Sharif University Attack: મિસાઈલ બનાવતી યુનિયર્સિટી: જાણો ઈરાનની એ યુનિવર્સિટી વિશે જેનું એડમિશન IIT થી પણ અઘરું છે, અને જ્યાં તૈયાર થાય છે દુનિયાને હચમચાવતા આત્મઘાતી ડ્રોન

Sharif University Attack: અમેરિકા અને ઈઝરાયેલે ઈરાનની MIT કહેવાતી પ્રતિષ્ઠિત શરીફ યુનિવર્સિટી ઓફ ટેકનોલોજી (SUT) પર હુમલા કર્યા છે, જેની ચારેબાજુ નિંદા થઈ રહી છે. તેને આર્યમેહર યુનિવર્સિટી પણ કહેવામાં આવે છે. આની ધાક એટલી છે કે અહીં ભારતીય સહિત વિશ્વભરના વિદ્યાર્થીઓ પણ એન્જિનિયરિંગ કરવા જાય છે. આ યુનિવર્સિટી પર અવારનવાર એવા આક્ષેપો પણ લાગે છે કે અહીંના એન્જિનિયરો ઈરાન માટે બેલેસ્ટિક મિસાઇલો અને મિલિટરી ડ્રોન્સ બનાવે છે. જાણીએ આ યુનિવર્સિટી બનવાની વાર્તા.

આંતરરાષ્ટ્રીય પ્રતિબંધોએ શરીફ યુનિવર્સિટીને શ્રેષ્ઠ બનાવી

ઈરાન પર અમેરિકા અને આંતરરાષ્ટ્રીય સ્તરે પ્રતિબંધો લાદવામાં આવ્યા હતા. એવામાં ઈરાને આયાત કરવાને બદલે પોતે જ એવું અદભૂત એન્જિનિયરિંગ વિકસાવ્યું, જેણે તેને દુનિયામાં ખાસ બનાવી દીધું છે.

• તેણે વિપરીત પરિસ્થિતિઓમાં એન્જિનિયરિંગના ક્ષેત્રમાં શાનદાર પ્રગતિ કરી છે. દાયકાઓથી આંતરરાષ્ટ્રીય પ્રતિબંધોનો સામનો કરી રહેલા ઈરાનને વિદેશી ટેકનોલોજી અને ઉપકરણોથી દૂર રાખવામાં આવ્યું. છતાં, ઈરાને કમાલ કરી બતાવી.

• તેના એન્જિનિયરોએ ઈરાનની દરેક તકનીકી, સૈન્ય અને યુદ્ધની જરૂરિયાત માટે હથિયારો બનાવ્યા. એવા આક્ષેપો થતા રહ્યા છે કે આ યુનિવર્સિટીમાંથી ભણેલા એન્જિનિયરોએ સ્વદેશી સોફ્ટવેર, બેલેસ્ટિક મિસાઇલો, મેડિકલ ઉપકરણો, મિલિટરી ડ્રોન સેટેલાઇટ અને ઔદ્યોગિક તકનીકી વસ્તુઓ બનાવી.

શરીફ યુનિવર્સિટીમાં બને છે બેલેસ્ટિક મિસાઇલો-ડ્રોન્સ?

રિપોર્ટમાં દાવો કરવામાં આવતો રહ્યો છે કે ઈરાનની શરીફ ટેકનિકલ યુનિવર્સિટી મિલિટરી અને બેલેસ્ટિક મિસાઇલો સાથે જોડાયેલા ઈરાની સરકારના પ્રોજેક્ટ્સમાં લાગેલી છે.

• યુનિવર્સિટીએ સંરક્ષણ મંત્રાલય, ઈસ્લામિક રિવોલ્યુશનરી ગાર્ડ કોર્પ્સ (IRGC), IRGC એરફોર્સની સાથે એરોસ્પેસ ઇન્ડસ્ટ્રીઝ ઓર્ગેનાઈઝેશન સાથે એક કરાર કર્યો છે, જેથી સેટેલાઇટનું પ્રોડક્શન કરી શકાય.

• આ સિવાય, ઈરાન સ્પેસ રિસર્ચ સેન્ટરના એક સ્પેસ પાર્ક બનાવવાનો પણ કરાર કરવામાં આવ્યો છે. ઉપરાંત, ડ્રોન બનાવવા માટે એક ગ્રેજ્યુએટ કોર્સ પણ આ યુનિવર્સિટી ચલાવે છે.

