Asaram Parole: રાજસ્થાન હાઈકોર્ટનો આસારામને રાહતનો આદેશ, 20 દિવસની પેરોલ મંજૂર
Asaram Parole: રાજસ્થાન હાઈકોર્ટે બળાત્કારના બે કેસોમાં સજા ભોગવી રહેલા સ્વયંભૂ બાબા આસારામને 20 દિવસની નિયમિત પેરોલ આપવાનો આદેશ આપતાં જણાવ્યું કે રાજ્ય સરકાર પેરોલ અરજી નામંજૂર કરવા માટે કોઈ મજબૂત અને માન્ય આધાર રજૂ કરવામાં નિષ્ફળ રહી છે.
અહેવાલ મુજબ, હાઈકોર્ટે સોમવાર (3 ઓગસ્ટ)ના રોજ જણાવ્યું હતું કે રાજ્ય સરકાર આસારામની પેરોલ અરજી નામંજૂર કરવાના પોતાના નિર્ણયને યોગ્ય ઠેરવવામાં નિષ્ફળ રહી છે. અદાલતે એ પણ જણાવ્યું કે અગાઉ મળેલી વચગાળાની મુક્તિ દરમિયાન આસારામનું વર્તન સંતોષકારક રહ્યું હતું અને તેઓ 13 વર્ષથી વધુ સમયથી જેલમાં રહી ચૂક્યા છે.
અદાલતે પોતાના આદેશમાં જણાવ્યું કે માત્ર સામાન્ય અથવા અસ્પષ્ટ વાંધાઓ પેરોલ નકારવા માટે પૂરતા નથી. જો કોઈ દોષિતની પેરોલ અરજી નામંજૂર કરવામાં આવે, તો તેના માટે સ્પષ્ટ અને મજબૂત કારણ હોવું જરૂરી છે.
સમાચાર એજન્સી પીટીઆઈના જણાવ્યા મુજબ, કાર્યકારી મુખ્ય ન્યાયાધીશ સંજીવ પ્રકાશ શર્મા અને જસ્ટિસ સંજીત પુરોહિતની ખંડપીઠે સોમવારે આ આદેશ આપ્યો હતો. અદાલતે આસારામને નિયમિત પેરોલ આપતાં 50,000 રૂપિયાના વ્યક્તિગત બોન્ડ અને 25,000-25,000 રૂપિયાની બે જામીનગીરી જમા કરાવ્યા બાદ 20 દિવસ માટે મુક્ત કરવાનો નિર્દેશ આપ્યો છે.
અદાલતે સારા વર્તનનો આપ્યો ઉલ્લેખ
સુનાવણી દરમિયાન અદાલતે જણાવ્યું કે જોધપુર સેન્ટ્રલ જેલમાં બંધ આસારામ 13 વર્ષ, એક મહિનો અને 24 દિવસ જેલમાં વિતાવી ચૂક્યા છે.
ખંડપીઠે એ પણ નોંધ્યું કે તેમને અગાઉ અનેક વખત વચગાળાના જામીન મળ્યા હતા અને તે દરમિયાન તેમણે કોઈપણ શરતનું ઉલ્લંઘન કર્યું નહોતું. તેમની સામે ફરાર થવાનો પ્રયાસ, સાક્ષીઓને પ્રભાવિત કરવાનો પ્રયાસ અથવા કાયદો અને વ્યવસ્થાની સમસ્યા ઊભી કરવાનો પણ કોઈ રેકોર્ડ નથી.
રાજ્ય સરકારે કર્યો વિરોધ
રાજ્ય સરકારે પેરોલનો વિરોધ કરતાં દલીલ કરી કે મુક્ત થયા બાદ આસારામ ફરાર થઈ જવાની શક્યતા છે. સરકારે એ પણ જણાવ્યું કે રાજસ્થાનની બહાર તેમના વિરુદ્ધ અન્ય ફોજદારી કેસો બાકી છે અને ગુજરાતમાં પણ તેમને દોષિત ઠેરવવામાં આવ્યા છે.
સરકારે એ પણ દલીલ કરી કે તેમની સારવાર ચાલી રહી છે, તેમને પેરોલ માટે તબીબી રીતે યોગ્ય જાહેર કરવામાં આવ્યા નથી અને તેમની મુક્તિથી પીડિતાના પરિવારની સુરક્ષાને જોખમ થઈ શકે છે.
હાઈકોર્ટે રાજ્યના વાંધાઓ નામંજૂર કર્યા
હાઈકોર્ટે જણાવ્યું કે રાજ્ય સરકારની આ આશંકા કે આસારામ ફરાર થઈ શકે છે અથવા કોઈ પ્રકારનો ખતરો ઊભો કરી શકે છે, તે માત્ર અનુમાન પર આધારિત છે. તેના સમર્થનમાં કોઈ મજબૂત પુરાવો રજૂ કરવામાં આવ્યો નથી.
