West Indies Qualifier: 2027 ODI વર્લ્ડ કપ માટે સીધી એન્ટ્રી ચૂકી વેસ્ટઇન્ડીઝ, સતત બીજી વખત વધ્યું ટેન્શન
West Indies Qualifier: બે વખતની પૂર્વ વર્લ્ડ ચેમ્પિયન વેસ્ટઇન્ડીઝ ક્રિકેટ ટીમને ફરી એક મોટો ઝટકો લાગ્યો છે. કેરિબિયન ટીમ આગામી 2027 ODI વર્લ્ડ કપ માટે સીધી ક્વોલિફાય કરવામાં સંપૂર્ણપણે નિષ્ફળ રહી છે. ICC દ્વારા નક્કી કરાયેલી કટ-ઓફ તારીખ સુધી રેન્કિંગમાં ટોપ-8માં સ્થાન ન મેળવી શકવાના કારણે વેસ્ટઇન્ડીઝને સતત બીજા ODI વર્લ્ડ કપમાં મુખ્ય ટૂર્નામેન્ટમાં પહોંચવા માટે ક્વોલિફાયર મેચો રમવી પડશે.
આયર્લેન્ડ અને અફઘાનિસ્તાન સિરીઝ પર ટકેલી હતી આશા
વેસ્ટઇન્ડીઝના ભાગ્યનો નિર્ણય મોટા ભાગે અફઘાનિસ્તાન અને આયર્લેન્ડ વચ્ચે રમાઈ રહેલી પાંચ મેચોની ODI સિરીઝના પરિણામો પર આધારિત હતો. ગણિત એવું કહેતુ હતું કે જો આયર્લેન્ડની ટીમ અફઘાનિસ્તાનને 4-1 અથવા 5-0થી હરાવી દે, તો વેસ્ટઇન્ડીઝ પાસે ભારત સામે પોતાની બંને ODI મેચ જીતીને ટોપ-8માં સ્થાન મેળવવાની ગણિતીય તક રહેતી. જોકે, મેદાન પર પરિસ્થિતિઓ વેસ્ટઇન્ડીઝને અનુકૂળ રહી નહોતી.
આયર્લેન્ડને મળી શકી નથી જીત
અફઘાનિસ્તાન અને આયર્લેન્ડ વચ્ચેની સિરીઝની પ્રથમ ODI મેચ વરસાદના કારણે સંપૂર્ણપણે ધોવાઈ ગઈ હતી, જ્યારે બીજી મેચમાં અફઘાનિસ્તાને એકતરફી પ્રદર્શન કરતાં આયર્લેન્ડને 92 રનથી હરાવ્યું હતું. આ જીત સાથે અફઘાનિસ્તાને ICC રેન્કિંગમાં પોતાની સ્થિતિ ખૂબ જ મજબૂત બનાવી અને આઠમું સ્થાન પાક્કું કરી લીધું. પરિણામે, નવમા સ્થાને રહેલા બાંગ્લાદેશથી પણ ઘણું પાછળ રહેલી વેસ્ટઇન્ડીઝ માટે ટોપ-8ના તમામ દરવાજા સંપૂર્ણપણે બંધ થઈ ગયા.
2023 વર્લ્ડ કપ પણ રમી શકી નહોતી
સતત ઘટતા પ્રદર્શનના કારણે 2023ના ODI વર્લ્ડ કપમાં પણ વેસ્ટઇન્ડીઝની ટીમ ક્વોલિફાયર રાઉન્ડમાં હારીને બહાર થઈ ગઈ હતી અને ઇતિહાસમાં પ્રથમ વખત મુખ્ય વર્લ્ડ કપનો ભાગ બની શકી નહોતી. હવે 2027માં દક્ષિણ આફ્રિકા, ઝિમ્બાબ્વે અને નામિબિયાની સંયુક્ત યજમાનીમાં યોજાનારા વર્લ્ડ કપમાં સ્થાન મેળવવા માટે કેરિબિયન ટીમને ફરી એક વખત ક્વોલિફાયર તબક્કાના કઠિન પડકારમાંથી પસાર થવું પડશે.
