Zia Ur Rehman Record: અફઘાનિસ્તાનના 28 વર્ષીય સ્પિન ઑલરાઉન્ડર જિયા-ઉર-રહેમાને ઝિમ્બાબ્વે સામે શારજાહ ક્રિકેટ સ્ટેડિયમમાં રમાયેલી પ્રથમ ટેસ્ટ મેચ દરમિયાન ટેસ્ટ ક્રિકેટના 149 વર્ષના ઇતિહાસમાં એવો અનિચ્છનીય રેકોર્ડ પોતાના નામે કર્યો છે, જે કોઈ પણ બોલર ક્યારેય બનાવવા માગશે નહીં. અફઘાનિસ્તાનના સ્પિન આક્રમણની આગેવાની કરી રહેલા જિયા-ઉર-રહેમાને આ મેચની બંને ઇનિંગ્સમાં છૂટથી રન આપ્યા હતા અને તેઓ ટેસ્ટ ક્રિકેટના સૌથી મોંઘા બોલરોની યાદીમાં સામેલ થઈ ગયા છે.
બંને ઇનિંગ્સમાં 150થી વધુ રન આપ્યા
શારજાહ ટેસ્ટની પ્રથમ ઇનિંગ્સમાં જિયા-ઉર-રહેમાને 46 ઓવર બોલિંગ કરીને 7 મેડન સાથે 170 રન આપ્યા હતા અને 2 વિકેટ ઝડપી હતી. ત્યારબાદ બીજી ઇનિંગ્સમાં પણ તેમની બોલિંગમાં કોઈ ખાસ સુધારો જોવા મળ્યો નહોતો. તેમણે 50 ઓવરમાં 4 મેડન ફેંકીને 173 રન આપ્યા હતા અને 2 વિકેટ ઝડપી હતી. પોતાની કારકિર્દીની છઠ્ઠી ટેસ્ટ રમી રહેલા જિયા-ઉર-રહેમાન વિશ્વના પ્રથમ અને એકમાત્ર એવા બોલર બની ગયા છે, જેમણે એક જ ટેસ્ટ મેચની બંને ઇનિંગ્સમાં 150 કે તેથી વધુ રન આપ્યા હોય. વર્ષ 1877માં ઇંગ્લેન્ડ અને ઑસ્ટ્રેલિયા વચ્ચે રમાયેલી પ્રથમ ટેસ્ટથી લઈને અત્યાર સુધી ક્રિકેટના ઇતિહાસમાં આવું ક્યારેય બન્યું નહોતું.
96 ઓવરમાં 343 રન આપ્યા
આ મેચમાં જિયા-ઉર-રહેમાને કુલ 96 ઓવરમાં 4/343ના આંકડા નોંધાવ્યા હતા. ટેસ્ટ મેચના ઇતિહાસમાં આ ત્રીજા સૌથી મોંઘા બોલિંગ આંકડા છે. ટેસ્ટ મેચમાં 300થી વધુ રન આપવાની ઘટના અત્યાર સુધી ઇતિહાસમાં 7 વખત બની છે, પરંતુ જિયા-ઉર-રહેમાન આ તમામ બોલરોમાં એકમાત્ર એવા ખેલાડી છે, જેઓ આખી મેચમાં 5 વિકેટ પણ મેળવી શક્યા નથી.
સૌથી મોંઘી બોલિંગનો રેકોર્ડ કોના નામે છે?
જો ટેસ્ટ મેચની એક જ ઇનિંગ્સમાં સૌથી વધુ રન આપનારા બોલરોના ઇતિહાસ પર નજર કરીએ તો ઑસ્ટ્રેલિયાના ચક ફ્લિટવુડ-સ્મિથના નામે આ અનિચ્છનીય રેકોર્ડ નોંધાયેલો છે. ફ્લિટવુડ-સ્મિથે ઑગસ્ટ 1938માં ધ ઓવલ મેદાન પર ઇંગ્લેન્ડ સામે પ્રથમ ઇનિંગ્સમાં 87 ઓવર બોલિંગ કરીને 298 રન આપ્યા હતા.
આ યાદીમાં બીજા ક્રમે ભારતીય સ્પિનર રાજેશ ચૌહાણનું નામ આવે છે. રાજેશ ચૌહાણે ઑગસ્ટ 1997માં કોલંબોના આર. પ્રેમદાસા સ્ટેડિયમમાં શ્રીલંકાની ઐતિહાસિક વિશાળ ઇનિંગ્સ દરમિયાન 78 ઓવર બોલિંગ કરી હતી અને 276 રન આપીને માત્ર 1 વિકેટ મેળવી હતી. જિયા-ઉર-રહેમાનનું આ તાજેતરનું પ્રદર્શન હવે અત્યંત મોંઘી બોલિંગને કારણે ક્રિકેટ જગતમાં ચર્ચાનો વિષય બન્યું છે.
