PoK Protest JAAC: PoKમાં 73 દિવસથી વિરોધ, ટેક્સ અને વીજળી બિલ નહીં ભરવા JAACની અપીલ
PoK Protest JAAC: પાકિસ્તાનના કબજા હેઠળના કાશ્મીર એટલે કે PoKમાં પ્રદર્શનકારીઓએ ગાંધીવાદી આંદોલન શરૂ કરી દીધું છે. પ્રદર્શનકારીઓએ ગાંધીજી દ્વારા દર્શાવવામાં આવેલા સવિનય અવજ્ઞા આંદોલન શરૂ કરવાની જાહેરાત કરી છે. પ્રદર્શન કરનાર પાર્ટી જૉઇન્ટ અવામી એક્શન કમિટી (JAAC)એ લોકોને ‘ગોળીઓના કાયદા’ વિરુદ્ધ એકસાથે આવવાનું આહ્વાન કર્યું છે. રાવલાકોટ સહિત PoKના અનેક વિસ્તારોમાં હજારો લોકો પ્રદર્શન કરી રહ્યા છે. આ પ્રદર્શન હવે લગભગ 73 દિવસથી સતત ચાલી રહ્યું છે.
પલંદરીમાં એક સભા દરમિયાન JAAC નેતા સરદાર અમન કાશ્મીરીએ લોકોને ટેક્સ અને વીજળીના બિલ નહીં ભરવાની અપીલ કરી છે. આ ઉપરાંત તેમણે સવિનય અવજ્ઞા આંદોલન હેઠળ સરકારી કચેરીઓ અને શાળાઓનો બહિષ્કાર કરવાનો આહ્વાન કર્યો છે. આ જાહેરાત PoKમાં ચાલી રહેલા તણાવ વચ્ચે કરવામાં આવી છે, જ્યાં પ્રદર્શનકારીઓએ પાકિસ્તાની અધિકારીઓ પર બળપ્રયોગ કરીને જનતાની માગણીઓને દબાવવાનો પ્રયાસ કરવાનો આરોપ લગાવ્યો છે. પાકિસ્તાની સેનાની ગોળીબારમાં અત્યાર સુધીમાં 100થી વધુ લોકોના મોત થઈ ચૂક્યા છે.
PoKમાં ગાંધીવાદી સવિનય અવજ્ઞા આંદોલન
પલંદરીમાં સભાને સંબોધિત કરતા અમન કાશ્મીરીએ ધમકી અને બળના માધ્યમથી ગોળીઓના શાસનને નકારી કાઢ્યું. તેમણે કહ્યું, ‘શું તમે ગોળીનું શાસન સ્વીકારો છો? અમે ગોળીનું શાસન સ્વીકારતા નથી.’ લાંબા સમયથી ચાલી રહેલા વિરોધ પ્રદર્શનોનો ઉલ્લેખ કરતા કાશ્મીરીએ કહ્યું કે પ્રદર્શનકારીઓએ પહેલેથી જ બતાવી દીધું છે કે તેઓ ડરશે નહીં. તેમણે કહ્યું, ‘જે લોકો ગોળીઓ ચલાવવા માટે આટલા બેચેન છે તેમને જણાવી દો કે અમે 70થી વધુ દિવસોથી છાતી તાણીને ઊભા છીએ અને આ સાબિત કરી રહ્યા છીએ કે અમે ગોળીના શાસનને સ્વીકારતા નથી.’
આ સભામાં હાજર પ્રદર્શનકારીઓએ પાકિસ્તાની સેના વિરુદ્ધ ઉગ્ર સૂત્રોચ્ચાર કર્યા અને કહ્યું, ‘અમે ગોળીના કાયદાને સ્વીકારતા નથી.’ અવામી એક્શન કમિટીએ હવે PoKમાં સવિનય અવજ્ઞા આંદોલનનું આહ્વાન કર્યું છે અને લોકોને ટેક્સ અને વીજળીનું બિલ નહીં ભરવાની અપીલ કરી છે. કમિટીએ વિરોધ પ્રદર્શન હેઠળ લોકોને સરકારી કચેરીઓ અને શાળાઓનો બહિષ્કાર કરવાની પણ અપીલ કરી છે.
અમન કાશ્મીરીએ આ આંદોલનને સામાન્ય કામકાજ કરતા પરિવારોની ચિંતાઓ સાથે જોડાયેલું ગણાવવાનો પ્રયાસ કર્યો. તેમણે કહ્યું, ‘અમારી માતાઓએ અમને ખૂબ મુશ્કેલીઓમાં ઉછેર્યા છે. અમને મોટાં કરવા માટે તેમણે મજૂરી કરી છે. અમે મજૂરો અને ઈમાનદારી તથા કાયદેસર રીતે રોજીરોટી કમાતા લોકોના સંતાનો છીએ. અમે ગોળીઓથી ડરતા નથી.’
અમન કાશ્મીરીએ રાજકીય ઉકેલની માગ કરી
જોકે ટકરાવભર્યા નિવેદનો છતાં અમન કાશ્મીરીએ કહ્યું કે આ વિવાદનો ઉકેલ આખરે રાજકીય રીતે જ આવવો જોઈએ અને તેમણે વાતચીત માટે પોતાની ઇચ્છા વ્યક્ત કરી. તેમણે કહ્યું, ‘તેથી હું ખૂબ સંયમ સાથે આ વાત બિલકુલ સ્પષ્ટ કરવા માગું છું. આ એક રાજકીય મામલો છે અને તેનો રાજકીય ઉકેલ લાવો.’ તેમણે બળના સતત ઉપયોગ વિરુદ્ધ પણ ચેતવણી આપી અને કહ્યું, ‘જો તમે ગોળીનું શાસન ઇચ્છો છો તો લોકો પણ ગોળીઓ એકત્ર કરશે અને એ જ કાયદો લાગુ થશે જે તમે ઇચ્છો છો.’
