નરેન્દ્ર મોદી સ્ટેડિયમ સહિત અનેક સ્થળોને બોમ્બથી ઉડાવવાની ધમકી, ઈમેઇલ ખાતાઓ અંગે તપાસમાં નવા સંકેતો
Ahmedabad Bomb Threat Investigation: અમદાવાદમાં નરેન્દ્ર મોદી સ્ટેડિયમ સહિત વિવિધ સ્થળોને બોમ્બથી ઉડાવી દેવાની ધમકી આપતા તાજેતરના બે કેસની પ્રાથમિક તપાસમાં સંકેતો મળ્યા છે કે ધમકી મોકલનારા ઈમેઇલ ખાતાઓનું સંચાલન બાંગ્લાદેશ અને પાકિસ્તાનમાંથી કરવામાં આવ્યું હતું. સાયબર ક્રાઇમ શાખા અનુસાર, તપાસમાં હેક કરાયેલા ઈમેઇલ ખાતાઓની ખરીદી-વેચાણ કરતા સંભવિત નેટવર્કનો પણ પત્તો મળ્યો છે.
પ્રથમ કેસ 7 ઑક્ટોબરના રોજ નોંધાયો હતો. તેમાં 16 સ્થળોને ધમકી આપવામાં આવી હતી, જેમાં 10 શાળાઓ, ગુજરાત હાઇકોર્ટ અને નરેન્દ્ર મોદી સ્ટેડિયમનો સમાવેશ થાય છે. બીજો કેસ 27 ઑક્ટોબરના રોજ નોંધાયો હતો, જેમાં 19 સ્થળોને નિશાન બનાવવામાં આવ્યાં હતાં.
આમાં 14 શાળાઓ, સરકારી કચેરીઓ, અદાલતો અને સ્ટેડિયમનો સમાવેશ થાય છે. બંને ધમકીભર્યા ઈમેઇલમાં ખાલિસ્તાનનો ઉલ્લેખ કરવામાં આવ્યો હતો અને ગાયક દિલજીત દોસાંજના કાર્યક્રમોમાં વિસ્ફોટ કરવાની ચેતવણી આપવામાં આવી હતી. તપાસમાં ઈમેઇલ હેડર અને જીમેઇલમાંથી મળેલી માહિતીના આધારે આ ખાતાઓના તાર બાંગ્લાદેશના રંગપુર તથા પાકિસ્તાનના લાહોર અને રાવલપિંડી સાથે જોડાયેલા હોવાના સંકેતો મળ્યા છે.
