. ભારતે આ સ્પર્ધા જીતી હતી. 7 મેચમાં કમલિનીએ 143 રન બનાવ્યા હતા. તેમની સરેરાશ 36 અને સ્ટ્રાઇક રેટ 105 રહ્યો હતો. આ દરમિયાન તેમના બેટમાંથી બે અડધી સદી નીકળી હતી.
WPL હરાજીમાં મળ્યા 40 લાખ રૂપિયા
વિમેન્સ પ્રીમિયર લીગ 2027ની હરાજીમાં જી કમલિનીનું નામ પણ સામેલ હતું. મુંબઈ ઇન્ડિયન્સે તેમને ટીમમાંથી મુક્ત કર્યા હતા. ડાબોડી બેટરને ગુજરાત જાયન્ટ્સે ખરીદી હતી. તેમને 40 લાખ રૂપિયા મળ્યા હતા. લીગની 2025ની સિઝન પહેલાં યોજાયેલી હરાજીમાં મુંબઈ ઇન્ડિયન્સે તેમને 1.6 કરોડ રૂપિયામાં ખરીદ્યાં હતાં. તે સમયે તેમની ઉંમર માત્ર 16 વર્ષની હતી.
