Nicolas Maduro Torture Charges: વેનેઝુએલાના પૂર્વ રાષ્ટ્રપતિ નિકોલસ માદુરો અને તેમની પત્ની સિલિયા ફ્લોરેસની કાનૂની મુશ્કેલીઓ ઓછી થવાનું નામ લઈ રહી નથી. અમેરિકાના ફેડરલ સરકારી વકીલો વેનેઝુએલાના પૂર્વ રાષ્ટ્રપતિ નિકોલસ માદુરો અને તેમની પત્ની સામે વધુ કડક કાર્યવાહી કરવાની તૈયારી કરી રહ્યા છે. તેમની સામે અમેરિકન નાગરિકોને યાતનાઓ આપવા અને પ્રતાડિત કરવાના નવા ફોજદારી આરોપો ઘડવાની તૈયારી કરવામાં આવી રહી છે. મીડિયા અહેવાલો અનુસાર, અમેરિકાનું ન્યાય વિભાગ આગામી દિવસોમાં આ અંગે સત્તાવાર આરોપનામું જાહેર કરી શકે છે. આ નવી કાનૂની કાર્યવાહી એવા સમયે થઈ રહી છે, જ્યારે માદુરો પહેલેથી જ ન્યૂયોર્કની જેલમાં નાર્કો-ટેરરિઝમ અને ડ્રગ્સની દાણચોરી જેવા ગંભીર કેસોનો સામનો કરી રહ્યા છે.
અમેરિકનો પર અત્યાચાર કરવાના નવા આરોપો શું છે?
સમાચાર અહેવાલો અને અમેરિકાની તપાસ એજન્સીઓના દસ્તાવેજો અનુસાર, આ નવા આરોપો તાજેતરનાં વર્ષોમાં વેનેઝુએલાની કસ્ટડીમાં રાખવામાં આવેલા એક ડઝનથી વધુ અમેરિકન નાગરિકો સાથે થયેલા ક્રૂર વર્તન અને ગેરકાયદેસર અટકાયત સાથે સંબંધિત છે. તપાસમાં સામેલ સૂત્રોનું કહેવું છે કે આ નવાં આરોપનામાં મુક્ત કરાયેલા અમેરિકન કેદીઓ અને ભૂતપૂર્વ કેદીઓની ભયાનક જુબાનીઓ પર આધારિત છે. વેનેઝુએલામાં આ કેદીઓનો વારંવાર રાજકીય સોદાબાજીના મહોરા તરીકે ઉપયોગ કરવામાં આવતો હતો.
ભૂતપૂર્વ મરીન મેથ્યુ હીથ અને ઉસ્માન ખાને જેલમાં સહન કરેલી પીડાદાયક યાતનાઓનો ખુલાસો કર્યો હતો. 2022માં કેદીઓની અદલાબદલીના કરાર હેઠળ તેમને મુક્ત કરવામાં આવ્યા હતા. તેમણે જણાવ્યું હતું કે તેમને પાણીમાં ડુબાડીને શ્વાસ રૂંધવો, વીજળીના ઝટકા આપવા, જાતીય સતામણીની ધમકીઓ આપવી, માનસિક સ્થિતિને અસર કરતી દવાઓનો બળજબરીથી ઉપયોગ કરાવવો અને લાંબા સમય સુધી એકાંત કેદમાં રાખવા જેવી અમાનવીય યાતનાઓનો સામનો કરવો પડ્યો હતો.
‘CITGO 6’ જૂથ અને સૈન્ય ગુપ્તચર એજન્સીની ભૂમિકા
આવા જ સનસનાટીભર્યા ખુલાસા CITGO-6 જૂથના સભ્યોએ પણ કર્યા હતા. આ જૂથ એક અમેરિકન તેલ કંપનીના વરિષ્ઠ અધિકારીઓનું હતું, જેમને 2017માં કારાકસ બોલાવવામાં આવ્યા હતા. તેમને લગભગ પાંચ વર્ષ સુધી ગેરકાયદેસર રીતે અટકાયતમાં રાખવામાં આવ્યા હતા.
આ તમામ કેદીઓને વેનેઝુએલાના સૈન્ય કાઉન્ટર-ઇન્ટેલિજન્સના જનરલ ડિરેક્ટોરેટ (DGCIM)ના અટકાયત કેન્દ્રમાં રાખવામાં આવ્યા હતા. સંયુક્ત રાષ્ટ્રના એક અહેવાલમાં આ અંગે અગાઉ જ ખુલાસો કરવામાં આવ્યો હતો. આ સંગઠન કેદીઓ પાસેથી બળજબરીથી ગુનો કબૂલ કરાવવા માટે ક્રૂર રીતો અપનાવતું હતું. તેમાં પાણી અને ભોજન ન આપવું, શ્વાસ રૂંધવો, નિર્દયતાથી માર મારવો અને અત્યંત ઊંચા કે નીચા તાપમાનમાં રાખવા જેવી ક્રૂર પદ્ધતિઓનો વ્યવસ્થિત રીતે ઉપયોગ કરવામાં આવતો હતો.
અમેરિકા અને વેનેઝુએલા વચ્ચેનો સંઘર્ષ અને માદુરોની ધરપકડ
નિકોલસ માદુરો અને તેમની પત્ની સિલિયા ફ્લોરેસને અમેરિકાએ વેનેઝુએલામાં ઘૂસીને પકડી લીધાં હતાં. આ જ વર્ષના જાન્યુઆરીની શરૂઆતમાં કારાકસ સ્થિત રાષ્ટ્રપતિ ભવન પર અમેરિકન સૈન્યના દરોડા દરમિયાન તેમની ધરપકડ કરવામાં આવી હતી. ત્યારથી તેઓ ન્યૂયોર્કની જેલમાં બંધ છે અને તેમને જામીન મળવાની કોઈ શક્યતા દેખાતી નથી. ધરપકડ બાદથી જ બંને સામે ડ્રગ્સની દાણચોરી અને નાર્કો-ટેરરિઝમનું કાવતરું ઘડવાના ગંભીર આરોપો છે, જેમાં તેમણે પોતાને નિર્દોષ ગણાવ્યાં છે.
માદુરોના વકીલોનો બચાવ છે કે રાષ્ટ્રપતિ તરીકે તેમને કાનૂની પ્રતિરક્ષાનો અધિકાર છે. તેમની ધરપકડની સમગ્ર કાનૂની માન્યતા પર જ સવાલો ઊભા થઈ રહ્યા છે. બીજી તરફ, સિલિયા ફ્લોરેસના વકીલો સ્વાસ્થ્યનાં કારણોનો હવાલો આપીને તેમને નજરકેદમાં રાખવાની માગ કરવાની તૈયારી કરી રહ્યા છે. જોકે, અમેરિકાના સરકારી વકીલો તેનો સખત વિરોધ કરી રહ્યા છે.
આગળ શું થઈ શકે છે?
અમેરિકાના ફેડરલ તપાસકર્તાઓ હવે એ વાતની પણ તપાસ કરી રહ્યા છે કે વેનેઝુએલાની આ દમનકારી વ્યવસ્થામાં બીજા કયા અધિકારીઓ અથવા લોકો સામેલ હતા. આગામી દિવસોમાં તેમની સામે પણ કાર્યવાહી થઈ શકે છે. નિષ્ણાતોનું માનવું છે કે યાતનાઓના નવા આરોપો ઉમેરાવાથી માદુરો અને તેમની પત્નીની મુશ્કેલીઓ વધુ વધી જશે. તેના કારણે તેમનું જેલમાંથી બહાર આવવું લગભગ અશક્ય બની ગયું છે.
