Rahul Gandhi Statement: કોંગ્રેસ નેતા રાહુલ ગાંધીએ આરોપ લગાવ્યો કે શિક્ષણ વ્યવસ્થામાં સુધારાને લઈને યુવાનોના પ્રદર્શન બાદ પીએમ મોદીએ એવા વ્યક્તિને દેશના શિક્ષણમંત્રી બનાવ્યા છે, જે ‘બળાત્કારીઓનો બચાવ કરે છે.’ રાહુલે લોકસભામાં, પક્ષના મહાસચિવ પ્રિયંકા ગાંધી વાડ્રા દ્વારા કરવામાં આવેલી ટિપ્પણી બાદ શિક્ષણમંત્રી પ્રહલાદ જોશી પર નિશાન સાધ્યું. પ્રિયંકાએ બિલકીસ બાનો કેસમાં દોષિતોને જામીન મળવા સંબંધિત એક અખબારમાં પ્રકાશિત થયેલા સમાચારનો ઉલ્લેખ કરતાં લોકસભામાં જોશીને લઈને કેટલીક ટિપ્પણી કરી હતી, જેને સદનની કાર્યવાહીમાંથી દૂર કરવામાં આવી હતી.
ત્યારબાદ, સંસદ પરિસરમાં વિપક્ષના નેતા રાહુલ ગાંધીએ કહ્યું, “દેશમાં શિક્ષણ વ્યવસ્થામાં સુધારાને લઈને યુવાનોના પ્રદર્શન બાદ ભાજપે દેશના શિક્ષણમંત્રી તરીકે એવા વ્યક્તિની નિમણૂક કરી છે, જે બળાત્કારીઓનો બચાવ કરે છે. આથી વધુ શરમજનક વાત બીજી કોઈ હોઈ શકે નહીં કે કોઈ વ્યક્તિ બળાત્કારીઓને સંરક્ષણ આપવાની તરફેણ કરે અને એ જ વ્યક્તિ આજે દેશનો શિક્ષણમંત્રી હોય.”
તેમણે પ્રધાનમંત્રી નરેન્દ્ર મોદી પર નિશાન સાધતા કહ્યું, “પ્રધાનમંત્રીનું આ પગલું વિચિત્ર છે. તેમના મંત્રિમંડળમાં ઘણા લોકો છે, તેઓ કોઈને પણ શિક્ષણમંત્રી બનાવી શકતા હતા, પરંતુ તેમણે એવા વ્યક્તિની પસંદગી કરી, જે બળાત્કારીઓનો બચાવ કરે છે.” ત્યારબાદ, રાહુલ ગાંધીએ એક્સ પર પોસ્ટ કરીને લખ્યું, “બળાત્કારીઓનો બચાવ કરનાર વ્યક્તિથી વધુ નીચ કોઈ હોઈ શકે નહીં. પ્રહલાદ જોશી આપણી શિક્ષણ વ્યવસ્થા અને દરેક વિદ્યાર્થીનું અપમાન છે. હવે તે સંસ્થાઓ તેમની દેખરેખ હેઠળ રહેશે, જેમાં કરોડો યુવતીઓ અભ્યાસ કરે છે.” તેમણે ભારપૂર્વક કહ્યું કે ભારતની મહિલાઓ પ્રધાનમંત્રી મોદીના નવા શિક્ષણમંત્રીને ક્યારેય સ્વીકારશે નહીં.
પ્રિયંકાના નિવેદન પર હોબાળો
પ્રિયંકા ગાંધીએ જ્યારે લોકસભામાં આ વિષયનો ઉલ્લેખ કર્યો ત્યારે સત્તાપક્ષના સભ્યોએ વાંધો ઉઠાવ્યો અને તેને શિક્ષણમંત્રી વિરુદ્ધ આધારવિહોણી તથા આપત્તિજનક ટિપ્પણી ગણાવી. સદનમાં આ મુદ્દે થોડા સમય સુધી હોબાળાની સ્થિતિ પણ રહી. સંસદીય કાર્યમંત્રી કિરણ રિજિજુએ વાંધો ઉઠાવતા કહ્યું કે નવા શિક્ષણમંત્રી વિશે કરવામાં આવેલી ટિપ્પણી ચરિત્રહનન સમાન છે અને કોઈપણ પ્રકારની ચકાસણી વિના આવા આરોપો લગાવવું યોગ્ય નથી.
પ્રિયંકા ગાંધી પાસે માફીની માંગ
તેમણે કહ્યું કે જો પ્રિયંકા ગાંધી પોતાના આરોપોની ચકાસણી કરી શકતી નથી તો તેમણે સદનમાંથી માફી માંગવી જોઈએ. લોકસભાના અધ્યક્ષ ઓમ બિરલાએ કહ્યું કે તથ્યો વિના આવી વાતો સદનમાં કરવી જોઈએ નહીં. બીજી તરફ, કેન્દ્રીય શિક્ષણમંત્રી પ્રહલાદ જોશીએ કહ્યું કે પ્રિયંકા ગાંધી વાડ્રા આ રીતે કોઈપણ આરોપ લગાવીને બચી શકે નહીં. તેમણે માંગ કરી કે કોંગ્રેસના સાંસદ સદનમાંથી માફી માંગે અને તેમના વિરુદ્ધ કાર્યવાહી કરવામાં આવે. પ્રિયંકા ગાંધીએ કહ્યું કે તેઓ યોગ્ય માધ્યમ દ્વારા સદનમાં પોતાની વાતની ચકાસણી કરશે.
