MBBS In Uzbekistan: છેલ્લાં કેટલાંક વર્ષોથી મધ્ય એશિયાઈ દેશ ઉઝબેકિસ્તાન MBBSના અભ્યાસ માટે ઘણો લોકપ્રિય બન્યો છે. અહીં મોટી સંખ્યામાં ભારતીય વિદ્યાર્થીઓ મેડિકલ ડિગ્રી મેળવવા જઈ રહ્યા છે. પરંતુ આમાંથી ઘણા વિદ્યાર્થીઓને શિક્ષણની ગુણવત્તા અંગે ઘણી ફરિયાદો રહી છે. કેટલાક વિદ્યાર્થીઓનું કહેવું છે કે યુનિવર્સિટીઓનો અભ્યાસક્રમ ભારતના નેશનલ મેડિકલ કમિશન (NMC) મુજબ નથી, જેના કારણે ભારતમાં મેડિકલ પ્રેક્ટિસ કરવાનું તેમનું ભવિષ્ય અધ્ધર થઈ રહ્યું છે.
હવે ભારત સરકારે આ મામલે ધ્યાન આપ્યું છે. વિદેશ મંત્રાલયે મંગળવારે જણાવ્યું કે સરકાર એ વાતનું ધ્યાન રાખી રહી છે કે મેડિકલ અથવા અન્ય અભ્યાસ માટે ઉઝબેકિસ્તાન જતા ભારતીય વિદ્યાર્થીઓને ગુણવત્તાયુક્ત શિક્ષણ મળે અને તેઓ ભારતમાં નેશનલ મેડિકલ કમિશનની માર્ગદર્શિકાનું પાલન કરે. ભારતની ખાનગી મેડિકલ કોલેજોની સરખામણીએ ઉઝબેકિસ્તાનની મેડિકલ કોલેજોમાં ઓછા ખર્ચે અભ્યાસ કરાવવામાં આવે છે, જેના કારણે વિદ્યાર્થીઓ મોટી સંખ્યામાં અહીં ડિગ્રી મેળવવા જાય છે.
ભારતીય વિદ્યાર્થીઓને લઈને ઉઝબેકિસ્તાનના સંપર્કમાં વિદેશ મંત્રાલય
વિદેશ મંત્રાલયના પ્રવક્તા રણધીર જયસ્વાલે મીડિયા બ્રીફિંગમાં મેડિકલ શિક્ષણ અંગે માહિતી આપી હતી. તેઓ એવા અહેવાલો અંગે પૂછાયેલા સવાલોના જવાબ આપી રહ્યા હતા, જેમાં દાવો કરવામાં આવ્યો છે કે ઉઝબેકિસ્તાનમાં મેડિકલનો અભ્યાસ કરવા ઇચ્છતા ભારતીય વિદ્યાર્થીઓની સંખ્યામાં મોટો ઘટાડો થયો છે. આ સાથે તેમને એ પણ પૂછવામાં આવ્યું હતું કે શું આ મુદ્દે બંને દેશો વચ્ચે કોઈ વાતચીત ચાલી રહી છે.
જયસ્વાલે કહ્યું, ‘ભારતીય વિદ્યાર્થીઓ સાથે જોડાયેલા મુદ્દાઓને લઈને અમે ઉઝબેકિસ્તાનના પક્ષ સાથે સતત સંપર્કમાં છીએ.’
વિદેશ મંત્રાલયના પ્રવક્તાએ તાશકંદમાં ભારતીય દૂતાવાસ દ્વારા અગાઉ જાહેર કરવામાં આવેલી સલાહો અને સાથે જ NMCની સલાહનો ઉલ્લેખ કર્યો. આ સલાહોમાં ઉઝબેકિસ્તાન ઉપરાંત અન્ય અનેક સ્થળોએ પણ અભ્યાસ કરવા ઇચ્છતા વિદ્યાર્થીઓ માટે માર્ગદર્શિકા આપવામાં આવી હતી. તેમણે કહ્યું, ‘કૃપા કરીને જાહેર કરવામાં આવેલી આ સલાહો એક વાર જરૂર જોઈ લેજો.’
