Highest ODI Final Run Chase: ક્રિકેટમાં ફાઇનલ મુકાબલાનું દબાણ અલગ જ હોય છે. ફાઇનલમાં દરેક ટીમ ઇચ્છે છે કે તે પહેલાં બેટિંગ કરે. ફાઇનલમાં લક્ષ્યાંકનો પીછો કરવાનું દબાણ પણ અલગ હોય છે. તેમ છતાં પાકિસ્તાને શ્રીલંકા સામે ટ્રાઇ સિરીઝની ફાઇનલમાં 326 રનનો લક્ષ્યાંક હાંસલ કરીને ખિતાબ જીત્યો. અમે તમને વનડેમાં ફાઇનલના સૌથી મોટા પાંચ રનચેઝ વિશે જણાવીએ છીએ.
ભારત- ઇંગ્લેન્ડ સામે 326 રન
2002માં ભારત અને ઇંગ્લેન્ડ વચ્ચે નેટવેસ્ટ સિરીઝની ફાઇનલ રમાઈ હતી. લોર્ડ્સના મેદાન પર 13 જુલાઈએ ઇંગ્લેન્ડે 325 રન બનાવ્યા હતા. સૌરવ ગાંગુલી, યુવરાજ સિંહ અને મોહમ્મદ કૈફે અડધી સદી ફટકારીને ભારતને બે વિકેટે જીત અપાવી હતી.
પાકિસ્તાન- શ્રીલંકા સામે 326 રન
પાકિસ્તાને વનડે ક્રિકેટની ફાઇનલમાં સૌથી મોટા રનચેઝના ભારતના રેકોર્ડની બરાબરી કરી લીધી છે. ટ્રાઇ સિરીઝની ફાઇનલમાં શ્રીલંકાએ 325 રન બનાવ્યા હતા. પાકિસ્તાને 49મી ઓવરમાં જ મેચ પોતાના નામે કરી લીધી હતી.
ભારત- પાકિસ્તાન સામે 315 રન
ભારત અને પાકિસ્તાન વચ્ચે 1998માં સિલ્વર જ્યુબિલી ઇન્ડિપેન્ડન્સ કપની ફાઇનલ રમાઈ હતી. બેસ્ટ ઓફ થ્રી ફાઇનલની અંતિમ મેચમાં ભારતને જીતવા માટે 315 રનનો લક્ષ્યાંક મળ્યો હતો. એક બોલ બાકી હતો ત્યારે ભારતે મેચ જીતીને ખિતાબ પોતાના નામે કરી લીધો હતો.
વેસ્ટ ઇન્ડિઝ- પાકિસ્તાન સામે 285 રન
1993માં પેપ્સી ચેમ્પિયન્સ ટ્રોફીની ફાઇનલ પાકિસ્તાન અને વેસ્ટ ઇન્ડિઝ વચ્ચે શારજાહમાં રમાઈ હતી. પાકિસ્તાને ચાર વિકેટે 284 રન ફટકાર્યા હતા. બ્રાયન લારાના બેટમાંથી 153 રનની ઇનિંગ આવી હતી અને વેસ્ટ ઇન્ડિઝે 46મી ઓવરમાં જ ખિતાબ જીતી લીધો હતો.
ન્યૂઝીલેન્ડ- ભારત સામે 277 રન
ભારત અને ન્યૂઝીલેન્ડ વચ્ચે 2005માં હરારેમાં ટ્રાઇ સિરીઝની ફાઇનલ રમાઈ હતી. ભારતે પહેલાં બેટિંગ કરતાં 276 રન બનાવ્યા હતા. મોહમ્મદ કૈફે 93 રન ફટકાર્યા હતા. નાથન એસ્ટલની સદીની મદદથી ન્યૂઝીલેન્ડે મેચ જીતી લીધી હતી.
