Power Button on Right Side: સ્માર્ટફોનનો ઉપયોગ તો દરેક વ્યક્તિ કરે છે, પરંતુ શું તમે ક્યારેય વિચાર્યું છે કે ફોન્સમાં પાવર બટન હંમેશા જમણી બાજુ (Right Side) ઉપરથી થોડું નીચે જ કેમ આપવામાં આવે છે? આજકાલ કંપનીઓ અવનવી ડિઝાઇન સાથે ફોન લોન્ચ કરે છે, છતાં પાવર બટનની જગ્યા વર્ષોથી તે જ છે. આ કોઈ યોગાનુયોગ નથી, પરંતુ કંપનીઓએ ખૂબ જ સમજી-વિચારીને આ નિર્ણય લીધો છે.
જ્યારે પણ તમે ફોન હાથમાં પકડો છો, ત્યારે તમારો અંગૂઠો કુદરતી રીતે પાવર બટનની આસપાસ જ હોય છે. આનાથી ફોનની ગ્રીપ પણ સારી રહે છે અને ફોન લોક કે ઓફ કરવા માટે હાથ હટાવવો પડતો નથી. આ ઉપરાંત, ફોનની અંદર મધરબોર્ડ અને બેટરીની પોઝિશન પણ આ માટે જવાબદાર છે. ચાલો, આ વિશે વિગતે જાણીએ.
૧. મોટાભાગના લોકો જમણા હાથનો ઉપયોગ કરે છે
સૌથી મોટું અને મુખ્ય કારણ એ છે કે દુનિયાના લગભગ ૯૦% લોકો જમણા હાથથી (Right-handed) કામ કરે છે. જ્યારે તમે જમણા હાથમાં ફોન પકડો છો, ત્યારે તમારો અંગૂઠો આપોઆપ ફોનની જમણી બાજુએ ઉપરથી થોડો નીચે રહે છે. પાવર બટન ત્યાં રાખવાથી ફોનને ઓન/ઓફ કરવાનું સૌથી સરળ બની જાય છે.
૨. બીજા હાથનો ઉપયોગ કરવાની જરૂર પડતી નથી
સ્માર્ટફોનની સ્ક્રીન મોટી હોવાને કારણે બટન ટોપથી થોડું નીચે અને રાઇટ સાઇડમાં રાખવામાં આવે છે. જેથી તેનો ઉપયોગ કરવા માટે તમારે બીજા હાથની મદદ ન લેવી પડે. રાઇટ સાઇડમાં બટન હોવાથી તમે એક હાથે ફોનને મજબૂતીથી પકડીને પણ તેને ઓપરેટ કરી શકો છો.
૩. સરળતાથી સ્ક્રીનશોટ લઈ શકાય છે
મોટાભાગના એન્ડ્રોઇડ ફોનમાં વોલ્યુમ બટન અને પાવર બટન એવી રીતે સેટ કરવામાં આવ્યા હોય છે કે એક જ હાથની આંગળીઓ (અંગૂઠો અને તર્જની આંગળી) વડે સરળતાથી સ્ક્રીનશોટ લઈ શકાય.
૪. હાર્ડવેર ડિઝાઇન અને ખર્ચ
ફોનની અંદર બેટરી અવારનવાર વચ્ચેના ભાગમાં હોય છે અને સર્કિટને કિનારીઓ પર લગાવવામાં આવે છે. રાઇટ સાઇડ ઘણીવાર મધરબોર્ડની નજીક હોય છે, જેનાથી પાવર બટનની ‘ફ્લેક્સ કેબલ’ કનેક્ટ કરવી એન્જિનિયરો માટે સરળ અને કંપનીઓ માટે સસ્તી પડે છે.
૫. ફિંગરપ્રિન્ટ સેન્સર માટે સરળતા
આજકાલ ઘણા બજેટ અને મિડ-રેન્જ ફોનમાં પાવર બટન પર જ ફિંગરપ્રિન્ટ સેન્સર આપવામાં આવે છે. અંગૂઠો ફોન પકડતી વખતે હંમેશા રાઇટ સાઇડ પર જ રહેતો હોવાથી, ફોનને અનલોક કરવો ખૂબ જ ઝડપી અને સરળ બની જાય છે.
