US Student Visa: અમેરિકામાં રાષ્ટ્રપતિ ડોનાલ્ડ ટ્રમ્પની સરકાર હેઠળ વિદેશી સ્ટુડન્ટ્સને લઈને અનેક પ્રકારના નિયમો લાવવામાં આવ્યા છે, જેના કારણે ભારતીયો માટે અહીં અભ્યાસ કરવો મુશ્કેલ બની ગયો છે. કેટલાક નિયમો લાગુ થવાના છે અને કેટલાક પ્રસ્તાવિત છે. સૌથી વધુ મુશ્કેલી F-1 વીઝા એટલે કે સ્ટુડન્ટ વીઝા મેળવવામાં થઈ રહી છે, કારણ કે તેના વિના અમેરિકામાં પ્રવેશ મળી શકવાનો નથી. સોશિયલ મીડિયા પ્રોફાઇલ ચેકિંગ બાદ વીઝા આપવાનો નિયમ લાગુ થયા પછી મુશ્કેલીઓ વધુ વધી છે.
ઇમિગ્રેશન એક્સપર્ટ્સનું કહેવું છે કે નવા નિયમોને કારણે અમેરિકામાં અભ્યાસ માટે આવતા વિદેશી સ્ટુડન્ટ્સની સંખ્યા ઘટી શકે છે. જોકે તેમનું એ પણ કહેવું છે કે હાલની પરિસ્થિતિ અત્યંત મુશ્કેલ દેખાતી હોવા છતાં ભારતીય સ્ટુડન્ટ્સ માટે અમેરિકામાં હાયર એજ્યુકેશનનું આકર્ષણ ઓછું થવાનું નથી. એક્સપર્ટ્સે અમેરિકામાં ઇમિગ્રેશન સાથે જોડાયેલા ફેરફારોને ધ્યાનમાં રાખીને એ પણ જણાવ્યું છે કે ભારતીય સ્ટુડન્ટ્સે કઈ 4 જરૂરી બાબતોનું ધ્યાન રાખવું પડશે.
પહેલી વાત: ડિગ્રી પસંદ કરો, અમેરિકા નહીં
- ઇમિગ્રેશન વકીલ જ્ઞાનમુકન સેન્થુરજોથીએ જણાવ્યું કે સ્ટુડન્ટ્સે એવો કોર્સ પસંદ કરવો જોઈએ, જે તેમના કામનો હોય, માત્ર એટલા માટે નહીં કે તે કોર્સના કારણે તેમને અમેરિકામાં જવાની તક મળે.
- સેન્થુરજોથીએ આગળ જણાવ્યું કે અમેરિકન ડિગ્રીને ગ્રીન કાર્ડ મેળવવાનું માધ્યમ ન માનવું જોઈએ. ગ્લોબલ સ્ટાન્ડર્ડ મુજબ નૉલેજ અને પ્રેક્ટિકલ એક્સપિરિયન્સ મેળવવાના હેતુથી અમેરિકા જવું જોઈએ.
- ઇમિગ્રેશન વકીલે જણાવ્યું કે જો તમે યોગ્ય રીતે આવું કરો છો, તો H-1B, PhD, પોસ્ટડૉક્ટરલ રિસર્ચની જગ્યાએ J-1 એક્સચેન્જની તક અને લાંબા ગાળે ગ્રીન કાર્ડ પણ સારા કામના પરિણામ તરીકે મળી શકે છે.
- ઇમિગ્રેશનની અન્ય એક્સપર્ટ વીણા વિજય અનંતે જણાવ્યું, ‘આ યુનિવર્સિટી અને કોર્સ જ શા માટે પસંદ કર્યો, જો તેનો જવાબ છે કે તે અમેરિકામાં છે, તો આ સારો પ્લાન નથી.’
બીજી વાત: આર્થિક પરિસ્થિતિનું ધ્યાન રાખો
આ વર્ષે ઇમિગ્રેશન પૉલિસીમાં જેટલી વખત ફેરફારો થયા છે, તેને જોતા હવે કોઈ પરિવારની આર્થિક યોજના માટે માત્ર અનુમાનો પર આધાર રાખવો સુરક્ષિત નથી. જ્ઞાનમુકન સેન્થુરજોથીએ જણાવ્યું કે એ માનવું હવે ભૂલ હશે કે એજ્યુકેશન લોનની ભરપાઈ અમેરિકામાં ચોક્કસ નોકરીથી થઈ જશે. તેમણે જણાવ્યું, ‘પોતાને પૂછો: જો અમેરિકામાં મને અપેક્ષા મુજબ નોકરી ન મળે તો પણ શું આ અભ્યાસ મારા માટે ફાયદાકારક રહેશે?’
ત્રીજી વાત: તપાસ અને વિલંબ સામાન્ય બાબત
જો કોઈ ભારતીય સ્ટુડન્ટ આગામી 2 વર્ષમાં અમેરિકન યુનિવર્સિટીઝમાં અપ્લાય કરવાની યોજના બનાવી રહ્યો હોય, તો તેણે તપાસ, વિલંબ, લાંબી એડમિનિસ્ટ્રેટિવ પ્રોસેસ અને પૉલિસીમાં ફેરફાર માટે તૈયાર રહેવું જોઈએ. એક્સપર્ટનું કહેવું છે, ‘આ એવી આશ્ચર્યજનક બાબત નથી, જે માત્ર કોઈ ખરાબ વર્ષમાં જ બને. તેને પહેલા દિવસથી જ તમારી ટાઇમલાઇન અને બજેટમાં સામેલ કરો.’
ચોથી વાત: ઓછા ખર્ચવાળા વિકલ્પો જુઓ
ઇમિગ્રેશન એક્સપર્ટ સેન્થુરજોથીએ જણાવ્યું કે હવે ઘણી યુનિવર્સિટીઝ કો-ઑપ સિસ્ટમ, ઇન્ટર્નશિપ સાથે જોડાયેલા કોર્સ અથવા અંતિમ વર્ષ વિદેશમાં પસાર કરવાની તક આપે છે, જેના કારણે સ્ટુડન્ટ ખૂબ ઓછા ખર્ચમાં અમેરિકન ડિગ્રી સાથે ગ્રેજ્યુએટ થઈ શકે છે. તેમણે જણાવ્યું, ‘કેટલીક US યુનિવર્સિટીઝ ભારતમાં સીધી પોતાની હાજરી ઊભી કરી રહી છે. જે પરિવારો ખર્ચ અને અમેરિકામાં સંપૂર્ણ અભ્યાસ સાથે જોડાયેલી અનિશ્ચિતતાઓ વચ્ચે સંતુલન બનાવવા માગે છે, તેમના માટે આ વિકલ્પો પર ગંભીરતાથી વિચાર કરવો જોઈએ. તેમને ઓછા મહત્વના વિકલ્પો ન માનવા જોઈએ.’
