Bank Auction Property: ભારતના મોટાભાગના શહેરોમાં પ્રોપર્ટીની કિંમતો ઝડપથી વધી રહી છે. એવામાં સામાન્ય હોમબાયર માટે મોટું અને સારું ઘર ખરીદવું મુશ્કેલ બની રહ્યું છે. જોકે, થોડી જાણકારી સાથે તમે ઈચ્છો તો 2BHK ના ભાવમાં 3BHK નું ઘર પણ ખરીદી શકો છો. આ માટે તમારે માત્ર બેંક ઓક્શન પ્રોપર્ટી (બેંક હરાજીની મિલકત) વિશે જાણવાની જરૂર છે. ચાલો જાણીએ આ વિશે વિગતવાર-
બેંક ઓક્શન પ્રોપર્ટી શું હોય છે?
જ્યારે કોઈ વ્યક્તિ હોમ લોનની EMI સમયસર ચૂકવી શકતી નથી, ત્યારે બેંક તે પ્રોપર્ટી જપ્ત કરી લે છે. ત્યારબાદ બેંક તે ઘરને ઓક્શન (હરાજી) દ્વારા વેચે છે જેથી તે પોતાના બાકી નાણાં વસૂલ કરી શકે. આ પ્રોપર્ટીઝને જ બેંક ઓક્શન પ્રોપર્ટી કહેવામાં આવે છે અને તે અવારનવાર માર્કેટ રેટ કરતા ઓછી કિંમતે મળે છે.
કાનૂની પ્રક્રિયા કેવી રીતે હોય છે?
SARFAESI એક્ટ હેઠળ બેંક પહેલા લોન લેનારને બાકી રકમ ચૂકવવાની તક આપે છે. જો ચૂકવણી ન થાય, તો બેંક પ્રોપર્ટીને ઈ-ઓક્શનમાં લિસ્ટ કરે છે. ઓક્શનમાં એક ‘રિઝર્વ પ્રાઇસ’ નક્કી કરવામાં આવે છે, જે સામાન્ય રીતે બજારના ભાવ કરતા ઓછી હોય છે. સૌથી વધુ બોલી લગાવનાર ખરીદનાર બની જાય છે.
3BHK સસ્તું કેવી રીતે મળી જાય છે?
3BHK ફ્લેટની કિંમત વધારે હોવાને કારણે તેના ખરીદદારો ઓછા હોય છે. બીજી તરફ, 2BHK ની ડિમાન્ડ વધુ રહે છે, જેના કારણે તેના ભાવ ઊંચા રહે છે. આ જ કારણ છે કે ઓક્શનમાં ઘણી વખત મોટા ઘર સસ્તા મળી જાય છે.
ડીલ વિશે કેવી રીતે ખબર પડશે?
આ માટે તમારે પોતે બેંકની વેબસાઇટ્સ અને પ્રોપર્ટી પોર્ટલ્સ પર નજર રાખવી પડશે. અહીં તમે ઓક્શન લિસ્ટિંગ જોઈ શકો છો. બસ આ દરમિયાન લોકેશન, સાઈઝ અને આસપાસના રેટ્સની તુલના ચોક્કસ કરો. પ્રોપર્ટીની માર્કેટ વેલ્યુ જાતે તપાસવી ખૂબ જરૂરી છે.
આ વાતોનું પણ ધ્યાન રાખો
ઓક્શનમાં ભાગ લેવા માટે આશરે ૧૦% EMD (અર્નેસ્ટ મની ડિપોઝિટ) જમા કરાવવી પડે છે અને ઓક્શન જીત્યા પછી ૧૫-૩૦ દિવસમાં પૂરી રકમ ચૂકવવી પડે છે.
૫૦ લાખ રૂપિયાથી વધુની પ્રોપર્ટી પર ૧% TDS પણ આપવો પડે છે. ત્યારબાદ રજીસ્ટ્રેશન અને કબજો (પઝેશન) મળે છે.
બેંક ઓક્શન પ્રોપર્ટી ‘જેવી છે, જ્યાં છે’ તે ધોરણે મળે છે. એવામાં પ્રોપર્ટી ટેક્સ, સોસાયટીના લેણાં, વીજળી-પાણીના બાકી બિલો અને કાનૂની સ્થિતિની તપાસ ચોક્કસ કરી લો. ખરીદતા પહેલા એકવાર સાઈટ વિઝિટ જરૂર કરો અને કોઈ પ્રોપર્ટી વકીલની મદદ લો.
આ રીતે તમે યોગ્ય રિસર્ચ સાથે બેંક ઓક્શન દ્વારા લાખો રૂપિયાની બચત કરી શકો છો અને મોટું ઘર ઓછી કિંમતે મેળવી શકો છો.
