ગુજરાત ATSએ અરબી સમુદ્રમાં 3000 કરોડની ડ્રગ્સ પકડી, 5ની ધરપકડ
Gujarat ATS Drug Seizure: ગુજરાત ATSએ ઇન્ડિયન કોસ્ટ ગાર્ડ સાથે મળીને અરબી સમુદ્રમાંથી ત્રણ હજાર કરોડ રૂપિયાની 526 કિલો ડ્રગ્સ પકડીને મોટી સફળતા મેળવી છે. તેમાં પાંચ પાકિસ્તાની નાગરિકોને પણ પકડવામાં આવ્યા છે. બોટના તંદેલ (કપ્તાન) પાસેથી સ્ટારલિંક ડિવાઇસ પણ મળી આવ્યું છે. પાકિસ્તાનની આ રમતને ગુજરાત ATSના પોલીસ ઇન્સ્પેક્ટર J M પટેલને મળેલા એક ગુપ્ત ઇનપુટે નિષ્ફળ બનાવી દીધી. તેનાથી દાઉદ ઇબ્રાહિમ D કંપનીમાં ડ્રગ્સનું સિન્ડિકેટ સંભાળતા ઇન્ટરનેશનલ ડ્રગ્સ માફિયા હાજી સલીમને મોટો ફટકો પડ્યો છે.
ગુજરાત ATSના DIG સુનીલ જોશીએ NBTને જણાવ્યું કે આઝાદ નામની આ બોટ ભારત માટે ઈરાનના કોનાર્કથી રવાના થઈ હતી. તેમાં પાકિસ્તાનના ગ્વાદરમાં બીજી બોટમાંથી 400 કિલો મેથામ્ફેટામાઇન અને 126 કિલો હેરોઇનની આ ખેપ લોડ કરવામાં આવી હતી. આ અંગે 10 સપ્ટેમ્બરે જ અમને એક ગુપ્ત ઇનપુટ મળી ગયું હતું. જેમાં જાણવા મળ્યું હતું કે અમદાવાદમાં એક નાઇજિરિયન નાગરિકે એક વચેટિયા મારફતે ડ્રગ્સની મોટી ડિલિવરી માટે ‘સિક્રેટ’ બેઠક કરી હતી. તેમની આ સિક્રેટ બેઠકનું ઇનપુટ પણ અમને મળી ગયું હતું.
ડ્રગ્સની આ ખેપ આઝાદ નામની ઈરાની બોટમાંથી મુંબઈ-કોચ્ચિ-લક્ષદ્વીપ વિસ્તારમાં ભારતીય સમુદ્રી સીમાની અંદર તમિલનાડુની એક બોટમાં ટ્રાન્સફર કરવાની હતી. જ્યાંથી પછી આ ડ્રગ્સ નાના-નાના ભાગમાં પંજાબમાં નાઇજિરિયન અને સ્થાનિક ડ્રગ્સ માફિયા સુધી પહોંચાડવાની હતી. આ માટે હવાલા મારફતે અગાઉથી અડધી રકમ પણ ટ્રાન્સફર થઈ ગઈ હતી. બાકીની રકમ માલ પહોંચ્યા બાદ આપવાની હતી. તેમને આ અંગે દાઉદ ઇબ્રાહિમનું ડ્રગ સિન્ડિકેટ સંભાળતા ‘લોર્ડ ઑફ ડ્રગ્સ’ હાજી સલીમ વિશે પણ ઇનપુટ મળી ગયું હતું. જેણે ડ્રગ્સની આ ખેપ પાકિસ્તાનથી ભારતમાં મોકલવાનું કામ કર્યું હતું.
સમુદ્રના માર્ગે ખાસ કરીને અરબી અને હિંદ મહાસાગરના માર્ગોથી ડ્રગ્સની તસ્કરી કરતો તેને માસ્ટર માનવામાં આવે છે. જે પાકિસ્તાનના કરાચી અને બલૂચિસ્તાનથી આ સિન્ડિકેટ ચલાવે છે. આ ઇનપુટ ઇન્ડિયન કોસ્ટ ગાર્ડ સાથે શેર કરવામાં આવ્યું હતું. તેના તરત બાદ ગુજરાત ATSના SP કે. સિદ્ધાર્થ સાથે ઇન્સ્પેક્ટર બી.એચ. કોરોટ અને વી.એન. વાઘેલા સહિત ATS અધિકારીઓની એક ટીમને કોચ્ચિ મોકલવામાં આવી. જેમાં કોસ્ટ ગાર્ડના અધિકારીઓ પણ સામેલ કરવામાં આવ્યા. ત્યાં ટીમે સમુદ્રમાં બોટ અને હેલિકોપ્ટર દ્વારા પણ સંબંધિત બોટની ઓળખ કરવા માટે કામ શરૂ કર્યું. નાની-મોટી દોઢ હજારથી પણ વધુ બોટ પર નજર રાખ્યા બાદ અંતે 25 સપ્ટેમ્બરે આઝાદ નામની આ બોટને લક્ષદ્વીપની પશ્ચિમમાં ભારતીય સમુદ્રી સીમામાં ઝીરો ડાઉન કરવામાં આવી. તેના તરત બાદ બોટને ઘેરી લેવામાં આવી. જેને હવે મુંબઈ લાવવામાં આવી છે.
DIG સુનીલે જણાવ્યું કે પકડાયેલા પાંચેય પાકિસ્તાની નાગરિકોમાં મોહમ્મદ યાકૂબ બલોચી, શાકિર ઉલ્લાહ, ફરીદુલ્લાહ, અહમદ ખાન અને વાહિદુલ્લાહ ખાન છે. આ તમામ પાકિસ્તાનમાં પેશાવરના રહેવાસી છે. ઇન્ડિયન કોસ્ટ ગાર્ડે જણાવ્યું કે પકડાયેલી ડ્રગ્સની કિંમત ત્રણ હજાર કરોડ રૂપિયા છે. આ બોટને લક્ષદ્વીપથી ઉત્તર-પશ્ચિમમાં આશરે 160 નોટિકલ માઇલ અને મુંબઈથી દક્ષિણ-પશ્ચિમમાં આશરે 490 નોટિકલ માઇલના અંતરે ઘેરી લેવામાં આવી હતી. અધિકારીઓએ જણાવ્યું કે ખુલ્લા સમુદ્રમાં વોટર ટ્રાફિકને ડિસ્ટર્બ કર્યા વિના આ બોટની ઓળખ કરવી મોટો પડકાર હતો. ગુજરાત ATSએ જણાવ્યું કે ગુજરાતથી આટલે દૂર જઈને સમુદ્રમાં આ પ્રકારનું આ તેમનું પ્રથમ ઑપરેશન કરવામાં આવ્યું છે.
