Workplace Discrimination Laws: યુકેમાં રહેતા એનઆરઆઈ (NRI) પ્રોફેશનલ સંજુ પાલે છ વર્ષની કાનૂની લડાઈ બાદ લંડન હાઈકોર્ટમાં મોટી જીત મેળવી છે. એન્ડોમેટ્રિયોસિસ જેવી ગંભીર બીમારી સામે લડી રહેલા ૪૧ વર્ષીય પાલનો કેસ હવે કાર્યસ્થળ પર દિવ્યાંગો સાથે થતા ભેદભાવ સાથે જોડાયેલા મામલાઓમાં એક મહત્વપૂર્ણ ઉદાહરણ તરીકે જોવામાં આવી રહ્યો છે. સંજુ પાલે Equality Act 2010 અને Employment Rights Act 1996 હેઠળ Accenture (UK) Ltd દ્વારા અપનાવવામાં આવેલા વિવાદિત “up or out” મોડલને પડકાર્યું હતું. આ મોડલ હેઠળ કર્મચારીઓને નક્કી કરેલા સમયમાં પ્રમોશન ન મળવા પર નોકરીમાંથી કાઢી શકાય છે.
Employment Appeal Tribunal (EAT) એ પોતાના ચુકાદામાં સ્પષ્ટ કર્યું કે પહેલા આપવામાં આવેલા રોજગાર ટ્રિબ્યુનલના નિર્ણયમાં એન્ડોમેટ્રિયોસિસને લઈને કરવામાં આવેલા તારણો “તદ્દન અપૂરતા” હતા. EAT એ માન્યું કે મેડિકલ પુરાવા સ્પષ્ટપણે દર્શાવતા હતા કે પાલ આ બીમારીથી પ્રભાવિત હતી, પરંતુ ટ્રિબ્યુનલે તેમના દૈનિક જીવન પર બીમારીની અસરનું યોગ્ય મૂલ્યાંકન કર્યું ન હતું.
શું હતો આખો મામલો?
EAT એ એમ પણ કહ્યું કે સારવાર વિના સ્થિતિ કેટલી ગંભીર હોઈ શકે છે, તે પાસા પર પણ ટ્રિબ્યુનલે વિચાર કર્યો નથી. ચુકાદાને રદ કરતા હવે આ મામલો નવી સુનાવણી માટે નવા ટ્રિબ્યુનલને મોકલવામાં આવ્યો છે. ૨૦૧૯ માં કંપનીએ પાલને સીનિયર મેનેજરનું પ્રમોશન ન મળવાનું કારણ આપીને ‘અંડરપરફોર્મન્સ’ ના આધારે નોકરીમાંથી કાઢી મૂકી હતી.
૨૦૨૨ માં રોજગાર ટ્રિબ્યુનલે બરતરફીને અયોગ્ય માની હતી
૨૦૨૨ માં રોજગાર ટ્રિબ્યુનલે તેમની બરતરફીને અયોગ્ય તો માની હતી, પરંતુ માત્ર ૪,૨૭૫ પાઉન્ડનો બેઝિક એવોર્ડ આપ્યો હતો. EAT માં હવે આ વળતરની સમીક્ષા પણ કરવામાં આવશે. કાયદાકીય પેઢી Kilgannon & Partners મુજબ, EAT એ એ પણ સ્પષ્ટ કર્યું કે કર્મચારીની ‘ક્ષમતા’ નું મૂલ્યાંકન માત્ર તે કામના આધારે જ કરી શકાય છે જે તેમના રોજગાર કરારમાં નક્કી થયેલું હોય. આ ટિપ્પણી “up or out” મોડલની કાનૂની માન્યતા પર સવાલ ઉભા કરે છે.
સંજુ પાલે આ લડાઈ માટે CrowdJustice પ્લેટફોર્મ દ્વારા ફંડ એકઠું કર્યું હતું. સંજુને યુકેના વડાપ્રધાનનો ‘Points of Light Award’ પણ મળી ચૂક્યો છે, જે ભારત અને યુકેમાં શિક્ષણ માટેના તેમના સામાજિક કાર્યોની કદર રૂપે આપવામાં આવ્યો છે.
ચુકાદા બાદ પાલે શું કહ્યું?
ચુકાદા બાદ પાલે કહ્યું કે, “આ ખૂબ જ લાંબી અને થકવી નાખનારી લડાઈ રહી છે. હું ઈચ્છું છું કે કાર્યસ્થળ પર ગેરકાયદે પ્રથાઓ ખતમ થાય અને ગંભીર બીમારી સામે લડી રહેલા કર્મચારીઓના અધિકારો સુરક્ષિત રહે.” Accenture (UK) Ltd એ ચાલુ કાનૂની કેસ પર ટિપ્પણી કરવાનો ઇનકાર કર્યો છે.
