Strait of Hormuz Update 2026: ઈરાને સ્પષ્ટતા કરી છે કે હોર્મુઝ સ્ટ્રેટ (Strait of Hormuz) ને વિશ્વ માટે બંધ કરવામાં આવ્યું નથી. આ દરિયાઈ માર્ગમાં માત્ર ઈઝરાયેલ અને અમેરિકાના જહાજોને જ રોકવામાં આવશે, કારણ કે આ દેશોએ ઈરાન પર હુમલો કર્યો છે. ઈરાનના વિદેશ મંત્રી અબ્બાસ અરાઘચીએ પોતાના એક નિવેદનમાં આ વાત કહી છે. તેમનું આ નિવેદન એવા સમયે આવ્યું છે જ્યારે આ મહત્વપૂર્ણ દરિયાઈ માર્ગમાં મોટી સંખ્યામાં જહાજો ફસાયેલા છે, જેના કારણે વિશ્વના મોટા ભાગમાં ઉર્જા સંકટ ઊભું થઈ રહ્યું છે.
અબ્બાસ અરાઘચીનું નિવેદન
અબ્બાસ અરાઘચીએ શનિવારે ‘એમએસ નાઉ’ સાથેની વાતચીતમાં જણાવ્યું હતું કે, ‘હકીકત એ છે કે હોર્મુઝ જલડમરુમધ્ય ખુલ્લું છે. અમેરિકા અને ઈઝરાયેલને બાદ કરતાં બાકીના તમામ દેશોના જહાજો આ જળમાર્ગ પરથી પસાર થઈ શકે છે. તે માત્ર અમારા દુશ્મનો અને તેમના સાથીઓના ટેન્કરો અને જહાજો માટે બંધ છે જેઓ અમારા પર હુમલો કરી રહ્યા છે. બાકીના તમામ લોકો અહીંથી પસાર થવા માટે આઝાદ છે.’
ટ્રમ્પના સુરક્ષાના દાવા પર કટાક્ષ
અરાઘચીએ અમેરિકી રાષ્ટ્રપતિ ડોનાલ્ડ ટ્રમ્પના તે દાવા પર કટાક્ષ કર્યો છે, જેમાં તેમણે કહ્યું હતું કે હોર્મુઝ સ્ટ્રેટને કોઈપણ કિંમતે ખોલવામાં આવશે. અબ્બાસ અરાઘચીએ કહ્યું કે અમેરિકાની જે ‘સુરક્ષા-છત્રી’ (Security Umbrella) ના ગુણગાન ગાવામાં આવતા હતા, તે હવે સંપૂર્ણપણે કાણાંવાળી સાબિત થઈ રહી છે. તેમણે વધુમાં ઉમેર્યું કે અમેરિકાની આ સુરક્ષા છત્રી મુસીબતોને રોકવાને બદલે તેમને આમંત્રણ આપી રહી છે. હવે અમેરિકાએ ચીન પાસે વિનંતી કરવી પડી રહી છે કે તેઓ હોર્મુઝને સુરક્ષિત બનાવવામાં મદદ કરે. ઈરાને તેના પડોશી દેશોને આહવાન કર્યું છે કે તેઓ વિદેશી હુમલાખોરોને બહાર ફેંકી દે.
ડોનાલ્ડ ટ્રમ્પે શું કહ્યું છે?
અમેરિકી રાષ્ટ્રપતિ ડોનાલ્ડ ટ્રમ્પે શનિવારે કહ્યું હતું કે હોર્મુઝ સ્ટ્રેટને કોઈપણ સંજોગોમાં ઈરાનના ‘ખતરા’ થી મુક્ત કરાવવામાં આવશે. તેમણે જણાવ્યું કે હોર્મુઝ જલડમરુમધ્ય બંધ થવાથી પ્રભાવિત દેશો તેને સુરક્ષિત રાખવા માટે પોતાના યુદ્ધ જહાજો મોકલશે. ટ્રમ્પે ચીન, ફ્રાન્સ, જાપાન, દક્ષિણ કોરિયા અને યુકેને યુદ્ધ જહાજો મોકલવાની અપીલ કરી છે.
હોર્મુઝ સ્ટ્રેટનું મહત્વ
હોર્મુઝ જલડમરુમધ્ય ઈરાન, સંયુક્ત આરબ અમીરાત (UAE) અને ઓમાનના દ્વીપકલ્પ વચ્ચે આવેલો દરિયાઈ માર્ગ છે, જે માત્ર ૫૪ કિલોમીટર પહોળો છે. ઈરાનમાં યુદ્ધ શરૂ થયા બાદથી આ માર્ગ પર દરિયાઈ વાહનવ્યવહાર લગભગ ઠપ્પ થઈ ગયો છે. આના પરિણામે વિશ્વના ઘણા દેશોમાં ઉર્જા સંકટ સર્જાયું છે અને તેલના ભાવમાં ઝડપથી વધારો થઈ રહ્યો છે.