ભારતીય દૂતાવાસની મેડિકલ વિદ્યાર્થીઓને સલાહ
ભારતીય દૂતાવાસે 25 જૂને એક સલાહપત્ર જાહેર કર્યું હતું. દૂતાવાસે ઉઝબેકિસ્તાનમાં મેડિકલનો અભ્યાસ કરવા ઇચ્છતા ભારતીય વિદ્યાર્થીઓને સલાહ આપી હતી કે જો તેઓ કોઈ એજ્યુકેશન કન્સલ્ટન્ટ (EC)ની મદદ લેવા ઇચ્છતા હોય, તો માત્ર એવા કન્સલ્ટન્ટની સેવાઓ લે જેમનો વ્યવસાય ભારતમાં નોંધાયેલો હોય.
કૃપા કરીને ધ્યાન આપો કે કેટલીક નવી શરૂ થયેલી સંસ્થાઓ, ખાસ કરીને ખાનગી યુનિવર્સિટીઓમાં માળખાકીય સુવિધાઓ, લેબ અને અંગ્રેજી બોલતા પ્રોફેસરોની અછત હોઈ શકે છે. તેથી તેઓ NMCના ‘ફોરેન મેડિકલ ગ્રેજ્યુએટ લાઇસન્સિયેટ (FMGL) રેગ્યુલેશન્સ 2021’ના માપદંડો પૂર્ણ કરી શકતી નથી. વિદ્યાર્થીઓને ઉઝબેકિસ્તાનમાં અભ્યાસ કરવા માટે સ્ટુડન્ટ વિઝા પર જવાની પણ સલાહ આપવામાં આવે છે. ઈ-વિઝા પર આવતા વિદ્યાર્થીઓના કેટલાક કિસ્સા દૂતાવાસના ધ્યાનમાં આવ્યા છે. જો કોઈ મુશ્કેલી ઊભી થાય, તો દૂતાવાસના કોન્સ્યુલર અધિકારીનો સંપર્ક કરી શકાય છે. – ભારતીય દૂતાવાસ (તાશકંદ, ઉઝબેકિસ્તાન)
સલાહપત્ર જોઈને જ અભ્યાસ માટે જાઓ: વિદેશ મંત્રાલય
રણધીર જયસ્વાલે પોતાના જવાબમાં કહ્યું કે સરકાર એ વાતનું ધ્યાન રાખી રહી છે કે ઉઝબેકિસ્તાનમાં અભ્યાસ કરવા જતા ભારતીય વિદ્યાર્થીઓને, મેડિકલ શિક્ષણ સહિત, સારી ગુણવત્તાવાળું શિક્ષણ મળે, જેથી તેઓ ભારતની સંસ્થા NMCની માર્ગદર્શિકાનું પાલન કરી શકે.
તેમણે વધુમાં કહ્યું, ‘આ સુનિશ્ચિત કરવું પણ જરૂરી છે કે મેડિકલ અથવા અન્ય અભ્યાસ માટે ઉઝબેકિસ્તાન જતા ભારતીય વિદ્યાર્થીઓનું ભારત કે ઉઝબેકિસ્તાનમાં કોઈ ખોટા ઇરાદા ધરાવતી વ્યક્તિ અથવા જૂથ દ્વારા શોષણ ન થાય. મેં અગાઉ કહ્યું તેમ, મારી સલાહ છે કે તમે અમારા દ્વારા જાહેર કરવામાં આવેલા સલાહપત્રને જરૂર જુઓ. તેનાથી તમને વધુ સારી રીતે સમજાશે કે અત્યારે જે કંઈ પણ થઈ રહ્યું છે, તે શા માટે થઈ રહ્યું છે.’