અદાલતે એ પણ સ્પષ્ટ કર્યું કે આસારામની પેરોલ અરજી પર નિર્ણય ‘રાજસ્થાન પ્રિઝનર્સ રિલીઝ ઑન પેરોલ રૂલ્સ’ હેઠળ લેવો જોઈએ. અન્ય રાજ્યોમાં બાકી રહેલા કેસો અથવા અન્ય કેસોમાં થયેલી સજાને આ કેસમાં પેરોલ નકારવાનો આધાર બનાવી શકાય નહીં.
માહિતી મુજબ, 27 મેના રોજ રાજસ્થાન હાઈકોર્ટે 2013ના સગીર સાથેના બળાત્કાર કેસમાં આસારામની દોષિત ઠરાવતી કાર્યવાહી અને આજીવન કેદની સજાને યથાવત રાખી હતી.
તબીબી આધાર પર સુપ્રીમ કોર્ટમાં પણ સુનાવણી
આ પહેલાં સુપ્રીમ કોર્ટે 30 જૂનના રોજ સ્વયંભૂ બાબા આસારામની સજા પર સ્થગિતી મૂકવા અથવા આ તબક્કે તેમને જામીન આપવા અંગે વિચારવાનો ઇનકાર કર્યો હતો.
સુનાવણી દરમિયાન અદાલતને જણાવાયું હતું કે એમ્સના મેડિકલ પેનલે પોતાની અહેવાલમાં જણાવ્યું છે કે આસારામને હોસ્પિટલમાં દાખલ કરવાની જરૂર નથી, પરંતુ તેમને ચોવીસે કલાક તબીબી દેખરેખ અને સહાયની જરૂર છે.
હવે જસ્ટિસ એમએમ સુંદરેશ અને જસ્ટિસ પીબી વરાલેની ખંડપીઠે કેસની આગામી સુનાવણી 6 ઓગસ્ટ માટે નિર્ધારિત કરી છે.
બંને કેસોમાં આજીવન કેદની સજા
ઉલ્લેખનીય છે કે આસારામ બળાત્કારના બે કેસોમાં દોષિત છે અને 31 ઑગસ્ટ 2013થી જેલમાં છે. તેમના પર પોક્સો કાયદો અને અનુસૂચિત જાતિ તથા જનજાતિ અત્યાચાર નિવારણ અધિનિયમ હેઠળ આરોપો છે.
જાન્યુઆરી 2023માં ગાંધીનગરની સેશન્સ કોર્ટે આસારામને આજીવન કારાવાસની સજા ફટકારી હતી. અદાલતે નોંધ્યું હતું કે તેમણે 2001થી 2006 દરમિયાન પોતાના મોટેરા આશ્રમમાં 16 વર્ષની યુવતી સાથે અનેક વખત બળાત્કાર કર્યો હતો. તેમને ભારતીય દંડ સંહિતાની અનેક કલમો હેઠળ દોષિત ઠેરવવામાં આવ્યા હતા, જેમાં બળાત્કાર, અપ્રાકૃતિક ગુનો, ગેરકાયદેસર રીતે બંધક બનાવી રાખવું, ધમકી આપવી, હુમલો કરવો અથવા કોઈને રોકવા માટે બળનો ઉપયોગ કરવો અને છેડછાડનો સમાવેશ થાય છે.
આ ઉપરાંત ગાંધીનગરની એક અદાલતે આસારામ વિરુદ્ધ 2013માં નોંધાયેલા એક કેસમાં આજીવન કારાવાસની સજા ફટકારી હતી. તેમના પર અમદાવાદ નજીક મોટેરા સ્થિત પોતાના આશ્રમમાં 2001થી 2006 દરમિયાન સુરતની રહેવાસી એક મહિલા અનુયાયીનું અનેક વખત યૌન શોષણ કરવાનો આરોપ છે.
તેમને ભારતીય દંડ સંહિતા (IPC)ની કલમ 376 (2)(સી) (બળાત્કાર), 377 (અપ્રાકૃતિક ગુનો), 342 (ગેરકાયદેસર રીતે કસ્ટડીમાં રાખવું), 354 (મહિલાની લાજ ભંગ કરવાના ઇરાદાથી હુમલો અથવા ગુનાહિત બળનો ઉપયોગ), 357 (કોઈ વ્યક્તિને ગેરકાયદેસર રીતે બંધક બનાવવાના પ્રયાસમાં હુમલો અથવા ગુનાહિત બળનો ઉપયોગ) અને 506 (ગુનાહિત ધમકી) હેઠળ દોષિત ઠેરવવામાં આવ્યા હતા.
ઉલ્લેખનીય છે કે દોષિત ઠરતા પહેલાં આસારામને એક અગ્રણી ધાર્મિક નેતા માનવામાં આવતા હતા. તેમણે 1970ના દાયકામાં અમદાવાદમાં સાબરમતી નદીના કિનારે પોતાનો પ્રથમ આશ્રમ બનાવ્યો હતો અને ત્યારબાદ કરોડો રૂપિયાનું વ્યવસાયિક સામ્રાજ્ય ઊભું કર્યું હતું.
