Travis Head Allan Border Medal: એલેક્સ કેરીને એક મતથી પાછળ છોડીને ટ્રેવિસ હેડે રચ્યો ઇતિહાસ, સતત બીજી વખત મળ્યો એલન બોર્ડર મેડલ
Travis Head Allan Border Medal: ટ્રેવિસ હેડ સતત બીજી વખત ‘એલન બોર્ડર મેડલ’ એવોર્ડ જીતનારા પાંચમા ખેલાડી બની ગયા. ઓસ્ટ્રેલિયાના સર્વશ્રેષ્ઠ પુરુષ ક્રિકેટર માટેના આ પ્રતિષ્ઠિત વ્યક્તિગત એવોર્ડ માટેની કઠિન સ્પર્ધામાં તેમણે પોતાના મિત્ર એલેક્સ કેરીને ખૂબ જ નજીવા અંતરથી પાછળ છોડી દીધા. હેડ હવે સ્ટીવ સ્મિથ અને નાથન લાયનની સાથે એકથી વધુ વખત ‘એલન બોર્ડર મેડલ’ એવોર્ડ જીતનારા ખેલાડીઓની યાદીમાં સામેલ થઈ ગયા છે. સતત બે વર્ષ સુધી આ એવોર્ડ જીતનારા અન્ય ખેલાડીઓમાં રિકી પોન્ટિંગ, માઇકલ ક્લાર્ક, ડેવિડ વોર્નર અને શેન વોટસન સામેલ છે. 29 જાન્યુઆરી 2025થી 8 જાન્યુઆરી 2026 સુધી ચાલેલી મતદાન પ્રક્રિયામાં હેડે કેરીને માત્ર એક મતથી અને ઝડપી બોલર મિચેલ સ્ટાર્કને ત્રણ મતથી પાછળ છોડ્યા.
એવોર્ડ મળ્યા બાદ હેડે શું કહ્યું?
પૂર્વ ઓસ્ટ્રેલિયન કેપ્ટન એલન બોર્ડર પાસેથી સતત બીજો ‘એલન બોર્ડર મેડલ’ એવોર્ડ મેળવ્યા બાદ હેડે કહ્યું, ‘મારા માટે આ ખૂબ મોટું સન્માન અને સૌભાગ્યની વાત છે કે એલન બોર્ડર પોતે અહીં હાજર હતા. ગયા વર્ષે શ્રીલંકામાં યોજાયેલા સમારોહની સરખામણીમાં આ વખતે સૌથી મોટો તફાવત એ હતો કે તેમણે પોતે મને આ એવોર્ડ પ્રદાન કર્યો.’
તેમણે કહ્યું, ‘આ વિચારીને ખૂબ સારું લાગે છે કે હવે મારી પાસે બે ‘એલન બોર્ડર મેડલ’ છે. 20 વર્ષ બાદ મારા બાળકો તેમને જોશે અને હું તેમને તેમના વિશે જણાવી શકીશ. બંને એવોર્ડમાં ભારત અને ઇંગ્લેન્ડ સામેની સિરીઝનું યોગદાન હોવું પણ મારા માટે ખૂબ જ ખાસ છે.’
મિચેલ સ્ટાર્ક બન્યા ટેસ્ટ પ્લેયર ઓફ ધ યર
મિચેલ સ્ટાર્કને દિવંગત મહાન સ્પિનર શેન વોર્નના પિતા કીથ વોર્ને ‘શેન વોર્ન મેન્સ ટેસ્ટ પ્લેયર ઓફ ધ યર’ એવોર્ડ પ્રદાન કર્યો. મિચેલ માર્શને વર્ષના સર્વશ્રેષ્ઠ એકદિવસીય ખેલાડી તરીકે પસંદ કરવામાં આવ્યા, જ્યારે ટિમ ડેવિડે ‘T20 ઇન્ટરનેશનલ ક્રિકેટર ઓફ ધ યર’ એવોર્ડ જીત્યો. મહિલા ક્રિકેટ અને પુરુષ ક્રિકેટ ટીમના વ્યસ્ત કાર્યક્રમોના કારણે ક્રિકેટ ઓસ્ટ્રેલિયા ઔપચારિક એવોર્ડ સમારોહ યોજી શક્યું નહોતું, તેથી અનાબેલ સધરલેન્ડને ફેબ્રુઆરીમાં ‘બેલિન્ડા ક્લાર્ક મેડલ’ એવોર્ડ પ્રદાન કરવામાં આવ્યો.
