Virat Kohli Test Record: વિરાટ કોહલીએ ટેસ્ટ ક્રિકેટમાંથી સન્યાસ લઈ લીધો છે. રોહિત શર્માની નિવૃતિના થોડા દિવસો પછી રેડ બોલ ફોર્મેટને અલવિદા કહી દીધું છે. હવે એક એવો સમય આવી ગયો છે કે, જ્યારે T20 અને ટેસ્ટ, હાલમાં બંન્ને ફોર્મેટમાં રોહિત અને વિરાટની જોડી જોવા નહીં મળે. 36 વર્ષીય કોહલીનું ટેસ્ટ કરિયર જૂન 2011માં શરુ થયું અને પોતાના 14 વર્ષ લાંબા કરિયરમાં તેમણે અનેક રેકોર્ડ તોડ્યા છે. આવો જાણીએ વિરાટના રેડ બોલ ક્રિકેટમાં કેટલાક શાનદાર રેકોર્ડ વિશે…
ભારતીય કેપ્ટન તરીકે સૌથી વધુ સદી ફટકારી
ટેસ્ટ ક્રિકેટમાં કેપ્ટન તરીકે વિરાટ કોહલી સૌથી વધારે સદી ફટકારનારો ખેલાડી રહ્યો છે. વિરાટે 68 ટેસ્ટ મેચોમાં ટીમ ઈન્ડિયાનું નેતૃત્વ કર્યું હતું. જેમાં તેમણે 20 ઈનિંગ્સમાં સદી ફટકારી છે. ભારતીય કેપ્ટન તરીકે સૌથી વધુ સદી ફટકારનારા ખેલાડીની યાદીમાં બીજા નંબરે સુનિલ ગાવસ્કર છે, જેમણે કેપ્ટન તરીકે 11 સદી ફટકારી હતી.
ભારતીય દ્વારા સૌથી વધુ બેવડી સદીઓ
વિરાટ કોહલી ટેસ્ટ ફોર્મટમાં કોઈ ભારતીય દ્વારા સૌથી વધુ બેવડી સદી ફટકારનાર ખેલાડી છે. તેમણે પોતાના 14 વર્ષના રેડ બોલ કરિયરમાં 7 ડબલ સેન્ચુરી ફટકારી છે. તેમણે છેલ્લે બેવડી સદી 2019માં દક્ષિણ આફ્રિકા સામે ફટકારી હતી. સચિન તેંડુલકર અને વીરેન્દ્ર સહેવાગ બંન્નેએ ટેસ્ટમાં 6-6 બેવડી સદી ફટકારી છે.
ટેસ્ટમાં ભારતના સૌથી સફળ કેપ્ટન
વિરાટ કોહલીએ સૌરવ ગાંગુલી, મોહમ્મદ અજહરુદ્દીન અને એમએસ ધોની જેવા દિગ્ગજ કેપ્ટનોને પરાસ્ત કર્યા છે. વિરાટ કોહલીએ ટેસ્ટમાં ભારતના સૌથી સફળ કેપ્ટન રહ્યા છે. તેમના નેતૃત્વમાં ટીમ ઈન્ડિયાએ 68 ટેસ્ટ મેચોમાં 40 પર જીત મેળવી હતી. તેમના નેતૃત્વમાં ભારતની જીત 58.82 ટકા કહેવામાં આવી રહી છે. 10 થી વધુ ટેસ્ટ મેચોમાં ટીમ ઈન્ડિયાની કેપ્ટનશીપ કરનાર ખેલાડીઓમાં વિરાટની જીત સૌથી વધુ છે.
વિદેશી ટેસ્ટમાં ચાર સદી ફટકારનાર પહેલો ભારતીય
વિરાટ કોહલી વિદેશ પ્રવાસ પર ચાર સદી ફટકારનાર પહેલા ભારતીય ખેલાડી છે. તેમણે 2014-15માં ઓસ્ટ્રેલિયા પ્રવાસમાં 4 સદી ફટકારી હતી. આ સિવાય તેમણે 2016-17માં ઈંગ્લેન્ડ સિરીઝમાં પણ ચાર સદીની ઇનિંગ્સ રમી હતી.
ટેસ્ટમાં ચોથા સૌથી વધુ રન કરનારા ભારતીય
ટેસ્ટ ક્રિકેટના ઈતિહાસમાં વિરાટ કોહલી ચોથા સૌથી વધુ રન બનાવનારા ભારતીય ખેલાડી રહ્યા છે. તેમણે પોતાના કરિયરમાં 123 ટેસ્ટ મેચોમાં 9230 રન ફટકાર્યા છે. આ યાદીમાં તેમની ઉપર માત્ર સચિન તેંડુલકર, રાહુલ દ્રવિડ અને સુનિલ ગાવસ્કર રહ્યા છે.
