નવી દિલ્હી: PM નરેન્દ્ર મોદીએ શનિવારે નવી દિલ્હીમાં 18મા BRICS શિખર સંમેલનથી અલગ અબુધાબીના ક્રાઉન પ્રિન્સ શેખ ખાલિદ બિન મોહમ્મદ બિન જાયદ અલ નાહયાન સાથે મુલાકાત કરી. બંને નેતાઓએ ભારત અને સંયુક્ત આરબ અમીરાત (UAE) વચ્ચેની વ્યાપક વ્યૂહાત્મક ભાગીદારીને વધુ મજબૂત બનાવવાની સાથે સંરક્ષણ, અવકાશ, પરમાણુ ઊર્જા, ટેક્નૉલૉજી અને નવીનતા જેવા વ્યૂહાત્મક તથા ઉભરતા ક્ષેત્રોમાં સહયોગ વધારવાની તકો અંગે ચર્ચા કરી. બેઠકમાં બંને નેતાઓએ ભારત-UAE સંબંધોની મજબૂતીને રેખાંકિત કરી. તેમણે કહ્યું કે બંને દેશોની ભાગીદારી મજબૂત રાજકીય, સાંસ્કૃતિક, વ્યાપારી, ઊર્જા અને જન-જનના સંબંધો પર આધારિત છે.
BRICSમાં UAEની ભૂમિકાની પ્રશંસા
મોદીએ ભારતના અધ્યક્ષપદ હેઠળ BRICSમાં UAEની સક્રિય અને રચનાત્મક ભાગીદારીની પ્રશંસા કરી. બંને નેતાઓએ ભારતના અધ્યક્ષપદ દરમિયાન સંગઠનની અંદર થયેલા સકારાત્મક પરિણામોનું સ્વાગત કર્યું.
નવા સાર્વભૌમ રોકાણ ભંડોળ અંગે પણ ચર્ચા
મોદી અને શેખ ખાલિદે UAEના નવા સાર્વભૌમ રોકાણ ભંડોળ લિમાદ (L’Imad)ની ભૂમિકા અંગે પણ ચર્ચા કરી. બંનેએ માન્યું કે આ ભંડોળ રોકાણ તથા આર્થિક ભાગીદારીને વધુ ગહન બનાવી શકે છે.
મલેશિયા સાથે સંરક્ષણ સહયોગ વધશે
મોદી અને મલેશિયાના PM અનવર ઇબ્રાહિમની બેઠકમાં સંરક્ષણ-સુરક્ષાથી લઈને સેમિકન્ડક્ટર, ડિજિટલ ઇકૉનૉમી અને ઊર્જા સુધીના સહયોગની સમીક્ષા કરવામાં આવી. ભારત અને મલેશિયાએ પોતાની વ્યાપક વ્યૂહાત્મક ભાગીદારીને વધુ મજબૂત બનાવવા પર ભાર મૂક્યો છે. મોદીએ BRICS સંમેલનથી અલગ મલેશિયાના PM અનવર ઇબ્રાહિમ સાથે દ્વિપક્ષીય બેઠક કરી.
ઇથિયોપિયામાં નિકાસની તકો વધશે
ભારત અને ઇથિયોપિયા વચ્ચે સંરક્ષણ તથા સુરક્ષા સહયોગને આગળ વધારવા પર ભાર મૂકવામાં આવ્યો છે. PMએ ઇથિયોપિયાના PM ડૉ. અબિય અહમદ અલી સાથે પણ દ્વિપક્ષીય બેઠક કરી. આર્થિક સહયોગ સાથે સંરક્ષણ તથા સુરક્ષા ભાગીદારી અને ક્ષમતા નિર્માણ જેવા મુખ્ય ક્ષેત્રો પર ચર્ચા કરવામાં આવી.
ઓડિશામાં મોટા રોકાણનું સ્વાગત
બંને નેતાઓએ UAEની ઇન્ટરનેશનલ હોલ્ડિંગ કંપની (IHC) દ્વારા ઓડિશામાં 11.5 અબજ ડૉલરના એકીકૃત ગ્રીનફિલ્ડ એલ્યુમિનિયમ પ્રોજેક્ટમાં રોકાણની જાહેરાતનું સ્વાગત કર્યું.
