PoK Election Boycott: JAACના બહિષ્કારની અસર, અનેક મતદાન કેન્દ્રો ખાલી; પાકિસ્તાનની ચૂંટણી વ્યવસ્થા પર સવાલ
PoK Election Boycott: પાકિસ્તાનના કબજા હેઠળના કાશ્મીર (PoK)માં ચૂંટણી દરમિયાન અનેક પોલિંગ સ્ટેશન પર એક પણ મત નાખવામાં આવ્યો નથી. જૉઇન્ટ અવામી એક્શન કમિટી (JAAC)ના બહિષ્કારના આહ્વાનને પગલે મતદારોએ ‘બનાવટી ચૂંટણી’થી સંપૂર્ણપણે અંતર જાળવી રાખ્યું. આ દરમિયાન પોલિંગ બૂથ પર ભારે સંખ્યામાં સુરક્ષાકર્મીઓ તૈનાત હતા. તપાસ કરવામાં આવેલા નવ પોલિંગ બૂથમાંથી ઓછામાં ઓછા ત્રણ પર એક પણ મત પડ્યો નહોતો, જ્યારે ફરજ પર હાજર પોલીસકર્મીઓએ સ્વીકાર્યું કે કેટલાક પોલિંગ સ્થળોની આસપાસના રસ્તાઓ સંપૂર્ણપણે ખાલી હતા.
અહેવાલ મુજબ બાગ-2, મલોટ અને બારા બારી સહિત અનેક પોલિંગ સ્ટેશનો પર પોલિંગ સ્ટાફ અને સુરક્ષા દળોની હાજરી હોવા છતાં મતદારો કાં તો ગણતરીની સંખ્યામાં પહોંચ્યા અથવા બિલકુલ પહોંચ્યા નહીં. તમને જણાવી દઈએ કે PoKમાં છેલ્લા લગભગ ત્રણ મહિનાથી વિરોધ પ્રદર્શન ચાલી રહ્યા છે, જેના પર પાકિસ્તાની સેનાએ અનેક વખત અંધાધૂંધ ગોળીબાર કર્યો છે, જેમાં 100થી વધુ લોકો માર્યા ગયા છે. સ્થાનિક લોકોએ ચૂંટણીને સંપૂર્ણપણે ‘ડ્રામા અને દેખાડો’ ગણાવી છે.
PoK ચૂંટણીમાં ચૂંટણીનો બહિષ્કાર સફળ
સ્થાનિક લોકોએ પાકિસ્તાનની રાજકીય પાર્ટીઓ પર આરોપ લગાવ્યો છે કે તેઓ સ્થાનિક લોકોની સમસ્યાઓ ઉકેલવાને બદલે સત્તા અને વિશેષાધિકારો મેળવવાનો પ્રયાસ કરી રહી છે. અહેવાલ મુજબ મતદારો ન આવવાના કારણે પોલિંગ સ્ટાફને લાંબા સમય સુધી ખાલી બેસવું પડ્યું. તેઓ આખો દિવસ ‘માખીઓ મારતા જોવા મળ્યા.’ અનેક પોલિંગ સ્ટેશનો પર લોકો મતદાન કરવાને બદલે વિરોધ કરવા માટે કાળા ઝંડા લહેરાવતા અને પોલિંગ બૂથની પાસે એકત્ર થતા પણ જોવા મળ્યા.
જોકે જે બૂથ પર ઝીરો વોટિંગના અહેવાલ છે, તે કેટલીક ચોક્કસ પોલિંગ લોકેશન છે અને તેનાથી સમગ્ર PoKમાં મતદાનના સંપૂર્ણ બહિષ્કારનો સંકેત મળતો નથી. અન્ય પોલિંગ સ્ટેશનો પર મતદાન થયું અને અલગ-અલગ ચૂંટણી વિસ્તારોમાં લોકોની ભાગીદારીમાં ઘણો તફાવત રહ્યો. આ બહિષ્કાર અભિયાન PoKમાં ચાલી રહેલા વ્યાપક રાજકીય તણાવ વચ્ચે થઈ રહ્યું છે, જેમાં JAAC ચૂંટણી વ્યવસ્થામાં ફેરફારની માંગ કરી રહી છે અને પાકિસ્તાનમાં રહેતા કાશ્મીરી શરણાર્થીઓ માટે અનામત બેઠકો સામે વાંધો ઉઠાવી રહી છે.
PoKમાં ચૂંટણી પર પાક ફોજનો ઢોંગ બેનકાબ
ભારતીય ગુપ્તચર સૂત્રોના હવાલાથી જણાવ્યું છે કે આ બહિષ્કાર ઇસ્લામાબાદના નિયંત્રણ અને તે ચૂંટણી માળખા પ્રત્યે વધતા અસંતોષને દર્શાવે છે, જેમાં સ્થાનિક પ્રતિનિધિત્વને બદલે શરણાર્થીઓની બેઠકોને પ્રાથમિકતા આપવામાં આવે છે. સૂત્રોએ એવો પણ દાવો કર્યો કે જમીની અહેવાલોથી જાણવા મળે છે કે મુખ્યપ્રવાહની પાકિસ્તાની રાજકીય પાર્ટીઓની સાથે સાથે PoKમાં સેનાના સમર્થનવાળી રાજકીય વ્યવસ્થાથી પણ લોકોનું અંતર વધી રહ્યું છે.
