Sheetal Devi Wins 2 Gold Medal: એશિયન પેરા ગેમ્સ 2026માં ભારતની શીતલ દેવીએ શાનદાર પ્રદર્શન કર્યું છે. તેમણે થોડા કલાકોના અંતરમાં 2 ગોલ્ડ મેડલ જીતીને પેરા આર્ચરીમાં પોતાનું નામ સુવર્ણ અક્ષરોમાં નોંધાવી દીધું છે. આ પહેલાં તેમણે આ જ સ્પર્ધામાં વર્લ્ડ રેકોર્ડ બનાવ્યો હતો અને 720માંથી 704 પોઈન્ટ મેળવ્યા હતા. શીતલ દેવીએ પેરા કમ્પાઉન્ડ આર્ચરીની ફાઇનલ ઇવેન્ટમાં 142નો સ્કોર કરીને ગોલ્ડ મેડલ પોતાના નામે કર્યો. સિંગાપોરની અલીમ નૂર સ્યાહિદાહે 139નો સ્કોર મેળવ્યો અને તે બીજા સ્થાને રહી. શીતલ આ પહેલાં 149નો સ્કોર મેળવીને વર્લ્ડ રેકોર્ડ બનાવી ચૂકી છે. તેમણે 20 ઑક્ટોબરે 149નો સ્કોર કરીને એશિયન ગેમ્સમાં પણ નવો રેકોર્ડ બનાવ્યો હતો અને આ તેમનો શ્રેષ્ઠ સ્કોર પણ હતો.
શીતલ દેવીએ ગુરુવારે પહેલાં તોમર કુમાર સાથે મળીને ગોલ્ડ મેડલ જીત્યો હતો. મિક્સ્ડ ઇવેન્ટ બાદ તેમણે સિંગલ ઇવેન્ટમાં પણ ગોલ્ડ જીત્યો અને થોડા કલાકોના અંતરમાં દેશને બે ગોલ્ડ મેડલ અપાવીને મેડલ ટેબલમાં ભારતની સ્થિતિ મજબૂત કરી. આ પહેલાં તેઓ પાયલ સાથે મળીને સિલ્વર મેડલ પણ જીતી ચૂકી છે.
તોમર કુમાર સાથે મળીને જીત્યો ગોલ્ડ
શીતલ દેવી અને તોમર કુમારે કમ્પાઉન્ડ મિક્સ્ડ ટીમમાં ગોલ્ડ જીત્યો. ભારતની આ જોડીએ ઇન્ડોનેશિયાની જોડીને 151-148થી હરાવી. પેરા એશિયન ગેમ્સની વર્તમાન આવૃત્તિમાં તીરંદાજીમાં ભારતને પ્રથમ ગોલ્ડ મળ્યો. આઇચી-નાગોયા ગેમ્સમાં શીતલે ત્રણ મેડલ જીત્યા છે. સૌથી પહેલાં તેમણે પાયલ નાગ સાથે પેરા કમ્પાઉન્ડ મહિલા ડબલ્સમાં સિલ્વર મેડલ જીત્યો હતો. ત્યારબાદ તોમર સાથે ગોલ્ડ અને હવે સિંગલ ઇવેન્ટમાં ગોલ્ડ જીત્યો છે.
એક પછી એક તમામ રેકોર્ડ તોડી રહી છે શીતલ
શીતલ અને તોમર કુમારે મિક્સ્ડ ટીમ રાઉન્ડમાં નવો વર્લ્ડ રેકોર્ડ બનાવ્યો. આ 18 વર્ષની ખેલાડીએ સંભવિત 720માંથી 704 પોઈન્ટ મેળવ્યા, જે તુર્કિયેની ઓજનુર ક્યુરે ગિર્દીની વર્લ્ડ રેકોર્ડની બરાબરી કરે છે. શીતલે માર્ચમાં બેંગકોકમાં બનાવેલા પોતાના 698ના એશિયન રેકોર્ડમાં પણ 6 પોઈન્ટનો સુધારો કર્યો અને એશિયન પેરા ગેમ્સનો રેકોર્ડ 680થી વધારીને 704 કરી દીધો. વર્તમાન વર્લ્ડ ચેમ્પિયન અને વિશ્વની નંબર એક ખેલાડી શીતલે કુમાર સાથે મળીને મિક્સ્ડ ટીમ ક્વોલિફિકેશનમાં 1402 પોઈન્ટ મેળવ્યા, જેના કારણે ભારતે જ બનાવેલો અગાઉનો 1400 પોઈન્ટનો વર્લ્ડ રેકોર્ડ તૂટી ગયો.
એશિયન પેરા ગેમ્સમાં શીતલની સફર
કમ્પાઉન્ડ ઇન્ડિવિજ્યુઅલમાં વર્તમાન ચેમ્પિયન શીતલે સોમવારે એશિયન પેરા ગેમ્સ આઇચી-નાગોયા 2026ના અભિયાનની શાનદાર શરૂઆત કરી અને કમ્પાઉન્ડ મહિલા ક્વોલિફિકેશનમાં વર્લ્ડ રેકોર્ડની બરાબરી કરી. ત્યારબાદ તેમણે કમ્પાઉન્ડ મહિલા ડબલ્સ ક્વોલિફિકેશનમાં પાયલ સાથે ટીમ બનાવી. તેમના કુલ 1379ના સ્કોરથી નવા એશિયન અને ગેમ્સ રેકોર્ડ બન્યા. પાયલે 675 પોઈન્ટનું યોગદાન આપ્યું, જેના કારણે ભારતીય જોડી મહિલા ડબલ્સ રેન્કિંગમાં ટોચ પર પહોંચી.
2023માં પણ કર્યું હતું શાનદાર પ્રદર્શન
શીતલે હાંગઝોઉમાં 2023ની એશિયન પેરા ગેમ્સમાં મહિલા કમ્પાઉન્ડ ઇન્ડિવિજ્યુઅલ ઇવેન્ટમાં ગોલ્ડ જીત્યો હતો અને ત્યારબાદ 2024માં પેરિસ પેરાલિમ્પિક્સમાં બ્રોન્ઝ મેડલ જીત્યો હતો. તેમણે વર્લ્ડ ચેમ્પિયનનો દરજ્જો પણ મેળવ્યો છે, જેના કારણે નાની ઉંમર હોવા છતાં તેમણે આ રમતના ટોચના ખેલાડીઓમાં પોતાનું સ્થાન બનાવ્યું છે.
