West Indies Champions 2026: વર્લ્ડ ચેમ્પિયનશિપ ઑફ લેજન્ડ્સ 2026ની ખિતાબી મેચમાં વેસ્ટ ઇન્ડિઝ ચેમ્પિયન્સે શાનદાર પ્રદર્શન કરીને ઇંગ્લેન્ડ ચેમ્પિયન્સને 9 વિકેટે હરાવીને ટ્રોફી પર કબજો કર્યો. રવિવાર, 18 ઑક્ટોબરે રમાયેલી આ ફાઇનલ મેચમાં ઇંગ્લેન્ડ ચેમ્પિયન્સે પ્રથમ બેટિંગ કરીને 160 રનનો લક્ષ્યાંક આપ્યો હતો. તેના જવાબમાં વેસ્ટ ઇન્ડિઝ ચેમ્પિયન્સે તોફાની બેટિંગના જોરે માત્ર 17 ઓવરમાં 1 વિકેટ ગુમાવીને 165 રન બનાવ્યા અને એકતરફી જીત મેળવી.
લેન્ડલ સિમન્સ અને ચેડવિક વૉલ્ટનની તોફાની અડધી સદી, 17 ઓવરમાં લક્ષ્યાંક હાંસલ કર્યો
160 રનના લક્ષ્યાંકનો પીછો કરવા ઉતરેલી વેસ્ટ ઇન્ડિઝ ચેમ્પિયન્સની શરૂઆત ધમાકેદાર રહી હતી. ઓપનર બેટર લેન્ડલ સિમન્સ અને ચેડવિક વૉલ્ટને ઇંગ્લેન્ડના બોલરોની જોરદાર ધોલાઈ કરી હતી. સિમન્સે 53 બોલમાં 8 ચોગ્ગા અને 3 છગ્ગાની મદદથી 77 રનની શાનદાર ઇનિંગ રમી હતી. બીજી તરફ, ચેડવિક વૉલ્ટને 35 બોલમાં 3 ચોગ્ગા અને 4 છગ્ગા ફટકારીને 58 રન બનાવ્યા હતા. યુનિવર્સ બૉસ ક્રિસ ગેઇલે પણ 14 બોલમાં 21 રન (1 ચોગ્ગો, 2 છગ્ગા)નું યોગદાન આપ્યું હતું. ઇંગ્લેન્ડ તરફથી એકમાત્ર વિકેટ અજમલ શહઝાદે લીધી હતી.
મોઇન અલીની અડધી સદી વ્યર્થ, ડ્વેન બ્રાવોની સ્પિનમાં ફસાયું ઇંગ્લેન્ડ
આ પહેલાં ટૉસ હારીને બેટિંગ કરવા ઉતરેલી ઇંગ્લેન્ડ ચેમ્પિયન્સ તરફથી કેપ્ટન મોઇન અલીએ 39 બોલમાં 4 ચોગ્ગા અને 4 છગ્ગાની મદદથી 60 રનની કેપ્ટન ઇનિંગ રમી હતી. તેમના સિવાય ઓવૈસ શાહે 38 રન અને રવિ બોપારાએ 16 રનનું યોગદાન આપ્યું હતું, જ્યારે જેસન રૉય (7), ફિલ મસ્ટર્ડ (5) અને ડેવિડ મલાન (2) સસ્તામાં પેવેલિયન પરત ફર્યા હતા. વેસ્ટ ઇન્ડિઝ માટે સ્ટાર ઑલરાઉન્ડર ડ્વેન બ્રાવોએ ઘાતક બોલિંગ કરતાં 4 ઓવરમાં માત્ર 21 રન આપીને 3 મહત્ત્વપૂર્ણ વિકેટ ઝડપી હતી. આ ઉપરાંત ફિડેલ એડવર્ડ્સ, શેલ્ડન કૉટ્રેલ, રેમન રીફર અને કાર્લોસ બ્રેથવેઇટને 1-1 વિકેટ મળી હતી.
બ્રાવો પ્લેયર ઑફ ધ મેચ, જ્યારે વૉલ્ટન પ્લેયર ઑફ ધ સિરીઝ બન્યો
ખિતાબી મુકાબલામાં પોતાની કરકસરભરી અને ધારદાર બોલિંગથી ઇંગ્લેન્ડની બેટિંગને મોટો ફટકો આપનારા ડ્વેન બ્રાવોને તેમના શાનદાર પ્રદર્શન (3/21) માટે પ્લેયર ઑફ ધ મેચ પસંદ કરવામાં આવ્યા હતા. બીજી તરફ, સમગ્ર ટૂર્નામેન્ટમાં બેટિંગથી સતત શાનદાર પ્રદર્શન કરનારા વેસ્ટ ઇન્ડિઝના સ્ટાર બેટર ચેડવિક વૉલ્ટનને પ્લેયર ઑફ ધ સિરીઝનો પુરસ્કાર આપવામાં આવ્યો હતો.