QS વર્લ્ડ રેન્કિંગમાં સામેલ છે શરીફ યુનિવર્સિટી

ઈરાનની પ્રીમિયર એન્જિનિયરિંગ ઇન્સ્ટિટ્યૂટ શરીફ યુનિવર્સિટીનું QS વર્લ્ડ રેન્કિંગ, 2026 માં 375 મું સ્થાન છે. અહીં ભારત સહિત સમગ્ર વિશ્વના વિદ્યાર્થીઓ ભણવા આવે છે. અહીં એડવાન્સ ટેકનિકલ ફિલ્ડ્સમાં અભ્યાસ કરવો એ વિદેશી વિદ્યાર્થીઓ માટે ગર્વની વાત હોય છે. અહીં ઇલેક્ટ્રિકલ એન્જિનિયરિંગ, કમ્પ્યુટર સાયન્સ, ભૌતિક વિજ્ઞાન અને એરોસ્પેસ એન્જિનિયરિંગની સાથે હાઈ ક્વોલિટી પ્રોગ્રામ ચલાવવામાં આવે છે.

રઝા શાહ પહેલવીના શાસનકાળમાં બની હતી

શરીફ યુનિવર્સિટીની સ્થાપના 1966 માં મોહમ્મદ રઝા શાહ પહેલવીના શાસન દરમિયાન કરવામાં આવી હતી. તે સમયે તેનું નામ આર્યમેહર યુનિવર્સિટી હતું. 1979 ની ઈસ્લામિક ક્રાંતિ પછી તેનું નામ બદલીને એક સ્ટુડન્ટ એક્ટિવિસ્ટ માજિદ શરીફ વાઘેફીના નામ પર રાખવામાં આવ્યું.

IIT થી પણ વધુ ટફ છે શરીફ યુનિવર્સિટીમાં પ્રવેશ મેળવવો

શરીફ યુનિવર્સિટીનું મોડેલ મેસાચુસેટ્સ ઇન્સ્ટિટ્યૂટ ઓફ ટેકનોલોજી (MIT) પર આધારિત છે. અહીં એટલું શ્રેષ્ઠ ભણતર મળે છે કે તેને મિડલ ઈસ્ટની MIT કહેવામાં આવે છે. આની એન્ટ્રન્સ ટેસ્ટ IIT કરતા પણ વધુ ટફ માનવામાં આવે છે.

• ઈરાનની અત્યંત જટિલ નેશનલ યુનિવર્સિટી એન્ટ્રન્સ એક્ઝામિનેશન દ્વારા દર વર્ષે લાખો અરજદારોની છટણી થઈ જાય છે. ટોપના માત્ર 1 ટકા એન્જિનિયરિંગ ઉમેદવારોને જ પ્રવેશ મળી શકે છે.

• નેનો ટેકનોલોજીના ક્ષેત્રમાં ઈરાને અભૂતપૂર્વ પ્રગતિ કરી છે અને તે વૈશ્વિક રિસર્ચમાં મોટો ભાગીદાર છે. આ ઉપરાંત, બાયોટેકનોલોજી અને આર્ટિફિશિયલ ઇન્ટેલિજન્સ રિસર્ચ ક્ષેત્રે પણ નામ કમાવ્યું છે.

કેનેડાએ એન્જિનિયરિંગ ડિપાર્ટમેન્ટ પર પ્રતિબંધ મૂક્યો હતો

2012 માં કેનેડાએ શરીફ યુનિવર્સિટીના એન્જિનિયરિંગ ડિપાર્ટમેન્ટ પર પ્રતિબંધ મૂકી દીધો હતો. આરોપ એ હતો કે તે IRGC સાથે મળીને ઈરાનની પરમાણુ પ્રસારની પ્રવૃત્તિઓમાં જોડાયેલી છે.

યુનિવર્સિટીમાં સંવેદનશીલ ટેકનોલોજીનો અભ્યાસ?

ઈરાન વોચના રિપોર્ટમાં દાવો કરવામાં આવ્યો છે કે યુનિવર્સિટીમાં ટર્બો મશીનરી, સુપરસોનિક અને સબસોનિક વિન્ડ ટનલ્સ, રોકેટ મોટર્સ, રોબોટિક્સ અને ફ્લૂઈડ મિકેનિક્સ સાથે જોડાયેલા કાર્યક્રમો પણ ચલાવવામાં આવે છે. યુનિવર્સિટી માટે કેટલાક મહત્વના ઉપકરણોની સપ્લાય પર બ્રિટન અને જાપાન પણ પ્રતિબંધ લાદી ચૂક્યા છે.