Vadnagar Suicide And Murder Case: મહેસાણા જિલ્લાના વડનગર તાલુકાના શાહપુર વડ ગામેથી માનવતાને લજવતી અને કાળજું કંપાવી દે તેવી ઘટના સામે આવી છે. વડનગરની સિવિલ હોસ્પિટલના ચોથા માળેથી પડતું મૂકીને ગિરીશ પરમાર નામના એક યુવકે જીવન ટૂંકાવ્યું હતું. હીરાના કારખાનામાં કામ કરતા ગિરીશના આપઘાત બાદ સમગ્ર પંથકમાં ચકચાર મચી ગઈ હતી, પરંતુ ખરી ભયાનકતા ત્યારે સામે આવી જ્યારે પોલીસને તેના ખિસ્સામાંથી એક સ્યૂસાઈડ નોટ મળી. આ અંતિમ ચિઠ્ઠીમાં ગિરીશે જે ખુલાસો કર્યો તે સાંભળીને પોલીસ પણ સ્તબ્ધ થઈ ગઈ હતી. તેણે લખ્યું હતું કે તેણે પોતાની પત્ની પ્રિયંકા અને માસૂમ દીકરી પરીની હત્યા કરી છે અને તેમના મૃતદેહને પોતાના જ ઘરમાં દાટી દીધા છે.
છ મહિના સુધી છુપાયેલું રહ્યું રહસ્ય
ગિરીશ પરમારે અંદાજે છ મહિના અગાઉ આ જઘન્ય હત્યાકાંડને અંજામ આપ્યો હોવાનું બહાર આવ્યું છે. પત્ની પ્રિયંકા અને પુત્રી પરીની હત્યા કર્યા બાદ તેણે આ વાત કોઈને ખબર ન પડે તે માટે ઘરના છેલ્લા રૂમમાં જમીન ખોદી લાશો દાટી દીધી હતી અને ઉપર પ્લાસ્ટર કરી દીધું હતું. ત્યારબાદ તેણે ગામમાં એવી અફવા ફેલાવી હતી કે તેની પત્ની અને પુત્રી ક્યાંક ગુમ થઈ ગયા છે. આટલું મોટું પાપ છુપાવીને તે પોતાની બહેનના ઘરે રહેવા જતો રહ્યો હતો. જોકે, પ્રિયંકાના પરિવારે લાંબા સમય સુધી તેમની ભાળ ન મળતા શંકા વ્યક્ત કરી હતી અને અંતે પોલીસમાં જાણવાજોગ ફરિયાદ નોંધાવી હતી.
પોલીસ તપાસ અને ખોદકામમાં મળ્યા નરકંકાલ
ડીવાયએસપી જય કંસારાના માર્ગદર્શન હેઠળ વડનગર પોલીસે સ્યૂસાઈડ નોટમાં દર્શાવેલા સ્થળે તપાસ હાથ ધરી હતી. શાહપુર વડ સ્થિત ગિરીશના મકાનમાં જ્યારે પોલીસે ત્રણ મજૂરોની મદદથી ખોદકામ શરૂ કરાવ્યું, ત્યારે બે કલાકની જહેમત બાદ રૂમમાંથી કપડામાં વીંટાળેલા બે કંકાલ મળી આવ્યા હતા. જે રીતે લાશ દાટીને ઉપર પ્લાસ્ટર કરવામાં આવ્યું હતું તે જોઈને પોલીસ પણ આરોપીની વિકૃત માનસિકતાથી ચોંકી ઉઠી હતી. ઘટનાસ્થળેથી એક છરો પણ મળી આવ્યો છે, જેનો ઉપયોગ સંભવતઃ હત્યામાં કરવામાં આવ્યો હોઈ શકે છે. પાપ છૂપાવવા માટે કરેલી આ તમામ કોશિશો આખરે કાયદાના સકંજા સામે નાકામ સાબિત થઈ હતી.
કૌટુંબિક કલહ અને પકડાઈ જવાનો ડર
પ્રાથમિક તપાસ મુજબ, આ કરુણ અંજામ પાછળ કૌટુંબિક કલહ મુખ્ય કારણ હોવાનું મનાય છે. ગિરીશ અને પ્રિયંકાએ ચાર વર્ષ પહેલા પ્રેમ લગ્ન કર્યા હતા, પરંતુ ઘરકંકાસને કારણે મામલો હત્યા સુધી પહોંચી ગયો હતો. પોલીસ જ્યારે પ્રિયંકાના દાદાની ફરિયાદના આધારે તપાસ કરી રહી હતી અને ગિરીશની કડક પૂછપરછ શરૂ કરી, ત્યારે તેને લાગ્યું કે હવે તે પકડાઈ જશે. ગુનાનો ડર અને પાપનો બોજ તેને સતાવવા લાગતા તેણે હોસ્પિટલની ઇમારત પરથી છલાંગ લગાવી દીધી. આ ઘટનાએ એક હસતા-રમતા પરિવારનો કરુણ અંત આણ્યો છે અને પંથકમાં ભારે ગમગીની ફેલાવી દીધી છે.
