US-Iran Conflict Prisoners of War Claim: અમેરિકી સેનાએ તેહરાનના એ દાવાઓને ફગાવી દીધા છે જેમાં કહેવામાં આવ્યું હતું કે યુદ્ધ શરૂ થયા બાદથી ઈરાની સેનાએ અનેક અમેરિકી સૈનિકોને પકડી લીધા છે. અમેરિકી સેન્ટ્રલ કમાન્ડના પ્રવક્તાએ આ આરોપોને જૂઠ અને ધૂર્તતા ગણાવ્યા છે. આ નિવેદન ઈરાનની સુપ્રીમ નેશનલ સિક્યોરિટી કાઉન્સિલના સેક્રેટરી અલી લારીજાનીની ટિપ્પણી બાદ આવ્યું છે, જેમાં તેમણે કહ્યું હતું કે અનેક અમેરિકી સૈનિકોને બંદી બનાવી લેવામાં આવ્યા છે. લારીજાનીએ કહ્યું કે વોશિંગ્ટન તે સૈનિકોને મૃત જાહેર કરીને સત્ય છુપાવી રહ્યું છે.
ઈરાનનો અમેરિકી સૈનિકો પર દાવો
લારીજાનીએ એક્સ (X) પર લખ્યું, ‘મને જણાવવામાં આવ્યું છે કે અનેક અમેરિકી સૈનિકોને બંદી બનાવી લેવામાં આવ્યા છે, પરંતુ અમેરિકા દાવો કરી રહ્યું છે કે તેઓ એક્શનમાં માર્યા ગયા છે. તેમના નકામા પ્રયાસો છતાં સત્ય એવી વસ્તુ નથી, જેને તેઓ લાંબો સમય છુપાવી શકે.’ અમેરિકી સેનાએ લારીજાનીના આ દાવાઓને ખોટા ગણાવ્યા છે.
US સેન્ટ્રલ કમાન્ડે ગણાવ્યું જૂઠ
અમેરિકી સેન્ટ્રલ કમાન્ડના એક પ્રવક્તાએ અલ જઝીરાને આપેલા જવાબમાં કહ્યું, ‘અમેરિકી સૈનિકોને પકડવાનો ઈરાની સરકારનો દાવો તેના જૂઠ અને ધૂર્તતાનું વધુ એક ઉદાહરણ છે.’ 28 ફેબ્રુઆરીએ ઈરાન સાથે યુદ્ધ શરૂ થયા બાદ અત્યાર સુધીમાં 6 અમેરિકી સૈનિકો માર્યા ગયા હતા. કુવૈતમાં અમેરિકી બેઝ પર ઈરાની હુમલા દરમિયાન આ સૈનિકોના મોત થયા હતા.
અમેરિકા અને ઈઝરાયેલે શનિવારે આઠમા દિવસે પણ ઈરાન પર ભારે બોમ્બમારો ચાલુ રાખ્યો હતો. ઈરાનની અર્ધ-સરકારી તસ્નીમ ન્યૂઝ એજન્સીએ જણાવ્યું કે ગયા અઠવાડિયાથી ચાલી રહેલી લડાઈમાં 1332 લોકો માર્યા ગયા છે. મૃતકોમાં 180 બાળકો સામેલ છે, જે દક્ષિણ-પૂર્વી શહેર મીનાબની એક શાળા પર થયેલા હુમલામાં માર્યા ગયા હતા. શાળા પર થયેલા હુમલાની સમગ્ર વિશ્વમાં ટીકા થઈ છે.
ઈરાની શાળા પર કોણે કર્યો હુમલો?
શનિવારે ટ્રમ્પે એરફોર્સ વનમાં પત્રકારો સાથે વાત કરતા ઈરાનને શાળા પરના હુમલા માટે જવાબદાર ગણાવ્યું હતું. તેમણે કહ્યું, ‘મેં જે જોયું છે તેના આધારે આ ઈરાને કર્યું છે.’ જોકે, એક એનાલિસિસના આધારે જણાવ્યું હતું કે શાળા પર હુમલો અમેરિકાએ કર્યો હતો.
