BRICS Iran US Israel Attack UAE: પશ્ચિમ એશિયામાં તણાવ ચરમસીમાએ છે. અમેરિકાના મરીન કમાન્ડો મોટી સંખ્યામાં ખાડી દેશોમાં પહોંચી રહ્યા છે, જેનાથી અણસાર મળી રહ્યા છે કે અમેરિકા ઈરાન પર મોટો જમીની હુમલો કરી શકે છે. આ દરમિયાન ઈરાની સૂત્રોએ દાવો કર્યો છે કે સંયુક્ત આરબ અમીરાત (UAE) આ યુદ્ધમાં અમેરિકા અને ઈઝરાયલને સક્રિય રીતે મદદ કરી રહ્યું છે. ઈરાને ધમકી આપી છે કે જો અમેરિકા જમીની સેના મોકલશે, તો તેના જવાબમાં UAE પર વ્યાપક હુમલો કરવામાં આવશે.
અમેરિકા હાલમાં ‘સ્ટ્રેટ ઓફ હોર્મુઝ’ (Strait of Hormuz) ને ખુલ્લી કરાવવા માટે જમીની હુમલાના વિકલ્પ પર વિચાર કરી રહ્યું છે. આ દરિયાઈ માર્ગ બંધ થવાને કારણે UAE અને ભારત સહિત સમગ્ર વિશ્વને ભારે મુશ્કેલી પડી રહી છે. જ્યારથી અમેરિકાએ ઈરાન પર હુમલો કર્યો છે, ત્યારથી તેહરાને UAE અને સાઉદી અરેબિયા પર સેંકડો મિસાઈલ અને ડ્રોન હુમલા કર્યા છે, જેનાથી આ દેશો વચ્ચે યુદ્ધ જેવી સ્થિતિ સર્જાઈ છે.
ભારત માટે મુશ્કેલ સ્થિતિ
ભારત હાલમાં બ્રિક્સ (BRICS) નું અધ્યક્ષ છે. ભારતે ઈરાન, UAE અને સાઉદી અરેબિયા – આ ત્રણેય સભ્ય દેશોને મે મહિનામાં યોજાનારી વિદેશ મંત્રીઓની બેઠક અને સપ્ટેમ્બરમાં યોજાનારા ૧૮મા બ્રિક્સ શિખર સંમેલન માટે આમંત્રણ મોકલ્યું છે.
ઈરાનની માંગ: ઈરાન સતત દબાણ કરી રહ્યું છે કે ભારત બ્રિક્સના મંચ પરથી અમેરિકા અને ઈઝરાયલના હુમલાની નિંદા કરે.
ભારતનું વલણ: ભારતે અત્યાર સુધી આ માંગ સ્વીકારી નથી, કારણ કે ઈરાન ભારતના નજીકના મિત્ર દેશો એવા UAE અને સાઉદી અરેબિયા પર પણ હુમલા કરી રહ્યું છે. ભારત માટે તેહરાન અને અબુધાબી વચ્ચે સહમતિ સાધવી એ લોઢાના ચણા ચાવવા જેવું સાબિત થઈ રહ્યું છે.
“પશ્ચિમ એશિયામાં ચાલી રહેલા સંઘર્ષ પર અમારી બ્રિક્સના સભ્ય દેશો સાથે વાતચીત જારી છે. આ સંઘર્ષમાં બ્રિક્સના કેટલાક સભ્ય દેશો સીધી રીતે સામેલ છે અને દરેકની અલગ-અલગ રાય છે. અમારા માટે આ મુદ્દે સર્વસંમતિ સાધવી ખૂબ જ કઠિન છે.” — રણધીર જાયસ્વાલ, ભારતીય વિદેશ મંત્રાલયના પ્રવક્તા
બ્રિક્સ (BRICS) માં કયા-કયા દેશો સામેલ છે?
વર્ષ ૨૦૨૬ માં અત્યારે બ્રિક્સમાં કુલ ૧૧ સભ્ય દેશો છે:
મૂળ સભ્યો: બ્રાઝિલ, રશિયા, ભારત, ચીન અને દક્ષિણ આફ્રિકા.
નવા પૂર્ણ સભ્યો: ઇજિપ્ત (Eygpt), ઈરાન, ઇથોપિયા, સાઉદી અરેબિયા, UAE અને ઇન્ડોનેશિયા.
સપ્ટેમ્બરમાં યોજાનારા સંમેલનમાં રશિયન રાષ્ટ્રપતિ વ્લાદિમીર પુતિન અને ચીની રાષ્ટ્રપતિ શી જિનપિંગ સહિતના શીર્ષ નેતાઓ ભારત આવે તેવી શક્યતા છે. રશિયાએ પણ આ બેઠકને આંતરરાષ્ટ્રીય એજન્ડા પર ચર્ચા કરવા માટેની મહત્વની તક ગણાવી છે.
