Matt Renshaw Test Century: દક્ષિણ આફ્રિકા સામે ડરબનના કિંગ્સમીડ સ્ટેડિયમમાં રમાઈ રહેલી ત્રણ ટેસ્ટ મેચની શ્રેણીની પ્રથમ મેચમાં ઑસ્ટ્રેલિયાના બેટ્સમેન મૅટ રેનશૉએ એક ઐતિહાસિક સિદ્ધિ પોતાના નામે કરી છે. ડાબા હાથના આ બેટ્સમેને મુશ્કેલીના સમયે 204 બૉલમાં સદી ફટકારીને ઑસ્ટ્રેલિયાની ટીમને મજબૂત સ્થિતિમાં પહોંચાડી દીધી. નવેમ્બર 2016માં દક્ષિણ આફ્રિકા સામે જ પોતાની ટેસ્ટ કારકિર્દીની શરૂઆત કરનારા રેનશૉ, છેલ્લાં 12 વર્ષમાં દક્ષિણ આફ્રિકાની ધરતી પર ટેસ્ટ સદી ફટકારનારા પ્રથમ ઑસ્ટ્રેલિયન બેટ્સમેન બની ગયા છે.
2014 પછી દક્ષિણ આફ્રિકામાં કોઈ ઑસ્ટ્રેલિયનની પ્રથમ સદી
મૅટ રેનશૉ પહેલાં દક્ષિણ આફ્રિકાની ધરતી પર ટેસ્ટ સદી ફટકારનારા છેલ્લાં ઑસ્ટ્રેલિયન બેટ્સમેન ડેવિડ વૉર્નર હતા. વૉર્નરે માર્ચ 2014માં કેપટાઉન ટેસ્ટની બીજી ઇનિંગમાં 145 રનની શાનદાર ઇનિંગ રમી હતી. રેનશૉની આ સદીની ઇનિંગે દક્ષિણ આફ્રિકામાં ઑસ્ટ્રેલિયન બેટ્સમેનોની સદીના લાંબા દુષ્કાળનો આખરે અંત લાવી દીધો છે.
9 વર્ષ બાદ કારકિર્દીની બીજી ટેસ્ટ સદી
આ રેનશૉની ટેસ્ટ કારકિર્દીની બીજી સદી છે. ખાસ વાત એ છે કે તેમની પ્રથમ ટેસ્ટ સદી જાન્યુઆરી 2017માં સિડની (SCG)માં પાકિસ્તાન સામે આવી હતી, જ્યાં તેમણે ઓપનિંગ કરતાં 293 બૉલમાં 184 રન બનાવ્યા હતા. હવે લગભગ 9 વર્ષના લાંબા અંતરાલ બાદ તેમણે મધ્યક્રમમાં બેટિંગ કરતાં આ બીજી સદી ફટકારી છે.
ડરબનમાં સદી ફટકારનારા પસંદગીના દિગ્ગજોની યાદીમાં સામેલ
ડરબનના ઐતિહાસિક કિંગ્સમીડ સ્ટેડિયમમાં સદી ફટકારનારા રેનશૉ માત્ર 10મા ઑસ્ટ્રેલિયન બેટ્સમેન બની ગયા છે. આ પહેલાં આ મેદાન પર સદી બનાવનારા છેલ્લા ઑસ્ટ્રેલિયન બેટ્સમેન ભૂતપૂર્વ દિવંગત ક્રિકેટર ફિલ હ્યુઝ હતા, જેમણે માર્ચ 2009માં ડરબન ટેસ્ટની બીજી ઇનિંગમાં 160 રન બનાવ્યા હતા.
