Gen-Z AI Anxiety: AIનો વધતો ઉપયોગ છતાં Gen-Zમાં ચિંતા વધી, 73% યુવાનોને આગામી 20 વર્ષમાં નોકરીઓ ઘટવાનો ડર
Gen-Z AI Anxiety: મોટી ટેક કંપનીઓ આર્ટિફિશિયલ ઇન્ટેલિજન્સ (AI)નો ખૂબ પ્રચાર કરી રહી છે, પરંતુ યુવાનોની વિચારસરણી તેનાથી બિલકુલ અલગ છે. તાજેતરમાં આવેલા પ્યુ રિસર્ચ સેન્ટરના અહેવાલમાં ચોંકાવનારો ખુલાસો થયો છે. પ્યુ રિસર્ચ સેન્ટરે આર્ટિફિશિયલ ઇન્ટેલિજન્સ (AI) અંગે અમેરિકામાં એક સર્વે કર્યો હતો. આ સર્વેના ડેટામાં જાણવા મળ્યું છે કે અમેરિકામાં યુવાનો (Gen-Z) હવે તેના પ્રત્યે ઉત્સાહિત થવાને બદલે વધુ ચિંતિત છે. પ્યુના નવા સર્વે અનુસાર, 55% જેન-ઝી AIને લઈને ચિંતિત છે. તેનો અર્થ એ છે કે જે Gen-Zને નવી પેઢી તરીકે ઓળખવામાં આવે છે અને જે કોઈનાથી ડરતી નથી એવું કહેવાય છે, તેમનામાં પણ AIને લઈને ચિંતા સ્પષ્ટ જોવા મળી રહી છે.
55% જેન-ઝી ચિંતિત
પ્યુના નવા સર્વે અનુસાર, 18થી 29 વર્ષની ઉંમરના 55% અમેરિકનોનું કહેવું છે કે તેઓ ઉત્સાહિત થવાને બદલે વધુ ચિંતિત છે, જ્યારે માત્ર 11% લોકોનું કહેવું છે કે તેઓ ચિંતિત થવાને બદલે વધુ ઉત્સાહિત છે. આ પહેલાં 2021માં થયેલા સર્વેમાં 31% લોકો અને 2024માં 39% લોકોએ આ ચિંતા વ્યક્ત કરી હતી. પાંચ વર્ષ પહેલાં આ આંકડો 25% હતો. તેનો અર્થ એ છે કે જેન-ઝી હવે AIને લઈને ચિંતા વ્યક્ત કરી રહ્યા છે. આ એ જ જેન-ઝી છે, જે હાલમાં સૌથી વધુ AI ચેટબોટનો ઉપયોગ કરી રહ્યા છે અને તેમને જ AIને લઈને ચિંતા થઈ રહી છે.
73% લોકોને નોકરી જવાની ભીતિ
લોકોમાં એવી ચિંતા પણ છે કે AI આવનારા સમયમાં મોટી સંખ્યામાં તેમની નોકરીઓ છીનવી શકે છે. પ્યુ રિસર્ચ સેન્ટરના એ જ સર્વેમાં 30 વર્ષથી ઓછી ઉંમરના 73% લોકોનું કહેવું છે કે AIના કારણે આગામી 20 વર્ષમાં નોકરીઓ ઘટી જશે. 2024માં આ આંકડો 61% હતો. અમેરિકાના તમામ યુવાનોમાંથી 71% લોકો પણ એવું જ માને છે. રસપ્રદ વાત એ છે કે યુવાનો જ એ વયજૂથ છે, જે સૌથી વધુ ચેટબોટ ટૂલ્સનો ઉપયોગ કરે છે.
અનેક ક્ષેત્રોમાં વધતી ચિંતાની અસર
વધુ ઉપયોગ અને વધતી ચિંતાની આ અસર અન્ય સ્થળોએ પણ જોવા મળી રહી છે. ગેલપે શોધી કાઢ્યું છે કે 2025 પછીથી Gen Zનો ઉત્સાહ 14 પોઈન્ટ ઘટ્યો છે, જ્યારે ગુસ્સો 9 પોઈન્ટ વધ્યો છે. યુરોપિયન કમિશન, ઇન્ટરનેશનલ લેબર ઓર્ગેનાઇઝેશન અને Opeepl યૂથ પલ્સનો ડેટા પણ આ જ દિશા તરફ સંકેત કરે છે.
ભવિષ્યને લઈને ચિંતા
આ પરથી સમજાય છે કે ઘણી ટેક કંપનીઓ AIને માનવ પ્રગતિનું સૌથી મોટું માધ્યમ ગણાવીને તેનો ગમે તેટલો પ્રચાર કરે, પરંતુ વાસ્તવિક સ્થિતિ કંઈક અલગ જ કહી રહી છે. પ્યુ રિસર્ચ અને ગેલપના તાજેતરના આંકડા સ્પષ્ટ દર્શાવે છે કે યુવાનો (Gen-Z)નો AI પ્રત્યેનો ઉત્સાહ ઘટી રહ્યો છે. સૌથી મોટી વાત એ છે કે જે યુવાનો આ ચેટબોટ્સનો સૌથી વધુ ઉપયોગ કરી રહ્યા છે, તેઓ જ ભવિષ્યને લઈને સૌથી વધુ ભયભીત છે. તેમને પોતાના અભ્યાસ, કારકિર્દી અને નોકરીઓ પર સીધો ખતરો મંડરાતો દેખાઈ રહ્યો છે.
