Western Railway Exam Scam: SWI પરીક્ષામાં ગોઠવાયેલું ભ્રષ્ટાચારનું જાળું બહાર આવ્યું, લોન લઈને લાંચ ચૂકવવાનું પણ શીખવાતું હતું
Western Railway Exam Scam: પશ્ચિમ રેલવેના સ્ટાફ વેલફેર ઇન્સ્પેક્ટર (SWI ) પદ માટે યોજાયેલી વિભાગીય પ્રમોશન પરીક્ષામાં ચોંકાવનારો અને સંગઠિત ભ્રષ્ટાચારનો મામલો સામે આવ્યો છે. CBIની તપાસમાં ખુલાસો થયો છે કે પરીક્ષામાં પાસ થવા માટે ઉમેદવારોને નિયમિત રીતે કોચિંગ આપવામાં આવતું હતું. આ ક્લાસોમાં માત્ર સિલેબસ જ ભણાવવામાં આવતો નહોતો, પરંતુ લાંચ આપવા માટે ફંડ કેવી રીતે એકત્રિત કરવું અને જો વિજિલન્સ તપાસ થાય તો તેનો સામનો કેવી રીતે કરવો તે પણ શીખવવામાં આવતું હતું. રેલવે સૂત્રોના જણાવ્યા મુજબ, આ શંકાસ્પદ કોચિંગ ક્લાસો એક વરિષ્ઠ રેલવે અધિકારીની પત્ની દ્વારા ભાડે લેવામાં આવેલી કમર્શિયલ પ્રોપર્ટીમાંથી ચલાવવામાં આવતી હતી.
લોન લઈને લાંચ ચૂકવવાનો ખેલ અને સર્વરમાં હેરફેર
તપાસમાં એ પણ સામે આવ્યું છે કે SWI પદ પર પ્રમોશન નિશ્ચિત કરવા માટે ઉમેદવારો પાસેથી 2 લાખથી 5 લાખ રૂપિયા સુધીની લાંચ લેવામાં આવતી હતી. ચોંકાવનારી વાત એ છે કે ઉમેદવારોને પરીક્ષા પહેલાં જ એક ક્રેડિટ કોઓપરેટિવ સોસાયટીમાંથી લોન લેવાની તાલીમ આપવામાં આવતી હતી. આંતરિક તપાસમાં પરીક્ષા પહેલાં લોનના વિતરણમાં અચાનક આવેલા મોટા વધારાનો ખુલાસો થયો હતો, જેમાં ઘણા ઉમેદવારોએ પરીક્ષાની તારીખોની આસપાસ જ મોટી રકમની લોન લીધી હતી.
સર્વર પણ હેક કરવામાં આવ્યો
16 માર્ચ 2024ના રોજ યોજાયેલી આ કમ્પ્યુટર આધારિત પરીક્ષામાં ગંભીર ટેક્નિકલ ગડબડીઓ પણ સામે આવી હતી. પરીક્ષા નિર્ધારિત સમય કરતાં અંદાજે બે કલાકના વિલંબથી શરૂ થઈ હતી અને પૂર્ણ થયા બાદ તરત બંધ થવાના બદલે સર્વર પર બે દિવસથી વધુ સમય સુધી સક્રિય રહી હતી. તપાસ અધિકારીઓના જણાવ્યા મુજબ, સર્વર પર એનીડેસ્ક જેવી રિમોટ-એક્સેસ સોફ્ટવેર પણ ઇન્સ્ટોલ કરવામાં આવી હતી, જેથી પરીક્ષા પૂર્ણ થયા પછી પણ સર્વર સુધી પહોંચ મેળવી શકાય. આ ઉપરાંત, સર્વરને બાદમાં ફોર્મેટ કરવામાં આવ્યો હતો કે નહીં અને પરીક્ષા સાથે સંકળાયેલા કેટલાક રેલવે અધિકારીઓના ખાતાઓમાં મોટી માત્રામાં શંકાસ્પદ રકમ જમા થવાના મામલાઓની પણ તપાસ ચાલી રહી છે.
ચાર ઉમેદવારોને શંકાસ્પદ રીતે મળ્યા હતા સૌથી વધુ ગુણ
આ સમગ્ર કૌભાંડનો પર્દાફાશ ત્યારે થયો જ્યારે પશ્ચિમ રેલવેના વિજિલન્સ વિભાગે 16 માર્ચ 2024ના રોજ યોજાયેલી પરીક્ષામાં થયેલી અનિયમિતતાઓ અંગેની ફરિયાદ CBI ને સોંપી હતી. પરીક્ષામાં કુલ 100 ઉમેદવારો સામેલ થયા હતા, જેમાંથી ચાર રેલવે કર્મચારીઓએ 87.67 ટકાથી 90.33 ટકા વચ્ચે અસાધારણ રીતે ઊંચા ગુણ મેળવ્યા હતા. CBI સૂત્રોના જણાવ્યા મુજબ, આ ચારેય ઉમેદવારોએ પરીક્ષા પહેલાં જ લોન લીધી હતી અને તે દરમિયાન તેમના ખાતાઓમાં નાણાંકીય લેવડદેવડ તેમજ ATM માંથી શંકાસ્પદ રોકડ ઉપાડના પુરાવા પણ મળ્યા છે. હાલ CBI એ આ મામલે વરિષ્ઠ અધિકારીઓ, ટેક્નિકલ સ્ટાફ, ક્લાર્કો અને પ્રમોશન મેળવનાર ચાર ઇન્સ્પેક્ટરો સામે ગુનો નોંધ્યો છે.
