Refurbished Smartphone Market India: ભારતમાં રિફર્બિશ્ડ સ્માર્ટફોનનું બજાર ઝડપથી વધી રહ્યું છે. તેનું કારણ સતત નવા સ્માર્ટફોનની વધતી કિંમતો છે. આના કારણે ગ્રાહકો ઓછા ભાવવાળા વિકલ્પો તરફ વળી રહ્યા છે. સાથે જ સેકન્ડ હેન્ડ સ્માર્ટફોનના ક્ષેત્રને પણ પ્રોત્સાહન મળી રહ્યું છે. લોકોમાં જૂના અથવા સેકન્ડ હેન્ડ iPhone આજકાલ વધુ પસંદગીનો વિકલ્પ બની રહ્યા છે. રિફર્બિશ્ડ ઇલેક્ટ્રોનિક્સ રિટેલર કંટ્રોલZના સ્થાપક અને CEO યુગ ભાટિયાએ જણાવ્યું કે તહેવારોની મોસમ દરમિયાન કંપનીના વેચાણમાં 100%નો વધારો થયો હતો, જેનું મુખ્ય કારણ iPhone 13, 14 અને 15 સિરીઝની માંગ હતી.
સૌથી વધુ વેચાયા 30,000થી 50,000 રૂપિયા સુધીના ફોન
ભાટિયાએ જણાવ્યું કે કંપની માટે 30,000થી 50,000 રૂપિયા સુધીની કિંમતવાળા ફોનનું વેચાણ સૌથી સારું રહ્યું અને આ શ્રેણીએ સૌથી ઉત્તમ પ્રદર્શન કર્યું. તેમનું કહેવું છે કે જ્યારે એન્ટ્રી લેવલના એન્ડ્રોઇડ ફોનની કિંમત લગભગ નવા જેવા દેખાતા iPhone જેટલી હોય છે, ત્યારે મોટાભાગના ખરીદદારો iPhone જ પસંદ કરે છે. તેમણે અંદાજ લગાવ્યો છે કે ભારતમાં વપરાયેલા સ્માર્ટફોનનું બજાર આશરે 5 કરોડ યુનિટનું છે, જેમાંથી 15-20% હિસ્સો iPhoneનો છે. ભાટિયાએ જણાવ્યું કે બજારમાં જૂના અથવા રિફર્બિશ્ડ ફોનની કોઈ અછત નથી, પરંતુ આ વ્યવસાયને યોગ્ય રીતે વ્યવસ્થિત કરવાની જરૂર છે, જેથી નાના શહેરોના લોકો પણ સરળતાથી આ ફોન ખરીદી શકે.
સૌથી વધુ સેમસંગના ફોન એક્સચેન્જ થયા
કેશિફાઇ (Cashify)એ જણાવ્યું કે 50,000 રૂપિયાથી વધુ કિંમતવાળા રિફર્બિશ્ડ સ્માર્ટફોનના વેચાણમાં બમણાથી પણ વધુ વધારો થયો છે. આ કિંમતની શ્રેણીમાં જૂના ડિવાઇસના બદલામાં નવું ડિવાઇસ ખરીદવાના કિસ્સાઓમાં પણ ચાર ગણાથી વધુ વધારો થયો છે.
ભારતનાં 6 મોટાં શહેરોમાં જૂનો ફોન આપીને નવો ફોન ખરીદવાના એટલે કે ટ્રેડ-ઇનના કિસ્સાઓમાં 39%નો વધારો થયો છે, જ્યારે ટિયર 3 એટલે કે નાનાં શહેરોમાં આ વધારો 49% સુધી પહોંચ્યો છે. પોતાનો જૂનો ફોન બદલીને નવો ફોન ખરીદવાની દોડમાં મોટોરોલામાં 79% અને ગૂગલમાં 74%નો વધારો થયો છે. જોકે, એકંદરે સૌથી વધુ સેમસંગના ફોન બદલવામાં આવ્યા અથવા ખરીદવામાં આવ્યા.
iPhone 17 જેવા નવા મોડલ પણ એક્સચેન્જ થઈ રહ્યા છે
લોકો હવે પોતાના જૂના ફોન ખૂબ જ ઝડપથી બદલીને નવા ફોન ખરીદી રહ્યા છે. કેશિફાઇના જણાવ્યા અનુસાર, લોકો iPhone 15, 16 અને 17 જેવા એકદમ નવા મોડલ પણ એક્સચેન્જ કરી રહ્યા છે, જેથી ફોનની સારી કિંમત મળી રહી હોય ત્યારે જ તેને બદલીને વધુ સારો ફોન ખરીદી શકાય.
