Abhijeet Dipke: રાજધાની દિલ્હીમાં ઉગ્ર પ્રદર્શનના બીજા દિવસે કોકરોચ જનતા પાર્ટીના પ્રમુખ અભિજીત દિપકેએ પોતાના એક્સ હેન્ડલ પર નવી પોસ્ટ કરી છે. તેમણે આ પોસ્ટમાં પોતાના સમર્થકો પાસે માફી માંગી છે. તેમણે ઘાયલ પ્રદર્શનકારીઓને પણ મોટી અપીલ કરી છે. આ પોસ્ટમાં તેમણે દિલ્હી પોલીસ પર આકરા પ્રહાર કર્યા છે. તેમણે ધર્મેન્દ્ર પ્રધાનના રાજીનામાને લઈને પણ વાત કરી છે. નોંધનીય છે કે ગયા સોમવારે થયેલા ઉગ્ર પ્રદર્શનમાં ઘણા વિદ્યાર્થી-વિદ્યાર્થીનીઓ ઘાયલ થયા હતા અને સાથે જ ઘણા પોલીસકર્મીઓને પણ ઇજાઓ પહોંચી હતી.
માફી માંગતા અભિજીત દિપકેએ સમર્થકોને કરી મોટી અપીલ
અભિજીત દિપકેએ કહ્યું કે હું મારા તમામ સમર્થકો પાસે માફી માંગુ છું, ખાસ કરીને તે યુવતીઓ પાસે જેમને પુરુષ પોલીસ અધિકારીઓએ નિર્દયતાથી માર માર્યો. અમે વધુ સારું કરી શકતા હતા. દિલ્હી પોલીસના અમાનવીય વર્તનથી તમને બચાવવા માટે હું વધુ સારું કરી શક્યો હોત. માત્ર એક ધર્મેન્દ્ર પ્રધાનને બચાવવા માટે – જેમને તેઓ 20થી વધુ વિદ્યાર્થીઓના મોત માટે જવાબદાર ગણાવે છે – સરકાર વધુ યુવા વિદ્યાર્થીઓનું લોહી વહાવવા માટે પણ તૈયાર હતી. જો તમે ઘાયલ થયા હો અને આ સંદેશ જોઈ રહ્યા હો, તો કૃપા કરીને મને ડાયરેક્ટ મેસેજ કરો. હું તમારી સાથે વ્યક્તિગત રીતે વાત કરવા અને માફી માંગવા માંગું છું. અમે તમારા બધા માટે લડતા રહીશું.
અભિજીત દિપકેની જાહેરાત – આજે પણ કરશે સંસદ કૂચ
કોકરોચ જનતા પાર્ટીના સ્થાપક અભિજીત દિપકેએ સોમવારે મોડી રાત્રે વધુ એક મોટી જાહેરાત કરી, જે સરકાર માટે મુશ્કેલી વધારી શકે છે. તેમણે કહ્યું કે સંસદ સુધીનું કૂચ મંગળવારે પણ સતત બીજા દિવસે ચાલુ રહેશે. ઇન્ડિયા ટુડેના અહેવાલ મુજબ, સોમવારે દિલ્હી પોલીસ દ્વારા પહેલાનું મંચ હટાવ્યા બાદ CJPના પ્રદર્શનકારીઓ ફરી જંતર-મંતર પર પરત ફર્યા અને ત્યાં એક તંબુ તથા કામચલાઉ મંચ તૈયાર કર્યો.
I apologise to all our supporters, especially the girls who were brutally beaten by male police officers.
We could have done better. I could have done better to protect you from the inhumane actions of the Delhi Police.
To protect one Dharmendra Pradhan, who is responsible for…
— Abhijeet Dipke (@abhijeet_dipke) July 21, 2026
ધર્મેન્દ્ર પ્રધાનના રાજીનામાની માંગ
નોંધનીય છે કે કોકરોચ જનતા પાર્ટીના પ્રદર્શનકારીઓ કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગ સાથે 6 જૂનથી જંતર-મંતર પર વિરોધ પ્રદર્શન કરી રહ્યા છે. શિક્ષણવિદ અને કાર્યકર સોનમ વાંગચુક પણ ત્યાં અનિશ્ચિત મુદતની ભૂખ હડતાળ પર હતા, ત્યારબાદ તેમને કસ્ટડીમાં લઈને સફદરજંગ હોસ્પિટલ મોકલવામાં આવ્યા હતા.
દિલ્હી પોલીસે 5 રાજ્યોની પોલીસને લખ્યો પત્ર
દિલ્હી પોલીસે ઉત્તર પ્રદેશ, હરિયાણા, પંજાબ, મધ્ય પ્રદેશ અને રાજસ્થાનના પોલીસ મહાનિર્દેશકોને પત્ર લખીને જંતર-મંતર ખાતે યોજાનારા પ્રદર્શનમાં ભીડ એકત્રિત થતી અટકાવવા માટે કડક પગલાં લેવા અપીલ કરી છે. રાજ્યોના પોલીસ તંત્રએ આ પત્રને આગળની કાર્યવાહી માટે જિલ્લા સ્તરના અધિકારીઓને મોકલી આપ્યો છે.
