Iran Warship IRIS Dena Attack News: શ્રીલંકાના કિનારા પાસે હિંદ મહાસાગરમાં ઈરાની યુદ્ધ જહાજ IRIS-ડેના પર હુમલા પહેલા તેને ચેતવણી આપવામાં આવી હતી. ‘ઈરાન ઈન્ટરનેશનલ’ના રિપોર્ટમાં આ દાવો કરવામાં આવ્યો છે. તેમાં જણાવવામાં આવ્યું છે કે હુમલાના ઠીક પહેલા ઈરાની યુદ્ધ જહાજ પર સવાર એક નાવિકે ઈરાનમાં રહેતા પોતાના પરિવાર સાથે વાતચીત કરી હતી અને તેમને આ ચેતવણી વિશે જણાવ્યું હતું. અમેરિકી સબમરીને ગત બુધવારે, 4 માર્ચ ના રોજ શ્રીલંકાના ગાલેથી 19 નોટિકલ માઈલના અંતરે ટોર્પિડોથી હુમલો કરીને આ જહાજને ડુબાડી દીધું હતું.
આ હુમલામાં 80 થી વધુ ઈરાની નાવિકો માર્યા ગયા હતા, જ્યારે 32 નાવિકોને શ્રીલંકાની નૌકાદળ દ્વારા રેસ્ક્યૂ કરીને બચાવી લેવામાં આવ્યા હતા. રિપોર્ટ અનુસાર, આ હુમલામાં માર્યા ગયેલા એક નાવિકે થોડા સમય પહેલા જ તેના પિતાને ફોન પર જણાવ્યું હતું કે અમેરિકી સેનાએ ક્રૂને જહાજ છોડવા માટે ચેતવણી આપી હતી.
ઈરાની નૌસૈનિકે શું જણાવ્યું?
સૂત્રના જણાવ્યા અનુસાર, ઈરાની નૌસૈનિકે અંતિમ વાતચીતમાં તેના પિતાને જણાવ્યું હતું કે:
નેવી ફ્રિગેટ ‘ડેના’ના કમાન્ડરે જોખમ હોવા છતાં ક્રૂ મેમ્બર્સને જહાજ છોડવાની પરવાનગી આપવાનો ઇનકાર કર્યો હતો.
નાવિકના પિતાએ જણાવ્યું કે કમાન્ડરે આદેશ ન આપતા કેટલાક ક્રૂ મેમ્બર્સ અને કમાન્ડર વચ્ચે દલીલો પણ થઈ હતી.
અમેરિકી હુમલા બાદ બચેલા 32 નાવિકોમાં મોટાભાગના એવા હતા જેઓ લાઇફબોટ દ્વારા ભાગવામાં સફળ રહ્યા હતા.
અમેરિકા શ્રીલંકા પર દબાણ બનાવી રહ્યું છે
આ દરમિયાન એવી માહિતી સામે આવી છે કે અમેરિકાએ ઈરાની જહાજમાંથી બચાવવામાં આવેલા નાવિકોને લઈને શ્રીલંકા પર દબાણ લાવવાનું શરૂ કર્યું છે. અમેરિકી વિદેશ વિભાગના આંતરિક દસ્તાવેજો (કેબલ્સ) સૂચવે છે કે અમેરિકાએ શ્રીલંકાના સત્તાવાળાઓને ‘ડેના’ માંથી બચાવેલા 32 નાવિકોને ઈરાન પરત ન મોકલવા જણાવ્યું છે.
આ ઉપરાંત, આવી જ માંગ અન્ય ઈરાની યુદ્ધ જહાજ IRIS બૂશહર ને લઈને પણ કરવામાં આવી છે. હુમલાના બીજા દિવસે શ્રીલંકાએ માનવીય ધોરણે આ બીજા ઈરાની જહાજને તેના જળક્ષેત્રમાં આવવાની મંજૂરી આપી હતી. આ જહાજના 208 નાવિકો હાલ શ્રીલંકાની દેખરેખ હેઠળ છે.
